حجزنا سفرنا وظبطنا اقامتنا وعال العال؟ يلا نسافر بقى ؟لأ لسه !.. التحضير للسفر نفسه فن، فيه شوية حاجات لازم ترتبها وتعمل حسابك عليها قبل ما تسافر، وهنبدأ النهارده بواحدة من أهم الحاجات دي على الإطلاق .. الPacking ، او تستيف الهدوم في الشنطة ، موضوع مهم جدا وإهماله يساوي خسارة مادية!..
خليني احكيلك قصة صغيرة حصلت معايا عشان تعرف أهميته .. وانا رايح المانيا من مطار بولونيا في ايطاليا، كنت – لدواعي الكسل – رامي الهدوم في الشنطة من غير ما استفهم التستيفة التمام زي ما متعود، المهم، كنا طالعين في ايزي جيت، ولو فاكرين من المقالات الي فاتت، ايزي جيت بتسمحلك بشنطة واحده cabin bag ليها ابعاد معينة، وبتدخل الشنطة في صندوق كدا، لو مدخلتش ميعديكش، وياخدها تتشحن وتدفع 60 يورو تكلفة شحن (ملاحظة : التذكرة اصلا ب20 يورو!) ... حجم الشنطة الي ايزي جيت بتسمحلك بيها المهم وصلت في دوري في الطابور وحاولت استعبط واعدي من غير اختبار البوكس دا لاني عارف اني هفشل فيه، الست طبعا شافت النسر المصري بيرفرف على الباسبور بلونه الاخضر الزرعي الجميل وحلفت راسها وألف سيف ما تعديني غير لما الشنطة تدخل في الصندوق – ملاحظة تانية: جيمي رفيقي في الرحلة شنطته اصلا باي حال متخشش في الصندوق، لكن عشان طلعلها الاقامة الالماني عدى عادي- المهم احاول معاها مفيش، قلتلها طيب انا هاجي على جنب وافك الشنطة واعمل repack و نشوف، قالتلي قدامك 5 دقايق بالضبط والطيارة هتطلع! شنطة جيمي )ابعادها ملهاش علاقة خالص بالمسموح) فتحت الشنطة وطلعت كل حاجه براها و بدأت repacking بتكنيك الclown car (هشرحه كمان شوية) ، بس طبعا عشان التأخير قعدت تزعقلي وتقولي "فاضل دقيقة"، فكان فيه بعض ملابسي –مش الخارجية- لسه ملقاة على أرض المطار، سبتهم وقفلت الشنطة بسرعة وبصيتلها باحتقار وقلتلها ابقي لميهم انتي، حطيت الشنطة في الصندوق ولانها متستفة صح دخلت عادي، ولحقت الطيارة في اللحظات الأخيرة قبل طلوعها وقبل انهيار جيمي الي كان على وشك يسيبني .. نتعلم من القصة دي ان الcorrect packing يفرق كتير اوي ، طيب ايه طرق الباكنج الأفضل والأشهر والي بيستعملها محترفو السفر والflying attendants ، ودول ناس بتسافر كتير ودايما معاها شنطة واحدة Carry-on Bag هل تعلم عزيز القارئ ان ال15 يوم في أوروبا دي كل الي كان معايا كان شنطة هاندباج صغيرة ؟
التكنيك الأول هو طريقة الrolling : وأنصار الطريقة دي بيقولوا انها بتوفر مساحات، ولو اتعملت بطريقة سليمة كمان بتخلي الهدوم تطلع بدون تجعدات ولا كرمشة ... ودا لينك رائع فيه سلايد شو لشرح الفكره ودا فيديو ممتاز بيشرح ازاي عدد كبير من الملابس اتحط في شنطة صغيرة باستخدام الrolling وبشكل عام الrolling تكنيك ممتاز لشنط الbackpack والشنط الي شبه الي في الفيديو دا ، دوروا على يوتيوب كمان على طرق الrolling لانواع ملابس مختلفة لأن كل نوع هدوم ليه طريقة افضل في الطي عشان ميتكرمش، الفيديو دا برضه عظيم للموضوع دا. الصورتين دول لنفس الهدوم في نفس الشنطة، على اليمين بطريقة التطبيق العادية وعلى الشمال لما عملنا rolling
التكنيك التاني (وهو المفضل بالنسبة لي) : هو تكنيك الclown car ولما تشوف الفيديو دا هتعرف ليه اسمه كدا ودا من تجربتي أفضل طريقة تستف بيها الشنطة وتبقى مظبوطة ومقفولة كويس، بس طبعا خد بالك ان الهدوم مش هتكون مكوية وهيبقى فيه كرمشات وكدا، ودا فيديو ممتاز بيوريك ازاي : ودي هي أفضل طرق أعرفها لترتيب الشنطة، بس خلي بالك، المشكلة الأكبر أصلا هي مبالغتك في تقدير انت محتاج ايه معاك وانت مسافر وأخدك حاجات كتير ملهاش اي لازمة .. القاعدة بتقول ان اي سفرية مهياش اكتر من اسبوعين ، ممكن تحط كل الي انت محتاجة في Carry-on bag مش محتاج اكتر من كدا ..
