يا ابن الوزة

( عارف لما حرامي خسيس يلطش محفظتك ،
و أما تقوله هات محفظتي ،
يرد يقول و بكل بجاحة )
مش محفظتك ....
لأ محفظتي ....
مش محفظتك ....
أعدم عيني إنها محفظتي ...
( فجأة تلاقي الرد بونية جوه عينيك )
مش محفظتك ....
( قول لي بقى بالذمة ساعتها ها تعمل إيه ؟
أكيد راح تمشي ،
لكن أنا صممت ساعتها ،
و قلت يا روح ما في بعدك روح ،
قمت قوام و هجمت عليه ،
لأ و لقاني مسكت إيديه ، قوام و لويتها ،
من ورا ضهره و قلت له : هات ...
رد بكل بجاحة و خسة بعد سكات )
مش محفظتك ...
( لما قرصت شوية عليه )
لازم تحلف لي و ع المصحف ...
( لما قرصت شوية كمان )
طيب قول لي الأول لونها ؟
( قرصت زيادة )
لازم تعرف ، فيها كام عشرة و كام عشرين ؟
( قرصت زيادة ، و لما لقاني النطع مصمم ،
رد بكل ندالة و خسه )
بس خلاص ها أديك عشرين .....
( قرصت صرخت )
بأقولك هات .....
( رد فخامته بكل تناكة )
خد لك عشرة عليها كمان .....
( قرصت زيادة )
طيب ماشي ، أنا ها أديك آدي خمسة زيادة ....
بس خلاص مش ها أدفع تاني ....
أعدم عيني ، واقفة عليا كده بخسارة ....
طيب ماشي ، خلاص ها أكسرها ....
طيب بس اديني أمارة ....
( قرصت زيادة )
خلاص ها أديلك آخر عشرة ....
( كسرت دراعه ، لويت له التاني )
هات محفظتي يا ابن الوزة ....
إديني أمارة ....
( كسرت التاني )
خمسة كمان ....
( رفسته ف رجله )
هات محفظتي ....
خدلك يلا عليهم عشرة ...
( دست ف بطنه )
هات محفظتي ....
فيها كام سوستة ؟
( خرمت له عينه )
جلد صناعي و إلا طبيعي ؟
( قطعت ودانه )
هات محفظتي .....
طيب بني و الا لموني ؟
( شوف من إمتى لحد الوقتي ،
كل شوية يغيب و يماطل ،
باطل باطل باطل باطل ،
باطل وعدك ، باطل عهدك ،
كلك كده على بعضك باطل ،
لأ و كمان لساك بتماطل ؟؟؟؟؟؟