لن ننسى شهداءنا

أكد الرئيس عبدالفتاح السيسى أن التضحيات التى قدمها الشهداء كانت من أجل أمان واستقرار ومستقبل الدولة المصرية، قائلا خلال حضوره مراسم تخرج دفعة جديدة من طلاب كلية الشرطة بأكاديمية الشرطة بالقاهرة الجديدة.
«هبدأ كلمتى غير المخططة بكلمة لأسر الشهداء الأول.. كلامى ليهم كله احترام ومحبة.. احترام للعطاء اللى اتقدم لأجل خاطر بلدنا وشعبنا.. وعايز أقول لكل الأسر اللى موجودة معانا.. اوعى تفتكروا.. والكلام ده قولته قبل كده وبأكده.. الدماء اللى قُدمت والأرواح اللى راحت عند ربها، تمن بسيط.. ده فى رقبتنا إحنا وشعب مصر كله.. وعند ربنا سبحانه وتعالى..» متابعا: «كنتم سبب فى أن أبناءكم وأزواجكم يقدموا التضحية من أجل مصر.. بتكلم عن كل الشهداء من كل القطاعات.. هما السبب فى اللى إحنا فيه دلوقتى».

الرئيس يقلد أوائل الخريجين نوط الواجب

وتابع الرئيس: «اللى انتوا شايفينو ده.. ده تمن لأرواح أبناء مصر.. تمن غالى أوى.. التمن ده حماية وتأمين واستقرار أكثر من 100 مليون مش بس فى أمانهم وسلامهم.. ده حتى فى مستقبلهم.. ولو البلد كانت راحت مكنش هيكون فيه مستقبل لحد.. مش هقول متزعلوش ومش هقول متتألموش.. إحنا معاكم.. وقبل ما نبقى معاكم.. ربنا موجود معاكم.. خلى بالكم.. الشهيد عند ربنا حاجة جميلة أوى».
وشدد الرئيس، على مكانة الشهيد عند الله قائلا: «والله الشهيد عند ربنا حاجة جميلة أوى.. ربنا اللى بيعطيه وبيعوض عليه.. وعليكم.. علشان يمكن كمصريين مننساش.. آه الأمور الحمد لله رب العالمين.. اتحسنت كتير أوى بفضل الله سبحانه وتعالى».
وأكمل الرئيس: «كل التهديدات والإرهاب زالت بفضل الله وبفضل أبناء مصر من الشرطة والجيش وكل قطاعات الدولة؛ إحنا فى مكان كويس أوى.. ولسه.. مطلوب مننا نعمل أكثر من كده كمصريين.. عشان نقدم من جانبنا الوفاء لهذه الدماء.. مرة ثانية كل التحية والمحبة والاحترام والتقدير ليكم وأرواح الشهداء والمصابين وأسرهم.. وربنا يجازيكم خير الجزاء فيهم.. واحنا لن ننساكم أبدًا.. لن ننساكم أبدًا.. إن شاء الله».
وقال الرئيس: «يمكن رسالتى مختصرة لأبنائى الخريجين.. نهنئكم وبقولهم ألف مبروك.. ودى مرحلة جديدة فى حياتكم.. وزى ما بقول لنفسى ولكل المصريين، مصر أمانة فى رقبتنا كلنا.. أمانها وسلامها واستقرارها وتقدمها أمانة فى رقابنا كلنا..أرجو دائمًا أننا نكون عارفين إن المسئولية الملقاة على عاتق وزارة الداخلية كبيرة أوى.. لو قابلتنا مشكلة فى الشارع، نسأل نقول فين الشرطة، وحتى لما الأسعار تغلى نقول فين الشرطة وفين الرقابة.. دوركم مشهود من الناس كلها ومن مصر كلها.. ومصر كلها تقدر هذا الدور.. طالما يحترم إنسانية المواطنين ويحترم إنفاذ القانون».
وتابع الرئيس: «ودى النقطة اللى دايمًا بأكدها عليكم، إن إحنا عايزين وإحنا بنتعامل مع المواطنين فى مصر، دائمًا نكون منتبهين إن إحنا موجودين فى الشارع ونتعامل مع تحديات كتيرة.. فيه ممارسات واللى ماشى صح خلاص.. المشكلة اللى معاه أى مخالفة.. ترفق بيه وتعامله بأدائك الراقى، وأيضًا من خلال القدوة والممارسة.. أتمنى لكم التوفيق.. أنتم قلتم إن شعاركم، علم وأخلاق وواجب..فتسلحوا دائمًا بالعلم.. لا ينتهى العلم بالتخرج فقط أو بالدورات التى تحصلون عليها بعد ذلك.. بل احرصوا على التطور دائمًا».
ووجه الرئيس رسالة للمصريين: «اسمحوا لى أن أقول لكل المصريين.. اوعوا تتصورا أن فيه قطاع من قطاعات الدولة لم نعمل على تطويره.. بفضل الله نعمل على تطوير جميع القطاعات.. إحنا بنشتغل من غير ضوضاء.. ومش بنقول هنعمل هيكلة وإصلاح.. بنقوم بالدور ده.. عملية التطوير مستمرة لا تنتهى بمرحلة أو فترة زمنية محددة.. الدنيا بتغيير.. ولازم إحنا كمان نتطور.. التطوير لكل قطاعات الدولة بما فيها وزارة الداخلية، لكنه بيتعمل بشكل هادئ جدًا، والدولة كلها بتتحرك فى تطوير قدراتها وأدائها ولكن من غير ضوضاء».

