خالد الغندور لجماهير الأهلي: «التركيز في فريقكوا أهم من التركيز معايا»

وجه خالد الغندور، لاعب الزمالك السابق، رسالة لجماهير الأهلي، في تدوينة عبر حسابه الشخصي بموقع التواصل الاجتماعي «فيسبوك»، إذ استنكر تعرضه للسباب على الرغم من إبداء رأيه على صفحته الشخصية، كما دعا جمهور الأهلي للتركيز على مبارياته القادمة ومعالجة أخطاء التعادل الأخير في بطولة أفريقيا بدلًا من التركيز معه.
وقال الغندور في تدوينته: «ربنا يهدي الجميع لما أقول مايوكا لا يصلح و معروف كمان وأقول ستانلي لم يفعل شيء و ثمنه غالي يبقي عادي و لما جهاز الأهلي و لاعبيه يتريقوا علي كوليبالي في التمرين والكل يقول ليس لي علاقة بالصفقة عادي برده ولما يلعب و يحرز أهداف في الدوري وأقول انه لاعب قوي و غير مهاري والحكم الحقيقي عليه في المباريات الكبيرة ييجي امبارح يضيع فرصتين فأقول إنه غير موفق و النهارده غير موفق و ننتظر لعبه في الوداد و القطن و الزمالك و المقاصة للحكم علي مستواه يبقي عيب».
وأضاف: «ولما حسام البدري يشوح له يبقي عادي و لما أكون لاعب كرة و أقول رأيي في لاعب يبقي عيب ولازم الشتيمة و قلة التربية رغم أن فيه ناس لم تلمس الكرة بتقول رأيها عادي وأكيد رأيي مش لازم يكون صح.. لكن أنا أرى كده زي ما اتكلمت على لاعبين كثير و من الزمالك أيضا، و لما أكتب بوست أقول فيه هارد لك للأهلي والمشوار ما زال طويل يبقي عيب و لما أنزل بوست عزاء لحسام عاشور بسبب وفاة أخوه الله يرحمه يبقي ليه ما نزلتش من بدري وكل ده رغم أن الموسم الماضي بعض الصحفيين والإعلاميين و جمهور الاهلي تمنوا هزيمة الزمالك في نهائي أفريقيا والبعض أعلنها والبعض الأخر كتب أفريقيا يا صن داونز و ساعتها كان عادي و طبيعي».
وتابع: «وأخيرا كتبت بوست قلت فيه بِسْم الله الرحمن الرحيم و الحمد لله رب العالمين لقيت الناس بتشتم برده و ناس باعتين إن شادي رد عليه مش عارف رد على إيه وإن عبد الحميد حسن لاعب الاهلي بيتكلم عني وحش برده مش عارف ليه وكنت أتمنى أنهم يركزوا مع فريق الأهلي و مستوى اللاعبين و تغييرات المدرب و سبب التعادل والتركيز على مباراة القطن أعتقد أهم بكثير من التركيز على خالد الغندور الذي يكتب رأيه على صفحته بكل أدب واحترام و رغم كل ده ألاقي الشتائم زعلان من البلوك ومركز مع كل كلمة اقولها ويشاهد و يستمع لكل كلمة أقولها في الراديو وفي دريم و في الصفحة والصراحة ما كنتش فاكر إن مضايق ناس كثير كده رغم إني بزعل جدا على زعل الناس وأخيراً الحمد لله رب العالمين و انتظروني إن شاء الله بعد العيد في برنامج يومي عشان حسناتي تزيد بإذن الله».