منى زكى : المشكلة في " هيصة " التعليم المجانى !

مني زكي لها بريق خاص يميزها عن بقية نجمات السينما حالياً .. حتي الحوار معها يحمل بصمات التميز ، فهي بقدر حبها للتمثيل بقدر اهتمامها بمشاكل وقضايا بلدنا ونفسها نكون أحسن ، تعالوا نشوف آراء مني باعتبارها " واحدة من الناس " ..
تغيير اختياراتك وتنوع أدوارك في الفترة الأخيرة .. هل متعمد منك؟
طبعاً اختياراتي لازم تتغير لان افكاري ومعتقداتي بتتغير و تنضج مع الوقت ، ولاتنسي ان سني بيكبر يعني خبرتي بتزيد و ذلك كله طبيعي انه ينعكي علي اختياراتي و ادواري و لكنه لا يعني اني لن اقدم ادواراً بسيطه ، بالعكس فالفنان يمكن أن يقدم أعظم الرسائل من خلال أبسط الادوار ، وهذا ما تعلمته في كورسات التمثيل الي حصلت عليها في أمريكا .
الم يحن الوقت لتفكري في تقديم اكثر من عمل في السنة وأيضا افلام تحمل اسمك كبطله أولي للفيلم قدوه بفنانات كبار مثل فاتن حمامة و ماجدة؟
اكثر من فيلم صعب جدا لان المواسم السينمائيه عندنا حاليا ضعيفه جدا و لا تتعدي 4 مواسم عكس الوضع زمان عنما كانوا ينتجوا اكثر من 80 فيلماً في السنة أما حكاية إني أقدم أفلاماً اكون انا بطلتها فهذا الامر لا يفرق معي كثيرا طالما اني أقدم أدواراً مهمه تساعدني علي عمل تاريخ سينمائي مشرف .. ولكني خضت هذه التجربة في فيلم " أحكي يا شهر زاد " و الحمدلله حققت نجاحاً كبيراً ، و سيراني الناس مره اخرى بنفس المضمون مع اختلاف الشكل طبعا في " أسوار القمر " .
أعرف أنك تهتمين بالقراءة .. فماذا غيرت فيك وما الذي اضافته إليك ؟
أصبح لدي وعي وأدراك أكبر لكل ما يحدث حولي, وهناك أشياء عندما نعرف تاريخها نستطيع ان نتوقع مستقبلها ، المشكلة أن التعليم في مصر لا يركز الا علي التاريخ المصري الحديث فقط بدون أية اشارة لان الحضارة المصرية هي اصل الحضارات في العالم كله .
يبدو أن لديك وجهه نظر تجاه مناهج وكتب وزارة التربية والتعليم؟
أنا عمري ما درست التاريخ المصري لأنني كنت أعيش في الخارج لمدة طويلة مع أسرتي ولكن لما قرأت وجدت أنه مهم جداً أننا نقول أن أساس الطب خرج من عند العرب والطب البديل هو نفسه الطب النبوي ، الغريب انهم في اوربا و امريكا يستخدمون الطب البديل و كأنهم مبدعيه بل و الاكثر انهم صدروه لنا كل اي رد فعل من عندنا...
##
نشأتك بالخارج هل أثرت في تعاملاتك مع الناس؟
بالطبع نشأتي كان لها تأثير علي خاصة وان والدي حرص علي تربيتي بشكل متحفظ جدا و لكني تعلمت هناك كيف اعتمد علي نفسي و أتحمل مسئوليه قراراتي ، يمكن العيب الوحيد في نشاتي بالخارج إني أكاد أكون شخصية غير اجتماعية .
ايه رأيك في إتهام جيل الشباب بانه ضائع ومتخبط ومش عارف مش عايز ايه؟
لأ ..أنا شايفه أن شباب جيلنا 3 أقسام فيه قسم جاد جداً ومجتهد وعايز يشارك برأيه وعنده منطق وتفكير سليم ومتطور وعندهم طموح وعايزة تكون حاجه بجد وفيه نوعيه تانية من الشباب ليس عنده أي ادراك الا بقنوات المزيكا والغناء والرقص , أما القسم الثالث للأسف -ودول أخطر نوع- شايفين نفسهم بيفهموا ومش عايزين حد يعلمهم أو يعطيهم ملاحظة ولكنهم في الحقيقة مش فاهمين حاجه خالص ودي مشكلة كبيرة ان يكون فيه شباب لسه بيبدأ حياته ومش عايز يتعلم حاجه من الأكبر منه ولا يتقبل فكرة ان فيه حد ممكن يعدل عليه وفاكر نفسه كبير طوال الوقت و السبب في كل ذلك أخطاء التعليم .
هل لديك طرح معين مثلاً؟
طريقة التعليم اللي بنتعلم بيها غلط لأن ماينفعش أن التلاميذ أو الطلبة يكونوا عبارة عن وعاء أضع فيه معلومات علشان أفرغها آخر السنة وخلاص العملية التعليمية خلصت علي كده ، الحفظ والصم بيكون أساسها مش الفهم والاستيعاب لدرجة أن كتير من الطلاب لو سألناه علي معلومة كان بيذاكرها السنه اللي فاتت هنلاقيه مش فاكر حاجه عنها .. وممكن كمان مش فاكر أنه درسها أصلاً ، والمشكلة فعلاً في التعليم المجاني .
##
إزاى التعليم المجاني هو اللي عمل المشاكل دي كلها من وجهة نظرك؟
آه كل اللي إحنا فيه بسبب التعليم المجاني لأنه كله فاكر نفسه بيفهم وللاسف ناس كتير مش هتفهمني صح أو هتفهم المنطق اللي بتكلم من خلاله .. ولكن كل ما أقصده أن زمان كان اللي مش متعلم بيقعد ويسمع ويفهم من اللي متعلم لكن دلوقتي كله شايف نفسه فاهم ومتعلم ومش عايز يسمع انه غلط ابداً .
يعني الفقير ما يتعلمش؟
لأ مش قصدي المقصود أن التعليم المجاني يكون لحد مرحلة معينه زي ما الدول المتقدمة بتعمل واولهم أمريكا .. يعني مش كل الناس بتدخل الجامعه وده مش غلط لأن مش لازم كل الناس تدخل الجامعه ، كفاية مثلا حتى الثانوية العامة لكن هنا "هيصة" والكل بيدخل الجامعة وعلشان كده احنا بنفتقر وكمان مابنتعلمش!! كما أن هناك عندهم تقدير للتعليم الفني واحنا هنا بنحقر من شانه رغم أنه مطلوب جداً , وقد تقابلت من فترة مع سباك عايش في فرنسا غني جداً يعني مليونير بسبب مهنته في السباكة .. طيب ليه احنا ما نغيرش افكارنا.
و لماذا لم تحاولين عرض وجهه نظرك بصفتك شخصية عامة؟
أشارك في حملة ينابيع الحياة للتبرع بالدم التي تتبع اليونيسيف واذهب معهم في زيارات ميدانية وهذه المشاركة جزء من أطار أكبر .