سخن .. مولع .. موهوج

--------
* بقالنا فترة نعيش عهدا مختلفا جديدا .. عهد الوقفات والاحتجاجات والمسيرات والمظاهرات والهتافات .. قد ترونه أنتم الشباب عاديا جدا .. فهو عهد قريب منكم .. تعاصرونه وتشتركون فيه أحيانا .. ولكن نحن نراه بعين مختلفة ..
* علي أيامنا ياولاد .. ماكانش فيه الحاجات دي .. ماكانش فيه خالص .. لأن الأيام اللي قبلنا كانوا شوية ناس مهافيف كده يجيلهم شوية إيمان بشوية مبادئ ما تعجبش شوية ناس تانيين .. يقوموا شوية الناس التانيين دول مسلطين شوية عناصر أمنية تمسك الشوية ناس الأولانيين وتوديهم في شوية حتت إحنا مانعرفهاش .. وكانوا الشوية الناس الجامدين يسموها وراء الشمس ..
* الحمد لله أنا ماحدش من عيلتي اتقفش أو كان من شوية الناس الأولانيين المهافيف .. يعني لم أر أمي أو خالتي أو عمتي دايرة في الشوارع تلطم وتدور علي ابنها وهي مش عارفة اتاخد امتي وعلي فين وراجع الساعة كام .. لكن سمعت عن ناس نعرفهم .. وكانت القصص التي تحدث وراء جدران الحتت اللي ورا الشمس دي شبه أفلام الكرنك والبريء كده .. وكانت الناس المهافيف لما يطلعوا م الحتت دي .. ينقسموا لقسمين .. ناس متضحضحة وسنانها مكسرة وركبها مخلعة .. ودول كانوا بيتداروا في بيتهم وماتقوملهومش قومة تاني .. وإن اضطروا يظهروا في المجتمع .. يظهروا بمظهر المقلمة أظافرهم كأنهم يعلنون بغير مباشرة أنهم تابوا وأنابوا .. أما القسم الآخر فكان بيطلع ولسه فيه حيل .. يقعد يعافر شوية كده .. يقوموا ساحبينه تاني ورا الشمس .. يفضل داخل خارج من ورا الشمس لقدامها لحد ما يبانله صاحب .. بل إن بعضهم كانت الأجهزة قرشت ملحته بقي فبيسحبوه بأسباب مختلفة .. أعرف واحد دخل البتاع اللي ورا الشمس ده عدة مرات .. كل مرة بموديل .. مرة إخوان .. ومرة شيوعي .. ومرة يميني متعفن ومرة بانقلاب ضد الحكم .. يعني خدها ماجستير ودكتوراه .. لحد ما ربنا رحمه وفترة الحكم دي خلصت ..
* جيلنا إحنا بقي اتجمع حول مشروعات قومية كتير .. فكنا مؤمنين بحاجات ومصدقينها .. وماكناش بنعترض كتير .. وإن اعترضنا يبقي في سرنا .. يعني الواحد يقعد يقول لنفسه أبدا ولا يمكن ولن وسوف وحبذا .. لكن لو حد دخل الأودة يقلب الأسطوانة فورا .. ليه بقي؟؟ .. لأن أهالينا حكولنا اللي كان بيحصل .. وخوفونا .. فما كناش نجرؤ نفكر حتي .. حتي الناس اللي زيي لما كبروا واشتغلوا في مهنة الفن والإبداع .. اتقرطمت ضوافرهم بفعل الرقابات الكتير اللي كانت متسلطة علينا .. فيه علي الأقل أربعين سنة من عمر التليفزيون مثلا لم يستطع الكتاب التعبير فيها عما يشعرون بحرية أبدا .. أما عن حالات الإبداع القليلة التي ظهرت فدي كانت فلتة .. نيجي بقي للسينما .. كل الأفلام التي صادرتها أو منعتها الرقابة كانت هي أهم أفلام السينما المصرية .. هذا الذعر الداخلي الذي عاصرناه في طفولتنا كانت له عيوب كثيرة ولكن كانت له ميزة واحدة سآتي إليها فيما بعد .
