محارب بدرجة إعلامى محترف

فى كل مَرّة وفى كل مَقال هنتكلم فيه مع بعض عن لحظة سعادة، ممكن تكون اللحظة دى فيها سعادة لكل إللى حواليك، وتكون لحظة حزن ليك أنت شخصيّا، والعكس كمان ممكن يحصل، تكون لحظة سعادة ليك وتكون لحظة حُزن لكل إللى حواليك.. لحظات سعادة كتير هنتكلم عنها بتحصل لناس كتير، سواء لحظة سعادة بالنصر أو لحظة سعادة بوظيفة كان صعب قوى تتحقق، لحظة سعادة بمنصب مستحيل أو لحظة سعادة للشفاء من مرض صعب جدّا الشفاء منه.

فى مقالة النهارده وزى ما بيقولوا فى التليفزيون أنا هسيب المايك لبطل قصة النهارده علشان يتكلم عن نفسه ويقول:
.. أولا أنا اسمى محمد على حسنين كشك اتولدت فى منطقة إسطبل عنتر أو وادى عنتر فى حى مصر القديمة، منطقة عشوائية كانت مليئة بالضبابية والعشوائية والجهل والتخبط والظلمات.. مليئة بالتيارات الفكرية العشوائية جدا جدا جدا.. أكاد أكون الشخص الوحيد اللى دخل جامعة أنا و3 أربعة فى هذا الحى أو فى هذه المنطقة بالتحديد.. كان والدى سائق رحمة الله عليه وكانت والدتى أمية ربنا يبارك لى فيها ويخليهالى.. أنا من ضمن تمانية إخوات، أربعة بنات وأربعة صبيان.. حسنين على حسنين، إمام على حسنين، سعيد على حسنين، محمد على حسنين، يسرية على حسنين، عزيزة على حسنين، أسماء على حسنين، إسراء على حسنين وكلهم يعتبروا أميين لم يتعلموا إلا القليل.. إمام كفيف زيى التحقنا فى مدرسة النور للمكفوفين بشارع ابن مروان بحمامات القبة.. وكملنا فيها المراحل التعليمية لحد ما وصلنا للثانوية العامة ثم أكملت أنا طريقى الجامعى بجامعة القاهرة كلية آداب قسم تاريخ وتخرجت من هذه الجامعة العريقة والتحقت بالمعهد الدبلوماسى، خدت دبلومة تربوى، أخدت دبلومة فى الإعلام، التحقت بالنادى المصرى القاهرى واشتغلت مديرا للعلاقات العامة ومديرا لنشاط المعاقين وكنت أول حد عمل نشاط المعاقين أو ذوى الهمة فى الأندية الاجتماعية كان ده فى 2006 تحت إشراف م. تيسير مطر، كان رئيس النادى ساعتها وخلى بال حضرتك التنمر فى هذه الحقب المتلاحقة كان كثيرا كثيرا كثيرا.. لك أن تتخيل أعضاء نادى المصرى القاهرى عن بكرة أبيهم مكنوش مصدقين ولا مستوعبين أن واحد كفيف هيجى يشتغل معاهم فى هذه المنظومة اللى كانت لا تقبل أى معاق يدخل فى وسطهم.. إنت واخد بال حضرتك.. التنمر كان فى الجامعة كمان لما كنت أتميز ولما كنت أقدم حاجة جديدة كان يا خبر يا داهية دقى، وكان التنمر فى المنطقة كمان كان غير عادى كل ده قيس على ده، لما رحنا أخبار برايل للمكفوفين اللى كان عاملها دار أخبار اليوم واعترضت على أخبار برايل إنها مكملتش حتى بعد كدا وقلنا ياجماعة المعاقين والمكفوفين مش عاوزين الطرفة ولا المعلومة ولا صدق أو لا تصدق لأنهم عايزين شغل حقيقى على الأرض محدش صدقنا.. لحد ماجه سيادة الرئيس ربنا يبارك له وعمل 2018 عام المعاق وبسبب كدا حضرتك تبنيت موهبة رحمة خالد قدمتها على قناة دى إم سى.
ودا يحسب لك عند ربنا عز وجل وإن شاء الله بإذن الله نسير على خطاك وعلى النهج ونقدم موهبة تانى للإعلام المصرى والعربى محمد كشك، أنا والله لا فخر ولا غرور ولا منظرة بعتبر نفسى وجه جديد وإرث ثقافى عميق من داخل الأسرة المصرية من داخل المجتمع المصرى لأنى حاربت لحد ما وصلت حاربت الفقر والجهل والمرض.. حاربت التيارات الفكرية المتشددة.. حاربت الإخوان.. حاربت الفكر السرطانى زى ما بيقولوا لحد ما وصلت .. أنا اشتغلت فى مجلة أخبار برايل.. اشتغلت فى النادى المصرى القاهرى.. واشتغلت مدير التسويق فى اتحاد رياضات المكفوفين.. وكمان اشتغلت فى جرنان الفجر صحفى ويوتيوبر على قناة الفجر ثم تبنانى مستر حمادة إسماعيل ودخلونى راديو معاك والتحقت واشتغلت لمدة سنة في راديو معاك.. كنت شغال من 8 ل 10 مساء يوميا كنت بغطى كل الأحداث الجارية على الساحة الرياضية والسياسية والفنية والثقافية والعلمية والاعلامية وفضل من الله كنت بنال استحسان الجميع حتى أثنى عليا الشيخ خالد الجندى على الهواء.. أثنى عليا الكابتن فكرى صالح على الهواء، فضل من الله ثم قررت إنى أقدم حاجة جديدة وأطلع على التليفزيون قناة الحدث بطولى ورحت اشتريت هوا على حسابى بعت صيغة مراتى والأسرة واتداينت علشان أطلع على الهوا فى قناة الحدث علشان أقدم تجربة جديدة أن الكفيف يقدر يشيل هوا لوحده وده استمرارية أو تكميلا لطريق حضرتك اللى ابتديته مع رضوى وكلنا فى طريق واحد بنكمل بعض.. كلنا ذوى الهمم فى مهمة حقيقية لرفعة وسمو ورقى وازدهار هذا الوطن.. وده صدقنى ده مش شعارات.. إن شاء الله ربنا يكرمنى.. وإن شاء الله بإذن واحد أحد اقدم حاجة كويسة.
وهنا خلص محمد كلامه ولكن ما خلصش حماسه مخلصش شغفه وحبه لكل حاجة بيعملها وبيفكر يعملها، محمد إنسان طموحه كبير جدا يخليك تفكر وتقول فعلا هو اسم أصحاب الهمم اسم على مسمى أصحاب الإرادة أصحاب التحدى واسمحلى يا محمد اقول للام العظيمه اللى ربت نهارك سعيد ويومك بيضحك وأقولك ليك ولإخواتك يا محمد نهاركم سعيد ويومكم بيضحك وأقول لكل اللى يقرا المقاله نهاركم سعيد ويومكم بيضحك.
2