مجزرة استاد بور سعيد

جوه في استاد بور سعيد..........مات حوالي مييت شهيد
حبه من مصر الجديده..............وحبه جايين م الصعيد
كلهم أولاد بلادنا....................مش يهود أو من بعيد
مين خذلهم..مين قتلهم..........والعدد عمال يزيد
مصر ليه بتنزف ولادها.............ودمها راح م الوريد
مصر ليه هانت عليكم............والجروح دايما ...تزيد
كل مره نقول ح تهدي............ليه تولع من جديد
تقضي ع الخير اللي فاضل .....قوللي مين المستفيد
الفلول وولاد مبارك؟............ولا مجلس(مفترض )يبقي رشيد
ولا شرطه عاوزه تثبت.........إنها لسه..حديد
ولا واحد له أجنده.............ولا في الإجرام عتيد
ولا طالب خيبه ..فاشل......ولا تلميذ كان بليد
ماتش كوره ده يا عالم........ولا حرب..ونار تقيد
مصر ما بقاش ليها صاحب....هو ده ..بيت القصيد
كله ماشي علي مزاجه.....كله يفعل ما يريد
مصر لو وقعت يا عالم...ح يبيعونا ف سوق عبيد
مصر عاوزه اللي يداويها.....وحد بيمدلها ..إيد
مصر عاوزه راجل وراضع ......ميه النيل السعيد
مصر بتنادي ولادها .......فين صلاح وابن الوليد
مصر عاوزه ولادها تبقي ...حطه دايما إيد في إيد
إعدموا عدلي وصفوت.......خد معاه عز ورشيد
إعدموا حسني مبارك .....كل ده ح يروح أكيد
د. هاني بخاري