* لكل هذه الاسباب نندهش عندما نري كم الاعتراضات التي نشاهدها علي شاشات البرامج اليومين دول .. انا واحدة من الناس الذين يتساءلون في سرهم .. ياخويا العيال دي جابت الجرأة دي منين؟ .. ده بيقولوا كلام كبير قوي .. بيشتموا الحكومة كده عيني عينك .. وبينزلوا المظاهرات ولا خايفين ولا حاجة .. وحتي لما يشتبكوا مع البوليس بعضهم بيفتح البرجل ويجري والبعض الاخر بيقف ببجاحة كده مواجها الظابط من دول .. يترزع العصاية علي نافوخه يتكوم عالارض ويرجع يقف تاني مستخدما طريقة ما تقدرش .. يبقي قد الفسفوسة وواقف قدام هولاكو .. وما تقدرش .
* الفضل طبعا يرجع الي كم الحرية المتاح الآن .. يجب ان نعترف بذلك .. قدر لم تشهده مصر من قبل .. تعددية في الاحزاب والآراء والاتجاهات .. ساهم في ذلك الانترنت بجميع اشكاله والذي جعل هناك تواصلا مع الاتجاهات الفكرية والسياسية والعلمية في جميع انحاء العالم .. كما ساهم في نشر اي فكرة أو خبر بسرعة مطلقة .. هنا اتوقف .. هنا تحدث المشكلة .
* تعالوا نستعرض الاحداث التي مرت بنا الفترات الماضية .. ولنأخذ مثلا مشكلة المنتخب الوطني في جنوب افريقيا وقضية الستات اللي طلعت مش حقيقية .. أو مثلا مشكلة المحامين مع النيابة العامة والقضاء .. أو مشكلة الشاب الذي قتل في كتر مايا .. أو ذلك الذي قتل في الاسكندرية والله اعلم ماذا سيحدث والمجلة في طريقها اليكم الشهر ده .. لاحظوا كم السخونة التي تنتشر مثل النار في الهشيم .. كلنا بقينا بنسخن موت .. زي الرغيف اللي لساه طالع م الفرن بلهاليبه .. يظهر الخبر علي موقع م المواقع .. تحكي فيه البرامج وينتشر علي الفيس بوك .. في اقل من ساعة يكون الشعب سخن وولع كأن حد ماسكله بابور لحام اوكسجين ومولعه تحته .. ويبدأ الهتاف والصراخ واللطم علي نفس المواقع .. والاستنفار والتجييش والتحفيز والمنشورات والعويل .. والناس تتجمع في الشوارع ويهتفوا ويتعدوا علي الشرطة ويمكن علي الممتلكات العامة .. ويحصل صدام واعتقال وبلاوي سودة ..
* وهنا تظهر الميزة اللي كلمتكو عنها من شوية .. وهي ان الكتمة اللي كنا مكتومينها علمتنا مع الحرية الصاخبة اللي حاصله حاليا إننا نستني شوية .. لاننفعل بنفس السرعة .. نوزن الامور ولا ننساق الي موجات التسخين الحادة دي .. يقولوا عليه تريث .. لانك عندما تتريث تعطي نفسك فرصة سماع كل وجهات النظر .. والتريث يعلمك انك تحكم حكما افضل علي الامور .. وبالتالي لاتنساق للهوجة وبعدين يطلع الموضوع فشنك وفياسكو وكفتة ويبقي منظرك وحش .. او تفاجأ بان اللي انكسر ما يتصلحش .
التريث يخليك تحكم حكما اقرب الي الصح .. وساعتها بقي لو تأكدت .. ثور زي مانت عايز لكن علي حق .. وزعق وهلضم وشلضم بكيف كيفك .. لانك علي حق .. يعني لاتبقي مكتوما كتمة الوز اللي احنا كنا مكتومينها .. ولا سخن ومولع وموهوج بلا عقل .. بقول كده لان كتر التسخين والتوليع بلا عقل ممكن يودي البلد دي في داهية ..
وللحديث بقية