شوبير: كهربا عاد لحسابات الأهلي بسبب هذا الأمر.. وجلسة الخطيب تحسم مصيره

كشف الإعلامي أحمد شوبير، عضو اتحاد الكرة السابق، عن مفاجأة مدوية حول مصير كهربا مع النادي الأهلي.
وقال شوبير في تصريحات إذاعية:" لحد امبارح كان كل اللي بتسمعوه هو اجتهادات في موضوع كهربا، لكن كان في خلفية مع بداية السنة كان كابتن محسن صالح، رئيس لجنة التخطيط أخبر كهربا أنه لن يتواجد مع الأهلي".
وأضاف:" لجأ كهربا للكابتن سيد عبد الحفيظ، مدير الكرة، وسيد عبد الحفيظ قاله استنى نشوف القصة وكان متعاطفًا مع كهربا".
وتابع:" شاء حظ كهربا أن يأتي مارسيل كولر، ومعاه مساعد تونسي كان لعيب مع كهربا لما كان محترف في سويسرا، وقدم عروض رائعة وقتها، فأشاد ل كولر بكهربا، والراجل قال اتفرج عليه".
وواصل:" عندما شاهد كولر كهربا أعجب به وقال إنه لعيب محتاجه وأنا في احتياج إليه، ولكن طبقًا لظروف النادي".
وأوضح:" اتقلبت الأية والمسئولين في النادي الأهلي قالوا طالما كولر محتاج لكهربا، وعلى المستوى الشخصي من العيب إننا نضحي بيه بالشكل ده، قالوا نستنى نشوف القصة شكلها ايه".
وأكد:" الأهلي مش عليه ولا جنيه في الغرامة بتاعت كهربا، وزي كل الأندية بالتأكيد عنده أزمة مالية وسيولة".
وأشار:" الأهلي وصل إلى شبه اتفاق إنهم يعطوا كهربا جزء من فلوسه، ويشوفوا هيعملوا معاه ايه ممكن يمنحوه سلفه من باقي عقده..هيشوفوا الدنيا وبعدها يقرروا، كل ده كان كلام بيتقال".
وأضاف:" كهربا قعد مع سيد عبد الحفيظ 10 مرات، الكلام هو الكلام إن كولر يريده في الأهلي".
وشدد:" إمبارح كان أول اجتماع يتم مناقشة موضوع كهربا فيه، قالوا الراجل مقتنع بيه، هو ليه فلوس قديمة من عقده القديم، ومن عقده ممكن نديله مبلغ، وده هيحل الجانب الأكبر من المشكلة".
وأكمل:" السؤال إللي ما حدش عارفله جواب، كهربا هو لوحده ونادي ألفيش البرتغالي هما إللي بيتحملوا الغرامة، النادي أفلس، وأحد المحاميين قال إن نصف الغرامة سيتحملها النادي البرتغالي والحكم جاي كده، فالمبلغ إللي هيدفع بس بتاع كهربا، هذا كلام أشرف عبد العزيز المحامي".
وأتم:" صحة هذه المعلومة من عدمها لا أعلمها حتى لا أكون كذاب، إذا كان الموضوع بهذا الشكل، لماذا لم تسدد غرامة كهربا حتى الآن؟ لا توجد سيولة مادية في النادي الأهلي، أتوقع أمتى؟ لما يكون في سيولة مادية في الأهلي ممكن يتم سداد ويبدأ كهربا يلعب، بس 50 مليون مفيش الرقم ده هيبقى صعب جدًا".