قواعد المواطن ال20

120 مليون مواطن فى مصر يفتقدون الحكم الخاصة ليكونوا مواطنين صالحين،
حتى يتمكنوا من الاستمتاع بحياتهم.. لذلك نقدم لهم 20 قاعدة تسهل عليهم الحياة.
01 «مدة صلاحية المواطن 7 أيام.. زى المرتب»
بما إنك كمواطن عندك متطلبات سواء كانت أكل، أو شرب، أو لبس أو علاج، فبالتالى لازم تشتغل.. وشغلك هيجيب لك المرتب اللى تقدر بيه تعمل كل - مش أوى - الحاجات اللى أنت عايزها، وبما إن صلاحية المرتب 7 أيام.. فاعلم جيدا أنك تفقد كل صلاحياتك كمواطن بعد 4 أيام من «القبض».
02 «شوية ورق»
بعيدا عن «المرتب» فالمواطن عشان يتم الاعتراف بيه كمواطن لازم شوية ورق: شهادة ميلاد، شهادة التعليم، شهادة الجيش، عقد العمل «إن وجد»، رخصة - مش رخصة مواطن لأ رخصة سواقه - تتسحب منه كل شوية وزود بقى عقد الجواز وآخر وأهم ورقة فى دنيتك وهى شهادة الوفاة.
03 «مش هتعرف أكتر من الحكومة»
مهم جدا الثقة المتبادلة بين المواطن والحكومة، وعشان كده لازم دايما تسمع كلام الحكومة، يعنى خليك واثق إن مافيش أزمات ماعندناش أزمة بنزين ولا سكر ولا عيش، على رأى الزعيم عادل إمام «الشوارع فاضية.. والمواصلات رايقة».
04 «الميكروباص برلمان الشعب»
يجب عليك كمواطن اتباع القاعدة الآتية أثناء ركوبك أحد وسائل المواصلات.. فعليك متابعة حوارات الركاب من حولك باهتمام، ولكن دون المشاركة فى الحوار وكأنك تتابعه عبر شاشة التليفزيون، فبما إن البرلمان اتنقل للميكروباص وبدأ يناقش همومك كمواطن فأكيد أمن المجلس موجود للاطمئنان على الأمن والأمان.
05 يا واكل قوتى
أنت المواطن فى دولة ولك حقوق طبعا بس أكيد عارف إن عليك واجبات، فبالتالى لما الدولة تقرر ترفع أسعار أو تلغى دعم أو تقلل دعم فأكيد ده ليه أسبابه فمش من المنطقى إنك تطلع تهلل وتندد وتشجب وتعترض، زى ما اتاخد منك أكيد اتاخد من غيرك، فالبالتالى أنت المفروض تسأل الدولة عايزة حاجة تانى ولا كده خلاص؟!
06 «التليفزيون دايما على حق»
بما إنك مواطن فى يملك إعلاماً رسميا متمثلا فى التليفزيون يبقى تتابعه وتصدق كل كلمة بتتقال فيه وكل اللى بيطلعوا فيه وأنت كمواطن لازم تبعد عن النت لأنه حرام شرعاً.
07 «مالناش دعوة يا مُهى»
عادى جدا إنك تسمع كمواطن عن عجز فى الموازنة، عن قضايا فساد، عن رشوة وواسطة ومحسوبية، عن ارتفاع أسعار صرف العملات وهبوط الجنيه ومحاربة الإرهاب وحاجات تانية كتير قوي.. اتبع القاعدة دى وركز فى نفسك بس ما هو لما كل واحد يركز فى نفسه ويشوف المطلوب منه ويعمله أكيد هنبقى أحسن - مش هما بيقولوا كده.
08 «يابخت من بات مغلوب»..
ركز عزيزى المواطن إن الكورة إجوان.. وإن الأهلى فوق الجميع وإن الزمالك هيفضل طول عمره مدرسة، ماتشتغلش بالك بحاجة غير الدورى والكاس وانتقالات اللعيبة الصيفية.. خليك رياضى يا أخي.
09 «الفقراء يدخلون الجنة»
خلى بقى الكلمتين دول حلقة فى ودانك، حجم قصرك فى الجنة يتناسب طرديا مع حجم فقرك كمواطن فى الدنيا.
يعنى كل ما زاد فقرك كل ما كبر قصرك، فحاول دايما تتلخص من فلوسك واتبرع بيهم.. اتبرع ولو بجنيه.
10 «اللى يشوف بلاوى الناس..
خليك دايما عندك أمل كمواطن ولاتيأس.. فلا يأس مع الحياة شوف «هيروشيما» واللى حصل.. وشوفهم بقوا إيه دلوقتى هتعرف إن لسه فيه أمل.. وإنك فعلا كمواطن أحسن من سوريا والعراق.
