قصيدة " ماتخافيش " للشاعر عبدالعزيز عبدالله

ونفس المشهد البائس بيتكرر
ونفس اللهجة تتعالى وتتكبر
ونفس التُهمة تتوزع على ولادك
"عميل خاين وقابض من بلاد برا
وشكلك بلطجى بتعادى للثورة "
ومن تانى الكلام ف الحق صار عورة
بدال البدلة أصبح شكلهم بدقون
ومكنون الفؤاد مايبانش بالمظهر
ولا بالركعتين والسبحة نتمنظر
وللثورة ميدان ياللى انتى مش عارف
وأحسن برلمان هو اللى حررنا
هو اللى رافع للوطن راسه
هو الضمير اللى ملوش أهواء
هو اللى قدم للنهار شهداء
ومش عايز كراسى ولا كام منصب
ومبيقبلش م القاتل عزاء
ومن أمتى اللى ضحىوا
يصبحوا خونة
ومن أمتى اللى خاين يتضربلوا تمام
هترجع تتقلب فيكى الآمور تانى
ولكن ماتخافيش راح نعدل المايل
ولا بيهمنا من سطوة العسكر
ولا م اللى بيلحس للبيادة كمان
كل القيود بأيدينا تتكسر
ومش راجعة سنين القهر والحرمان .