فضفضة واحدة… ست – 85

بعنوان: منك لله يا… إسكو
* كنت نايمة في أمان الله، جه سعادته و نام جنبي و أنا مش عايزة أشوف خلقته. لأن خدمته مش من اختصاصي.. ده اختصاص الست ندى.
المهم.. ضربني بكفه (أل إيه .. بيهزر)!.. زمجرت له؛ قام ساكت دقيقتين كده كنت بدأت أدخل في النوم تاني، قام ضربني بكفه تاني مرة و قبل ما اشخط فيه ،طبع بوسته على خدي.. كان يومه أسود .. ضربته قام جري زعلان مني.
طبعا كملت نومي و اتمنيت أحلم حلم جميل يروق دمي شوية، يا سلام على أكلة أيس كريم بالشيكولاتة و لا طبق رز باللبن و القشطة، و لا طبق بليلة بالفانيليا و الكريمة.. ممممممممم.. الله … بلف جوه الكافية و أختار.. و لسه بمد إيدي بالشوكة على حتة جاتوه بالشيكولاته؛ فجأة أسمع صوته و هو بيقولي:
_ جرى إيه يا ست هانم. لا نافع معاكي طبطبة و لا بوس؟!.. لازم أشخط فيكي يعني علشان تقومي تحطي لي الأكل و تغيري الرملة بتاعتي!
بصيت له بذهول و بجد مش عارفة أمسك اعصابي و قلت له:
_ أمال فين الست بتاعتك.. هي أولى بخدمتك.. و لا هي تجيبك البيت و تروح تتفسح هي و أنا إللي أخدم حضرتك!
معطنيش فرصة أردح له أكثر من كده.. قام قاللي قومي نااااااو.
صحيت من نومي مفزوعة و لقيته واقف فوق راسي و بينونو بجد بصوت عالي.
قلت الله ما اغزيك يا شيطان.. حطيت له الفود بتاعه و غيرت له الميه و الرمل كمان .
بياكل و هو بيغني من الفرحة.
و أنا مستنية الست ندى لما تيجي علشان أعملها حفلةمتنوعة. من ضرب و لتهزيق ع أصوله.
على رأي المثل:
كنت مرتاحة؛ جابتلي حاحة.
كانت نقصاك إياك!