هيفا الخجولة.. يا بختك يا أحمد

مساء الاثنين الماضى وأنا كعادتى أنفض هموم اليوم مع برنامجه الشيق القاهرة اليوم استمعت إلى عمرو أديب فى رسالة مسجلة من بيروت وفاجأنا بالظهور الأول لفاتنتى التى خانت كل أحلامى وتزوجت من أبوهشيمة هيفاء وهبى ظهرت فى فستان أبيض جميل فقلت فى سرى يا بختك يا أحمد ولكن يبدو أن ما دار فى سرى اطلع عليه عمرو.
فوجدته يقول بعلو الصوت يا بختك يا أحمد، سألها عمرو «إنت فيك إيه مخللى الناس كلها تهتم بيك» فلم تستطع أن تجيب من فرط خجلها الشديد ثم عاد ليسألها أسئلة أخرى أظهرت كل كرات الدم الحمراء على وجهها، قلت فى نفسى الله يجازيك ياعمرو..
حد فى الدنيا يقول إن هيفا أكبر من عريسها! هى قالت لك أن الصدفة وحدها هى اللى خلتها ترتبط بإنسان أكبر منها بثلاث سنوات وقالت إنها بنت ال32 ربيعا! ما كانش ناقص يا عمرو إلا أنك تسألها عن ليلة الدخلة!.. الله.. الله.. دا سألها! دا بيقول للهيفا انت كنت مرعوبة من الزفاف ولا ليلة الزفاف..!
هى صحيح أكلت السؤال ومر مرور الكرام لكنه سألها وهى لاتزال خجولة، ويا بختك يا أحمد.. ايه دا كمان انت هتسألها على الشبكة اللى فى اديها؟ ايه يا عم عمرو انت فاكر كل الناس بتلبس ساعات بمئات الألوف زيك..
أكيد شبكة الهيفا زى شبكة أى بنت ممكن تزيد شوية لأنها الهيفا يعنى بدل الخاتم والدبلة والمحبس والكوليه ممكن يبقى خاتم الماظ زى اللى بنشوفه فى ايد نجمات هوليوود.
شوفت بقى اهى قالت لك ان شبكتى هى حب زوجى ومهرى نسخة من القران الكريم.. يا سلام يا هيفا والنبى أنت زى الفل ويا بختك يا أحمد.. واسكت بقى يا عم عمرو وبلاش الأفكار العجيبة دى ايه يعنى شفتها لابسة خاتم وحلق غاليين شوية وايه حكاية الحجارة اللى انت عمال تسأل عنها كل شوية؟
الخاتم دا كام حجر؟ والحلق ممكن يبقى 3 حجارة ؟والأنسيال خمسة ؟ ايه يا عم شغل الشيشة دا ما تسيب الست فى حالها والا انت انضميت للناس المفترية اللى قالوا ان الفرح البسيط اللى اتعمل للهيفا الخجولة اتكلف 50 مليون جنيه يا عالم كفاية حقد بقى وسيبوا الست تستمتع بعريسها وسيبوا العريس فى حاله مش كفاية يا عينى الراجل رجع من شهر العسل لوحده علشان 2500 عامل بيشتغلوا فى مصانعه زى ما هيفا قالت.. كفاية بقى يا عمرو..
ويا بختك يا أحمد.!