أحمد فهمي عن سمير غانم: كان حلم حياتنا إنه يظهر معانا في أخر مشهد لأول فيلم لينا

نعى الفنان أحمد فهمي، نجم الكوميديا الراحل سمير غانم، الذي توفي اليوم عن عمر يناهز 84 عاما.
ونشر أحمد فهمي عبر صفحته الرسمية على موقع «فيسبوك»: «هشام ماجد وهو بيعرفني على شيكو واحنا في الجامعة قالي.. شيكو معانا إعدادى هندسة وممثله المفضل سمير غانم.. عشان يقرب المسافات لإنه كان ممثلي المفضل أنا وهشام برضه.. لحد ورقة شفرة كان Screen saver موبايلتنا احنا التلاتة صورة سمير غانم وكان حلم حياتنا إنه يظهر معانا فى أخر مشهد لأول فيلم لينا.. وكان لينا الشرف إنه جالنا.. الله يرحمك يا استاذ».
وتابع: «جرب كدا تقول أى إفية قاله سمير غانم مش هيضحك جرب تقول (يكنش الأوتوبيس النهري.. طلع طسها ونزل تانى) هو بس اللي ينفع يضحك بأى كلام وبأي طريقة ..عكس أى كوميديان تانى لو قلت إفيهاته هتضحك الناس.. الوحيد القادر على إضحاكك بكلام عادى.. لو قرأ الجورنال قادر إنه يضحكك .. أعظم كوميديان فى التاريخ ومش فى تاريخ مصر بس.. أعظم كوميديان في العالم.. أى كوميديان أياً كان حجمه يعجز إنه يعمل اللى كان بيعمله سمير غانم لإنه مستحيل.. سمير غانم لن يتكرر.. الله يرحمك يا استاذ».
وتوفي مساء اليوم الفنان القدير سمير غانم، عن عمر يناهز 84 عاما، بعد مسيرة فنية كبيرة أثرى خلالها العمل السينمائي والمسرحي والتليفزيوني في مصر والعالم العربي، وأمتع الملايين من المشاهدين بأعماله التي لا تنسى وبكوميديا من نوع خاص، لم يسبقه إليها أحد، خطت اسمه بين عظماء الكوميديا المصريين والعرب.
وتقدم "الشروق" أحر التعازي لأسرة الفنان الراحل ومحبيه، وتدعو أن يتغمده الله بواسع المغفرة.