خايف من الجواز وأنا خايفة من المسئولية

أنا بابا يلا

هذه الحكايات، حكايات من وحى خيال الكاتب والرسام، وليست لها أى علاقة بالواقع الجميل، حكاية أب شايف المصلحة وعارفها وفاهمها.. ما هو كان جاى لما الباقى كان لسه هيروح! أومال إيه؟!
غصب عنه، مش بخاطره، رافض يسيبهم يجربوا بحريتهم، خايف عليهم حتى من نفسهم، أما أولاده.. لأنهم لسه رايحين فمش فاهمين، عايزين يجربوا، عايزين يفكروا بنفسهم لنفسهم.. وهنا تبدأ الحكاية.
منة: وليد.. أخبار منار إيه.. لسه بتتكلموا؟
وليد: لا طبعًا.. دى مجنونة
منة: إيه ده ليه؟
وليد: تخيلى.. عايزة قال إيه السنة الجاية واحنا نبقى فى تانية جامعة.. أروح أخطبها رسمى!



منة: حقها على فكرة
وليد: حق لما يركبها على فكرة ويركبك إنت كمان
منة: هى إيه الشتيمة فى كدة ما يركبنى الحق عادى
وليد: طيب فكك منى.. هى كلمتك ولا إيه؟
منة: لا طبعًا.. هو أنا كنت بطيقها أصلا؟
وليد: أومال.. إيه يعنى اللى جابها على بالك!!
منة: كنت عايزة أعرف هى اللى سابتك ولا انت اللى سبتها



وليد: إيه ده.. اشمعنا
منة: عشان أنا بصراحة بسيب عشان خايفة من المسئولية وباقى البنات كلها عايزة مسئولية وجواز
وليد: لا ده البنات الصغيرة اللى عايزة تتصور بالأبيض وفاكرة إن الجواز هئ ومئ.. مش عشان عايزين مسئولية!!
منة: يعنى خوفى ده طبيعى؟
وليد: طبعًا.. ما أنا بخاف من الجواز.. جدًا.. الفكرة بترعبنى وأنا أصغر منك.. عارفة ده معناه إيه
منة: إيه؟!
وليد: إنى أعقل منك!
منة: لا يا راجل.. على فكرة دى حاجة وحشة
وليد: ليه؟!
منة: عشان احنا عكس الناس.. احنا ممكن أو أكيد شكلنا كده معقدين
وليد: ليه ومن إيه؟
منة: من بابا وماما وحياتهم وخناقاتهم
وليد: معتقدش.. مش للدرجادى.. كل الناس عندها مشاكل
منة: بس احنا تقريبًا يوميًا فيه مشاكل.. فيه خلاف.. فيه جدال
وليد: يمكن.. مش عارف بس حاسس إن عمرى ما فكرت فى كده لأنى شايف إن ده طبيعى بيحصل فى كل بيت
منة: بص أنا طول حياتى كنت بصحى أقول يا رب مايبقاش فيه خناق وزعيق النهاردة
وليد: إيه.. ده إنت طلعتى حساسة وأنا كنت فاكرك للبلادة عنوان!



منة: هاهاها خفيف
وليد: لا بجد.. يمكن أنا كمان عندى نفس المشاعر بس إنت عرفتى تحددى أسبابها.. عشان حساسة
منة: المهم قولى الحب أهم ولا التفاهم
وليد: الفلوووووس
منة: مادى حقير
وليد: مادى واقعى.. الفلوس هتجيب التفاهم ولما يبقى فيه تفاهم هيبقى فيه حب
منة: إزاى بتقول كده
وليد: أقولك.. أبوكى وأمك مثلا متجوزين عن حب.. متفاهمين؟
منة: لا
وليد: عارفة أغلب خناقاتهم ليه؟!
منة: عشان أفكارهم مختلفة
وليد: أفكار إيه.. عشان مفيش فلوس
منة: لا طبعًا إنت سطحى جدًا
وليد: يا بنتى إنت رومانسية.. أبوكى وأمك بيحبوا بعض عشان كده لسه مع بعض.. لكن الخناق والشد كل يوم..
عشان الفلوس
منة: عايز تقول إيه؟
وليد: أنا بحب منار.. بس مقدرش اتجوز ومنار تطلب منى حاجة واتخانق عشان مفيش وطبعًا مش هقول مفيش عشان أنا مكسوف فهقول ده إسراف فهى هتتخنق منى فهتحس إنى مش بحبها
منة: يا ابن الإيه.. تصدق صح.. فعلا هو ده اللى أكيد بيحصل.. الجواز والمسئولية شىء معقد جدًا.
وليد: لذلك نبعد عن الشر ونغنى له!.