11 استمتع بالحياة.. وانتحر
عزيزى المواطن.. من حقك طبعا تقلق على مستقبلك ومستقبل أسرتك، وتهتم كمان بمرتبك هيقضيك إزاي.. وإزاى هتقدر توفر لأسرتك وجبة العشا النهارده.. ماتقلقش لو معاك 5 جنيه هتقدر توفر وجبة عشا محترمة وممكن وجبة غدا كمان أنت ورزقك.. كل اللى عليك تركب «ميكروباص» - برلمان - لحد الشيخ زايد إيدك فجيبك وأتمشى وأنت مبسوط.. لما تتعب أقعد على رصيف هتلاقى الوجبة جيالك.. وادعى ربنا يكتر فى عربياتهم.
12 «عيش نملة.. مافيش سكر»
الدنيا اتغيرت وإيقاع الحياة بقى سريع لدرجة إن النصيحة اللى وجهها ضابط للفنان عمرو عبدالجليل فى أحد أفلامه - عيش نملة تاكل سكر - أصبحت فاشلة.
فآخر مواطن قرر اتباع هذه النصيحة لم يجد سوى 2 كيلو سكر فقط.
13 «الباب اللى يجيلك منه الريح.. إعمل نفسك ماشفتوش»
لا حياة بدون مشاكل وعلى المواطن الحقيقى أن يحاول حل هذه المشاكل كالمواطن الوزير الذى اقترح عام 2013 الطبخ بالمانجو بدل الطماطم.
لذلك إن كانت هناك مشاكل تواجهك فى توافر العيش عليك سريعا التفكير فى الحل وليكن حل مارى أنطوانيت زوجة حاكم فرنسا لويس السادس عشر اللى نصحه الناس ياكلو جاتوه بدل العيش.. وأهو حل برضو.
14 «الشكوى لغير الله.. تودى فى داهية»
فى بعض الأحيان تلاحظ الدول ضعف إيمان مواطنيها لذلك تلجأ لبعض الطرق والوسائل التى تدفعهم إلى التقرب من الله وذلك حرصا من الدولة على دخول مواطنيها الجنة - مش هيبقى موت وخراب ديار.
لذلك كل اللى عليك إنك تلجأ إلى الله وخليك فاكر مافيش صاحب بيتصاحب، يعنى لو اشتكيت مديرك لزميلك أكيد هيبيعك ويسلمك تسليم أهالي.. ماهو مافيش راجل بقى راجل!!
15 «الله جاب.. الله خد.. الله عليه العوض»
سيادة المواطن.. وانت قاعد وقدامك كوباية الشاى وبتتابع برامج «التوك شو» وتلاقى على الشاشة فيديو لضبط أحد المسئولين وهو عنده فى بيته ملايين من العملات المختلفة.. ماتحاولش تسأل هيعمل بيهم إيه؟! أو الحكومة هتعمل فيه إيه؟! كل اللى المفروض تقوله وتفكر فيه.. «الله جاب.. الله خد.. الله عليه العوض».
16 «يا حيطة دارينى»
الجأ للقاعدة دى وأنت بتمارس عملك زى أى مواطن شريف حوالين جامع السيدة أو الحسين لو شبهت على حد تعرفه بيقرب منك».
17 «العشرين جنيه ب 100 كارنيه»
طبعا سيادتك كمواطن وبتشتغل وبتقبض آخر كل شهر - أحيانا - بتستغرب من جمال وروعة تصميم العشرين جنيه - 20 جنيه - السر فى الموضوع إنها هى الحل الذكى والسريع لكل المشاكل اللى ممكن تقابلك.. فنصيحة خلى دايما ورقتين بعشرين جنيه جنب بطاقتك.. يمكن تحتاجهم.
18 «الحيطان ليها ودان»
طبعا حضرتك أكيد عارف المثل ده.. بس أكيد مش عارف كمواطن تقدر تستفيد منه إزاى بص يا سيدي..
بما إن الحيطان ليها ودان فهى عندها القدرة إنها تسمع كل شكاوى حضرتك وأسرارك من غير ما تقولها لحد.. فصدقنى لو صاحبتها وحكيت معاها أسرارك هتبقى فى أمان أحسن ما تقولها لمراتك مثلا وتعايرك بيها مثلا زى طلعت زكريا ومراته فى فيلم حاحا وتفاحة وطلع ما بيعرفش - المثل ده -!
19 «الموت علينا حق»
خليك عارف إن الدنيا فانية وماحدش فيها مخلد، فلما تكون تعبان وتيجى تدور على الدوا وما تلاقيهوش تطلع إشاعات بأن فيه أزمة ونقص فى الأدوية.. لأ خليك.. مؤمن واعرف أن رسالتك كمواطن ممكن تكون خلصت لحد كده.. إلا لو ربنا ليه حكمة تانية وخلّى حد صيدلى صاحبك يطلعهولك من اللى مخزنه.
20 اللى تعوزه.. الدولة.. يحرم ع المواطنvv