أمينة خليل: في ناس ظهروا على حقيقتهم بعد نجاحي وعيطت بدل الدموع دم

حلت الفنانة أمينة خليل ضيفة على برنامج «طريق تالت»، عبر محطة راديو «إنرجي 92.1»، الذي يذاع ضمن الخريطة البرامجية لشهر رمضان.
وكشفت العديد من الأمور الشخصية والخاصة عن حياتها، أبرزها أن عائلتها لعبت دورا كبيرا في بناء شخصيتها، موضحة: «أهلى مسكوا إيدي في الطريق اللي اخترت أمشي فيه شخصيتي أو شغلي أو اختياراتي في الحياة ومفرضوش عليا طريق معين».
واستطردت قائلة: «بابا وماما حنينين ومتفتحين العقل وخلوني أنشأ في بيئة متفتحة التفكير، ومهتمين جدا بتعليمي والبيت يبقى كويس وسعيد على قد ما يقدروا.. ودعموني جدا لما قررت أبقى ممثلة رغم الضغوط من أفراد تانية من العيلة لإنه مكنش قرار سهل بس دلوقتي الموضوع بقى متقبل أكتر».
وعن علاقتها بأصدقائها، قالت أمينة خليل: «الأصدقاء بياخدوا حيز كبير جدا من حياة أي بنت سواء بنات أو شباب.. في أصدقاء لما مهمين جدا مع نجاحي عمرهم ما غيروا طريقتهم معايا.. ولا حسيت إن في استغلال للنجاح بتاعي».
أما عمن تخاذلوا معها، أوضحت: «في ناس تانية اتغيروا معايا وظهروا على حقيقتهم، وعيطت بدل الدموع دم كتير لإني حاسة إني اتخذلت وأنا كنت بحبهم أوي».
وأشارت إلى أنها تحاول دائما عدم التأثر بما تمر به، معقبة: «بحاول لما اكتشف الحقيقة مقلبش إنسانة خوافة وعيني في وسط راسي وأعمل ألف حساب لأي شخص».
وكشفت عن أقرب شخصية لها، قائلة: «دكتورة ليلى سعد هي أمي الروحية وصديقتي جدا وبتتفرج على كل أفلامي ومسلسلاتي وعارفة كل حاجة في حياتي كانت بتدرس لي تمثيل وحببتني في الفن».
أما عن مسلسلها المفضل، أجابت: «بحب مسلسل عائلة الحاج متولي وكنت عاوزه أعمل أدوار كل الستات وكنت بتفرج عليه وبقول عاوزة أبقى زي غادة عبد الرازق.. واتفرجت عليه عشرين مليون مرة».
وتحدثت عن الدور الذي قدمته ومقرب لها، مختتمة: «كل الأدوار اللي عملتها بحبها وأثرت فيا بس نازلي في جراند أوتيل كان طفرة في حياتي.. كان في روح موجودة في المسلسل ده مش هتتعوض وكنا كلنا صغيرين أوي».