ودي شوية دروس اتعلمتها من السفر بالنسبة للموضوع دا حابب أشارككم بيها : - قبل ما ترتب الشنطة، حط قدامك كل الهدوم الي انت عاوز تاخدها، وبعدين شيل نصفها (صدقني شيل نصفها) - الحاجات الصغيرة والملابس الي حجمها قليل جرب تحطها في حاجات صغيرة زي الي تحت دي، هتاخد مساحة اقل وتبقى منظمة اكتر.
- أهم حاجه في الرحلة الراحة، خد معاك هدوم مريحة أهم من هدوم شيك - اهم حاجه في السياحة الكوتشي ، هتمشي كتير وهتقدر راحة رجلك وقتها - صدقني لو مسافر سياحة، كوتشي واحد مريح كافي جدا بالاضافة للي في رجلك وشكرا - الشرابات اهم من التيشيرتات، صدقني ... - صدقني مش محتاج اكتر من جاكت واحد (يفضل يكون بكوبيشون ومضاد للمياه) وبنطلونين جينز بالكتير (لو قاعد حوالي اسبوعين) - حاول تبقى هدومك versatile ، يعني نفس اللبس يكون ليه اكتر من استخدام (double face jacket) مثلا وحاجات تليق على حاجات كتير... - شنطتك لازم يبقى فيها صورة من كل ورقك المهم (باسبورك –حجزك-طيرانك الخ..) - حط أدواتك (مكنة الحلاقة – البارفان الخ..) دايما فوق خالص، في الجيب الي في الناحية التانية في الشنطة.. - إعمل حساب التكنولوجيا، اتاكد من شكل فيش البلد الي هتسافرها وإن شواحنك مناسبة وإن معاك كونفرتر - حط الخدعة دي فجيبك لو احتاجتها، لو عندك مشكلة في الوزن او عرض الشنطة وانت داخل على الطيارة، البس كذا جاكت فوق بعض وحط حاجات في جيوبك (نفعتني جدا في موقف)
صدقني ، دول كفاية اوي ل 10 ايام سفر :
وهنكمل المرة الجاية عن ايه اهم الحاجات الي لازم تحضرها قبل ما تسافر عشان رحلتك تبقى مريحة ومفيهاش مفاجآت سيئة ... تابعوني على تويتر : http://www.twitter.com/NourEldin_z3r0 تابعوني على فيسبوك : http://www.facebook.com/ze3r0 تابعوني على نوّرني : http://www.nawarny.com
اقرأ أيضا : في دايرة الرحلة (1): دليلك للسفر بأرخص الوسائل وأفضلها في دايرة الرحلة (2): دليلك للاقامة الرخيصة والممتعة في السفر والسياحة.. في دايرة الرحلة (3): دليلك للاقامة الرخيصة (نسخة البنات والمتزوجين)..
