بالأرقام .. الطالب فى مصر بيذاكر يوم عيد ميلاده وبس !

أى طالب لما بيسقط بيقعد يدور على حجج فاضية، واحد يقول اصلى تعبت كتير السنة دى، والتانى يقول مشاكل البيت السبب، وتالت يقول نفسيتى مش مظبطة، احنا هنريحك ونقولك سبب سقوطك إللى هتقوله لماما وبابا.
السنة فيها 365 يوماً، فيها 52 يوماً جمعة المدارس بتقفل فيها، يبقى فاضل فى السنة 313 يومأً، والعطلة الصيفية 263 يومأً هيتفضل 263 يوماً.
لو قلنا إن حضرتك بتنام 8 ساعات فى اليوم يعنى بتنام 122 يوماً فى السنة وبكده هيتفضل 141 يومأً فى السنة.
وعلشان مزاجك يبقى ساعة واحدة للعب يوميا مفيدة للصحة ، كده ضاع 15 يوماً كمان كده السنة فاضل فيها 126 يوماً.
وطبعا كل يوم هتاخد ساعتين فى الأكل لأنك لازم تمضغ كويس زى ما بيقول الدكاترة، كده ضيعنا 30 يوماً، لسه فاضل فى السنة 96 يومأً.
ولأن الإنسان مخلوق إجتماعى هيكون متاح لك كل يوم ساعة تتكلم فيها مع الناس، يعنى 15 يوماً، لسه فاضل 81 يوم.
أيام الامتحانات في السنة على الأقل 35 يوم ، يتبقى 46 يوم ، ولو ضفنا العطلات إللى فى نص السنة وأيام الأعياد الدينية والوطنية والإنسانية والقومية وعددهم 40 يوماً هيتفضل 6 أيام.
طبيعى إنك لازم تمرض وده ممكن يكون لمدة 3 ايام فى السنة ، يبقى فاضل لسه 3 أيام تاخد منهم يومين على النت والفيس بوك والتليفزيون، هيتفضل يوم هو يوم ميلادك، وكل سنة وأنت طيب .. ولو نجحت تبقي عملت معجزة ، لكن الطبيعى إن حضرتك تسقط !