التأمين الصحى

أحكموا بيننا يا مستمعين.......لما نشوف حال التأمين
إستقبال راح أقولك مولد........غايب صاحبه ما عارف فين
بالله قولي..دول م المرضي ......قالك لأ..دول منتفعين
جاي عشان أكتب له أجازه.........وإن بصيت ح يسب الدين
أو يديك بالشومه ف راسك.........أو يديك بإديه بوكسين
أو ح يجيب بلطجي حتتهم.........والمطوه بسوسته وسنيين
ولا فيه نقطه شرطه تغيثك.......ولا فيه عسكري بشرطتين
إخلع بالطيك يا بني وزوغ........ما تقولشي لحد رايح فين
أما الأكل يا عيني علينا..........مسروق نصه من الطابخين
واما شكيت لمدير مستشفي......قالي الطقه عليك عشرين
قلنا نوفر مال الدوله.............إدي بدل شهري ..خمسين
قالك ده يا خفيف مش حقك......ولا هوش حقي ..تطلع مين
يظهر إن الهيئه بتنتج.........ناس شغلتها فراخ تسمين
كنت نوباتجي ف يوم متنيل......قلت عشان اقبض قرشين
قالوا الجمعه ما هيش محسوبه ......ولا حتي من الساعه اتنين
وعشان تقبض ..عد تمانيه..........يعني التوتل قول عشرين
ده التأمين ده فطشه كبيره...........كنا دكاتره بقينا مجانين
الله يلعن يوم ما جينالكم.............كان يوم مطين بالطين
د. هانى بخارى
استشارى جراحة
شاعر أطباء الإسكندرية