اقرأ الحادثة !

من الظاهر أن شعبنا شعب ملتزم جدا وبيحب يطبق كل حاجة، فقال لك طالما مش عارفين نتجوز، والمتجوزين مش عارفين يصرفوا علي بيوتهم ومش ملاحقين من غلو لحمة لمدارس، لخضار سعر الكيلو وصل فيه 15 جنيه، قالك خلاص الحل إننا نخلص علي بعض، فنص البلد تموت والنص التاني يقضيها في الحبس، وأهو بالمرة هنكون عملنا بمقولة الموت علينا حق، وفعلا الناس مكدبتش خبر كل يوم في الجورنال لازم اقرأ إن فلان جاب خبر علان وإن واحد خلص علي إللي ما يتسمي صاحب البيت لإنه طالبه بالإيجار، لإنه إزاي يطالبه بالإيجار إخس عليه إخس، وبعدين اشمعني ده الحق الوحيد اللي بياخده كل مواطن؟؟
يلا دنياااااااا ومحدش واخد منها حاجة بس يعني صحيح الموت مكتوب علينا كلنا بس مش لازم نموت ناقصين عمر ولا إيه؟؟ يعني إحنا الأول كنا شعب بيتخانق مع دبان وشه دلوقتي بقينا سفاحين، ولأتفه الأسباب ومباقش حد شايفله كبير كل واحد بقت دماغه شر نفسه وعضلاته وقوته كبيرة، وده إحنا اتبق لنا كام أسبوع ونعيد أيام الحرافيش، وبقي الطبيعي أن أي حد مضايق من أي حاجة في أي مكان أو من أي شخص يبقي كده مع ألف سلامة game over وبينزله تتر النهاية بإنه يجيب أجله، مش مهم الطريقة بقي يمسك كرسي يفتح بيها دماغ حد، ولا يجيب سكينة يدبها في كرش إللي قدامه يجيب مصارينه، المهم إنه مادام ضايقه أو احتك بيه يبقي خلاص الراجل ده حفر قبره بإيده ونسينا بقي الكلام الجميل إللي بيقول إعطي أخيك سبعين عذر، طيب بلاش إنسانيات بقينا وحوش ؟؟ كله في حالة غليان ما بيصدق حد يقوله بم وينفجر في وشه، والأغرب إن الناس مبقتش تتأثر بالحوادث دي، أو تتاخد لما تسمع إن فلان أخوه قطعه تلات أرباع عشان كان مزنوق في حلة شوربة باللحمة للعيال يعني لما آجي أقول شوفتوا الحادثة الفلانية يا حرام مبلاقيش حد صعبان عليه حد، وأبسط رد سمعه يلا ريح واستريح يعني إللي عايشين خدوا إيه؟؟ عقبالنا بقي لما ندخل في الدور ونرتاح من الدنيا؟؟ حتي الموت عملوله طوابير زي بتاعة العيش والأنابيب؟؟ كل واحد مستني دوره بفارغ الصبر وهو كاره العيشة علي إللي عيشنها.