مهارات قتالية متميزة للخريجين

وأنهى الرئيس كلمته: «واجبكم خلى بالكم تجاه بلدكم.. أمن وأمان مصر أمانة فى رقابتنا ورقابتكم.. أتمنى لكم كل التوفيق.. ألف مبروك.. خلى بالكم من نفسكم.. واحرصوا على العمل الطيب والأداء المتميز.. اللى منتظرينه منكم.. ألف مبروك».
وقدم خريجو وطلاب كلية الشرطة عرضًا بالدراجات الهوائية، وشكلوا من خلال هذا العروض علم مصر أمام الرئيس عبدالفتاح السيسى، كما قدَّم الطلاب عروضًا مختلفة، حيث تقدموا فى ساحة العرض نحو منتصف المنصة من أجل تقديم لوحة فنية مختلفة المهام.
وتم عرض تسجيل صوتى للرئيس عبدالفتاح السيسى أثناء نزول العلم من أعلى أحد الأبراج يؤكد فيه ضرورة حفظ الأمن والأمان للمواطنين بفضل جهاز شرطة وطنى واع ومدرك لطبيعة مهمته جيدًا.
وقال الرئيس خلال التسجيل الصوتى: «إن الغاية الأسمى للدولة، هى المحافظة على بقائها، وحفظ الأمن والأمان لمواطنيها، وهذا لن يتأتى، دون وجود جهاز شرطة وطنى، واع ومدرك لطبيعة مهمته جيدًا.
وأضاف الرئيس: «ولعل ما يقوم به أبناؤكم اليوم من رجال الشرطة، من حفظ أمن واستقرار الوطن، ومحاربة الإرهاب البغيض لهو خير دليل على أن معين هذه الأمة، لا ينضب أبدًا».

.. وإحدى الدارسات الأجانب

وعقب ذلك، شهد الرئيس، مراسم تسليم وتسلم القيادة بين طلاب أكاديمية الشرطة وأدى الرئيس والحاضرون التحية العسكرية لأرواح الشهداء على وقع موسيقى «سلام الشهيد»، ثم قلد الرئيس أوائل الخريجين من جميع فروع كلية الشرطة أنواط الامتياز؛ تقديرًا لهم على جهدهم خلال فترة الدراسة.