عايزين ايه بقى من التغيير؟ يعنى نعدل نحسن الدستور علشان نبقى مفتحين مش عور ويخلى المستقبل ليه نور والتعديل اللى خلانى مسرور 8 سنين بس عمر الريس يعنى مش حايقعد و تيس ويكبر فى السن و يهيس ويقول انا حلو انا كويس يارب ارزقنا بواحد زكى محترم امير عايزين ايه بقى من التغيير؟ لا للرشوه يبقى شعار و بيان المرتشى يحس انه لو خد يتهان والراشى من ربنا يكون جبان وننسى بقى ايام زمان كنت تدخل مصلحه حيران الكل بيقولك هات يأما تقعد وتبات و يعطلوك بعدة ادوات كلهم رجاله و ستات و تقول الضمير مات تروح دافع. ما الوقت فات نفسنا بقى بسرعه الواحد يخلص مصلحته والموظف يخاف عليك كانك واحد من عيلته تطلب منه طلب يقولك حاضر دقيقه و اكون خلصته يارب الموظف للرشوه ما يكونش اسير عايزين ايه بقى من التغيير؟ الشاب يكون عنده شقه مستور مش نايم جنب حيطه او سور ويدهنا و يبلطها ويركبلها برور ويتجوز ويبقى سعيد و مسرور والحياه يبقى ليها بدور ويقول ده انا كنت نكره مهجور ده كان عصر كله فجور ده الحياه حلوه انا مبهور ده انا بقى ليا احاسيس و شعور يارب اجعلنى دايما كده مستور ويبدا بقى يفكر فى عربيه من غبور ويروح يصيف فى شهر من الشهور ويقدم للحج و يستنى الدور ويشترى حطه ارض يعملها قبور يارب اجعل كل مصرى مرتاح مش فقير عايزين ايه بقى من التغيير؟ ننسى بقى التحرش و ونرجع الاحترام ونحترم المراه زى ما بيقول الاسلام ولازم نحسسها انها فى امن و سلام ولا نضايقهم ولا نسبب ليهم الالام ومنبقاش ليهم كوابيس بل احلام والشباب يخافوا عليهم زى الرخام لازم نحترم خجلهم هما مش اصنام ونعتبرهم شئ جميل زى الحمام لازم تخاف عليه و تديله اهتمام والبنت اللى معندهاش التزام لازم مندهاش اى اهتمام وهى حتحس انها مش تمام وننظف بقى شويه الافلام من القبلات و خصوصا افلام عادل امام ولازم يعرفوا ان كده حرام عمره ما حلله شيخ او امام يارب استر نساءنا يا ستير عايزين ايه بقى من التغيير؟ نرجع شعار الشرطه فى خدمه الشعب وننسى بقى تعاملهم اللى كان صعب شتيمه و اهانه و ضرب واحيانا كانوا بيدوسوا على وش المجرم بالكعب احنا عايزين من الشرطه وعود المعامله الحلوه هو الهدف المنشود لازم نعرف ان هما من الاجرام سدود وان من غيرهم مش حيبقى فى حدود وان الامان حيبقى مفقود وان البلد حيبدا ياكل فيها الدود وشعار كلنا ايد واحده نرفعه فوق اعلى عمود شرطه مسلمين مسحيين بيض و سود يارب اجعل تعاملات الشرطه تبقى زى الحرير عايزين ايه بقى من التغيير؟ الدول العربيه يكونوا بثورتنا مبسوطين ويتقال مصر ام الدنيا الكل يقول امين ونرجع تانى ليهم محبوبين وفى مشاكلهم يكونوا علينا معتمدين واحنا نكون ادها ساندين ونحل مشكلة فلسطين والكل يرجع تانى يقول هما دول المصريين رجاله شهامه و عمرهم ما كانوا متهانين نمحى اثار العهد السابق المشين ونقولهم احنا اهو مستعدين ولعوده الحب و الاخوه احنا خدامين بس لو سمحتوا متعملوناش على اننا شحاتين او من الغنى و الترف محرومين او علشان بنشتغل عندكو نبقى مساكين لا احنا وحده واحده مترابطين اعتقد انكوا تعرفوا احنا مين واحنا من غيركوا مش عايشين وبلاش ندخل بينا المزيفين زى الاسرائلين و الايرانيين ويارب نفضل احبه طول السنين يارب اجعل بلدنا تبقى نور للعرب يا منير عايزين ايه بقى من التغيير؟ عايزين الانتاج يزيد اسمنت و طباعه و حديد وتروح الشغل وانت سعيد وتحس ان كل يوم عيد ونقدم للعالم كل شئ جديد وهدفنا نبقى الاول مش السنيد وفى كل صناعه يكون لينا ايد اسمنا دايما يبقى مشهور مجيد يارب اجعل مصر مشهوره زى المشاهير وابعد عنها كل مفترى كداب شرير وده رأى الشخصى فى التغيير كامل محمد حامد 6/5/2011
