ثورة 23 يوليو .. 65 عاما على محاولة تشويه «الإهاربية» لجمال عبدالناصر.. و«الأبنودي» يرد ( فيديو)

ألقى الشاعر الراحل الكبير عبدالرحمن الأبنودى قصيدة انتصر فيها للمواقف الزعيم الراحل جمال عبدالناصر بعد أن حاولت الجماعة الإرهابية فى عهد المعزول محمد مرسى تشويه حقبة حكمه وجاءت القصيدة التى حملت عنوان " جمال عبدالناصر" كالتالى:

من يمدحه يطلع خاسر
ويشبروله ايامه
يعيش جمال عبد الناصر
يعيش بصوته واحلامه
( فى قلوب شعب عبد الناصر )

مش ناصرى ولا كنت فى يوم
بالذات وف زمنه وف حينه
لكن العفن وفساد القوم
نسانى حتى زنازينه
( فى سجون عبد الناصر )

ازاى ينسينا الحاضر
طعم الاصالة اللى فى صوته
يعيش جمال عبد الناصر
يعيش جمال حتى فى موته
(ماهو مات وعاش عبد الناصر)

اسمه جمال وجميل فعلا
ياما شجعان خوافة
عظيم وكان انسان طبعا
المجد مش شغل صحافة
(عشان ده عاش عبد الناصر )

اعداؤه كرهوه ودى نعمة
من كرهه اعداؤه صادق
فى قلبه كان حاضن امه
وضمير وهمة ومبادئ
(ساكنين فى صوت عبد الناصر)

ملامحنا رجعت بعد غياب
دلوقتى بس اللى فهمناه
لا كان حرامى ولا كان كداب
ولا نهبنا مع اللى معاه
( انا باحكى عن عبد الناصر)

عشنا وياه الحياة كالحلم
فلا فساد ولا رهن بلاد
يومها انتشينا ثقافة وعلم
وف زمنه ما عشناش احاد
( كنا جموع فى زمن عبد الناصر )

كان الامل فى خضرته بكر
ومافيش للقوت والمال
ومصر ابطال ورجال فكر
ومثقفين ستات ورجال
(جيوش عبد الناصر)

كان الهلال فى قلبه صليب
ولا شفنا حزازات فى بلادنا
زلا شفنا ديب بيطارد ديب
ولا جرس خاصم مدنة
( وحدنا صوت عبد الناصر )

دفعنا تمن الحرية
مش بدينار ودولار
يوم وقفته فى المنشية
خلى الرصاص يهرب من عار
( اعداء عبد الناصر)

رغم الحصار كنا احرار
وفى الهزيمة الشعب ما جاعش
كان اسمها بلد الثوار
وقرار زعيمها ما بيرجعش
( قرار جمال عبد الناصر )

خلى بلاده اعز بلاد
ليها احترام فى الكون مخصوص
لا شفنا وسط رجاله فساد
ولا خطط سمسرة ولصوص
(كان الجميع عبد الناصر )

لولاه ما كنت اتعلمتم
ولا بقيتوا دراكولا
ياللى انتوا زعما وانجازكوا
دخلتوا مصر الكوكاكولا
( وبتشتموا فى عبد الناصر)

عمر ما جاع فى زمنه فقير
وما التقاش دوا للعلة
دلوقتى لعبة " اخطف طير "
والامة فى خدمة شله
( وبتكره جمال عبد الناصر )

يتريقوا على طوابيره
علشان فراخ الجمعية
شوفوا غيره دلوقتى وخيره
حتى الرغيف بقى امنية
( يرحم جمال عبد الناصر )

فى ناس بتنهب وتسوف
ولايهمها مين عاش ومين مات
واحنا العدو عنا يخوف
معناه اكيد اننا قفوات
( من يوم ما مات عبد الناصر )

الارض رجعت للاقطاع
وقالو رجعت لاصحابها
وصاحبك الفلاح تانى ضاع
ضاعت العقود واللى كتبها
( وخط ايد عبد الناصر )

انا اذكرك من غير ذكرى
والناس بتفتكر بخشوع
والامس واليوم وده وبكره
يبكوك بعظمة مش بدموع
( كفاية نقول عبد الناصر )

دلوقتى رجعوا الفقرا خلاص
سكنوا جحورهم من تانى
رحل معاك زمن الاخلاص
وجه زمان غير انسانى
( ماهوش زمن عبد الناصر )

صحينا على زمن الالغاز
يحكمنا فيه اهل الاعمال
وللعدو صدرنا الغاز
بفرح وبكل استهبال
( نكاية فى عبد الناصر )

بنمدها بغاز الاجيال
تحويشة الزمن القادم
اتوحشوا فى جمع الاموال
ورجعنا سادة وخوادم
( ضد اتجاه عبد الناصر )

يا جمال نجيب زيك من فين
يا نار يا ثورة يا ندهة ناى
البوسطجى اللى اسمه حسين
ابوك منين جابك وازاى؟؟
( عمل جمال عبد الناصر )

لو هاكتبك ما تساع اقلام
ولا كلام غالى واوراق
الامر كله ومافيه.. انا مشتاق
فقلت اسلم عليك وانام
( نومة جمال عبد الناصر )