قالت الإعلامية رضوى الشربيني، إنها ليست عدوة الرجال، ولكنها عدوة لأشباه الرجال المنتشرين في المجتمع: "أنا جيت في الدنيا بسبب راجل وهو أبويا وسندي في الدنيا راجل هو أخويا، وطليقي راجل محترم، وبالتالي أنا مش عدوة الرجالة، أنا عدوة أشباه الرجال، ولست عدوة للراجل، اللي بيضرب مراته مينفعش يتقال عليه راجل، واللي بيشغل مراته بالسُخرة، وهو قاعد في بيته مش راجل، واللي بيعشم دي ودي بالجواز وما يوفيش مش راجل". وأضافت رضوى، خلال استضافتها في برنامج "انا والقناع" الذي تقدمه الاعلامية منى عبد الوهاب: "صادفت الحب الحقيقي بعد انفصالي، وكانت قصة وانتهت، قابلت الحب الحقيقي بعد الانفصال ومكنش تعويض عاطفي بل قصة حب حقيقية، ولكنها انتهت وأنا مبحبش اتكلم عن القصص اللي انتهت بسبب اننا اتفقنا اننا لا نتفق". وفيما يخص مواصفات الزوج الذي تتمناه: "لازم يكون راجل قادر والقدرة هنا بمعنى إنه يكون قادر على العفو عند المقدرة عشان ميبصش على أخطائي ولا صغائر الأمور اللي أنا بعملها وهيكبر دماغه ومش هيتلككلي، ومش هيبص على عيوبي". وتابعت: "لازم يكون قوي ويشاركني كل أموري ويكون سند وقوته دي تكون معايا مش عليا، ولما يقرر إنه مش عاوز رضوى الشربيني مبعملش أي حاجة غير إنه هيجبني ويقولي في وشي أنا اسف من قادر أكمل". وأكلمت: "لازم يكون ناجح مقدرش اتجوز راجل مش ناجح ولا أنا أكون أنجح منه، ويكون عنده طموح ويتقي ربنا في البني آدمين ومكونش أنا أولهم لكن مامته وباباه، ولازم يكون بيحبني قوي وبيهتم بيا قوي ويعرف يتعامل معايا لأن أنا صعبة، ويكون حنين وطيب ودمه خفيف عشان مقدرش اتجوز راجل دمه تقيل ابداً، ويكون شيك وخفيف في نفسه". وأردفت: "الحياة بعد وفاة أمي اختلفت كتير وبقيت بعيط قوي، والناس واخدة عني صورة المرأة الحديدية اللي من غير مشاعر ولا شعور وده عكس شخصيتي". وأَضافت: "لم أشعر بالوجع عندما أمسكت ورقة طلاقي بيدي"، مؤكدة أن رصيدها في بنوك الوجع أكثر بكثير من قسيمة الطلاق: "اكتشفت نفسي ولقيت إني إنسان مش قابل يعيش العيشة دي، ورصيدي في بنوك الوجع أكثر بكثير من قسيمة طلاق، ومقدرش أعد الأوجاع دي". واختتمت: "قسيمة الطلاق مش وجع إنما اللي بتمري بيه في طريقك عشان يوصلك للطلاق هو اللي بيكون وجع، والقسيمة دي بتبقى النتيجة، وأنا متوجعتش لما مسكت قسيمة طلاقي في إيدي، ومش في كل الأوقات كلمة انتي طالق بتوجع، خصوصاً اذا كان عندك قناعة إن الكلمة دي هي دوامي مش وجعك".