براح

قررت تخصيص المساحة لمشكلة جاتلى على موقع صراحة بتقول صاحبتها:

أنا متجوزة وجوزى مثقف وشخصية ناجحة ومعروفة، من الخطوبة لقيتة بيكلم بنات وكذا واحدة طلعت شمال وصور عريانة ليها وقلة أدب تلات أربع مرات وكل مرة يعتذر وقالى أصلنا مش متجوزين وعجلنا بالفرح 8 شهور بدل سنة خطوبة.

طلع عنده طبايع غريبة وكنت هسيبه وروحت لدكتور نفسانى.

علاقته بمامته أوفر، بيهتم بيها أكتر منى وكذا مرة يقولى إنها أهم منى، روحنا لدكتور نفسانى وعلاقات زوجية، قال إن عنده مشكلة، المهم أول دكتورة معجبتوش عشان بيخاف منها ومن صراحتها، والتانى بقى يروحله وقال له: إنه لازم يعمل حاجات وأن يسمح لنفسه يحبنى ويخفف من مامته، مبقاش يروح ولا بقى يعمل اللى قال عليه الدكتور.

احنا ساكنين جنب مامته، ومامته عاوزة ترجع تسكن جنبنا، تصورى إنها بتصر تيجى تحضرله شنطة السفر وهو مسافر بدل ما تسيبه يعتمد على نفسه، أما آخر مشاكلى معاه فهى إنه بيتنرفز جدا لما يلاقينى حاطه روج.

أنا دلوقتى حامل ومش عارفة أعمل إيه، أطلب الطلاق وأخلص منه ومن أمه أو أكمل وأعيش المشاكل دى كلها ومين عالم حاله هينصلح إمتى؟

عزيزتى السائلة:
كثير من رجالنا تمت تربيتهم بطريقة خاطئة، وارتبطوا بأمهاتهم بشكل اعتمادى كبير ويبدو أن علاقة زوجك بأمه من هذا النوع، لو كنتِ ما زلت فى مرحلة الخطوبة لقلت لكِ أعيدى النظر فى علاقتك به، لكنك صرت زوجته ويبدو من رسالتك أنك تحبينه وقد أصبحت حاملا بطفل، فلا أنصح بالتفكير فى الطلاق ولنجرب حيلة لطيفة، اقتربى من حماتك وصاحبيها أو بمعنى أصح كلى عقلها، فمع هذه المرأة مفتاح قلب وعقل زوجك وأى صراع أو مباراة معها ستكونى أنت الخاسرة فيها، حاولى التعامل بحنكة وعقل ومع الوقت ستدافع عنك هى ضد تصرفات ابنها إذا نجحتِ فى اكتساب ثقتها وحبها.

إذا أردت إخفاء اسمك وهويتك راسل الصفحة على العنوان التالى:
samiabakry5555.sarahah.com