الرئيس السيسى: سنظل نحتفل بيوم الشهيد طول ما فيه رجالة بتقدم نفسها من أجل مصر

خلال كلمته فى الندوة التثقيفية ال 39 للقوات المسلحة بمناسبة يوم الشهيد

قدم الرئيس عبد الفتاح السيسى التحية للمشاركين فى الندوة التثقيفية ال 39 للقوات المسلحة بمناسبة يوم الشهيد، قائلًا: «أوجه لكم جميعا كل التحية والتقدير والاعتزاز وأقدم لكم التهنئة بحلول شهر رمضان.. كل سنة وأنتم جميعًا طيبين.. أقدم التهنئة للأشقاء المسيحيين على صيامهم وربنا يتقبل منا جميعًا».
وأضاف الرئيس السيسي: «فى كل سنة زى اليوم ده «يوم الشهيد».. أنا بقول بنحتفل طول ما فيه رجال بتقدم نفسها من أجل بلدنا مصر.. وتظل حرة آمنة سالمة.. كل سنة يبقى نحتفل على مرور سنة بخير علينا، جاء ذلك خلال الندوة التثقيفية التى تنظمها القوات المسلحة المصرية من إعداد وتجهيز إدارة الشئون المعنوية للقوات المسلحة.
وتحدث الرئيس عبدالفتاح السيسى عن الجنرال الذهبى الفريق الشهيد عبد المنعم رياض قائلًا: «الحقيقة الكلام اللى النهاردة اتعرض سواء استشهاد الفريق عبد المنعم رياض.. وفيه حاجة لضباطنا وطلاب الكلية العسكرية.. وكان فيه يوميات عن حياة الشهيد عبد المنعم رياض.. عن مراحل حياته.. لما راح مكتبه لاقى مجهزين مكتب كويس أوي.. قال عاوز حاجة بسيطة بس «ترابيزة بس» وشيلوا السجادة دي.. توقفت جدًا قدام الإجراء ده.. الاستقامة والزهد فى الدنيا هو طريق الخير الكبير أوى للناس». وأضاف الرئيس خلال كلمته فى الندوة التثقيفية ال 39 للقوات المسلحة بمناسبة يوم الشهيد: «أنا بقول الكلام ده لنفسى ولكل الموجودين.. الفريق عبد المنعم استشهد.. ودى كانت مقدمات وأن المسار والطريقة دى والنفس دا أكيد هيبقى معها خير عظيم وتنتهى أن يستشهد وياخد لقب شهيد.. نفضل كل سنة نحتفل ونتكلم عنه ونقدر مساره».
قال الرئيس عبد الفتاح السيسي: إن الوضع داخل الدولة المصرية فى تحسن، متابعًا: «أنا بتكلم إن الأمور بدأت بفضل الله سبحانه وتعالى تتحسن.. بقول الكلام ده علشان أسجل موقفى أنا ليكم كلكم.. أنا ما غامرتش بيكم.. وما أخدتش قرار أضيع فيه مصر.. ولا أنا ولا الحكومة.. ما كنشى فيه مغامرة.. لا علشان خاطر هوى أو فهم خاطئ أو تقدير منقوص.. فخدنا قرار ودخلنكم فى الحيط وضعينا مصر.
وأضاف الرئيس السيسي، خلال كلمته فى الندوة التثقيفية ال 39 للقوات المسلحة بمناسبة يوم الشهيد: «خلى بالكم.. احنا مش فسدة وما خدناش أموالكم وضيعناها بفساد أو بدلع.. لا محصلشي.. كل حاجة اتعملت على أرض مصر أى حد يشوفها.. الكلام ده مهم وده تسجيل من إنسان انتوا اخترتوا وقولتوا تعالى اتولى المسئولية.. وأنا قولت لكم «تعالوا نتولى المسئولية».
أكد الرئيس عبد الفتاح السيسي، أنه كان حريصا على التحدث مع المصريين منذ اليوم الأول من ترشحه عن حقيقة الوضع داخل البلاد، متابعًا: «مش قولتلكم أبدًا «أنا لها واخلصكم».. هاتوا كل كلامى من الأول أثناء الترشح.. هتلاقوا الكلام مش بيتغير لأن التوصيف مبيتغريش.. لظروف حلها الوحيد احنا.. وقولت قبل كده 100 مرة العمل والصبر.. عمرى ما عاتبت حد وقولت يعنى وعدتني.. وعدتنا نبقى مع بعض كلنا مش احنا اللى عملناها.. الظروف دى غصب عنا».
وأضاف الرئيس السيسي، خلال كلمته فى الندوة التثقيفية للقوات المسلحة بمناسبة يوم الشهيد: «طب الأيام اللى فاتت دى حد قال عندكم أقوى جيش.. ما تيلّا بقى.. مش سمعتوا الكلام ده.. بكلم كل المصريين مش بكلم الجيش.. بكلم كل المصريين.. بكلم الناس.. مش الجيش ولا الشرطة .. بنتحمل ونساعد على قد ما نقدر الحفاظ على بلدنا.. نفس الكلام مع الاتجاه الجنوبى .. بنكون عامل استقرار وسلام ولا نشعل أبدا حرائق هنا ولا هنا.. ونفس الكلام فى الاتجاه التاني».
وتابع الرئيس السيسي: «ما حدش بيقول دلوقتى ليه المساعدات بتدخل قطاع غزة من خلال إسقاط جوى مش من المعابر.. قولتلكم من الأول.. المعبر مش بيتقفل.. علشان الشمال بعيد وفيه تحديات فى دخول المساعدات من المعبر.. فيه معبر احنا مسئولين عنه.. فيه 10 – 12 مليار دولار خرجوا من البلد علشان المسئولين فى الدولة خدوهم.. لا محصلشى وميحصلشى بفضل الله.. كل الجهد والإمكانيات جوه البلد دي.. مش عاوز أسيء لحد قبل كده.. بعتبر دى من صفات طيبة.. والله العظيم بحلف بالله والله العظيم انا ما لقيت بلد.. أنا لقيت أى حاجة.. وقالولى خد دي»..
وتابع الرئيس السيسي: احنا إمكانياتنا مش كتير أوي.. احنا قاعدين على 6% وبقينا نتكلم فى 10 – 12%.. كانوا 6%.. من أسوان إلى الإسكندرية.. لما البلد صعبة علينا فى كل شيء».
وقال الرئيس عبدالفتاح السيسي: إن حرب 67 و73 وحتى الحرب الأخيرة اللى قعدنا فيها 10 سنين «محاربة الإرهاب» اللى هى كنا بنجابه فيها فكر منحرف متطرف استباح دمنا ومستقبلنا، أنه يخرب بلدنا زى ما دول كتير اتخربت وزى ما دول كتير راحت وكان متصور انه ممكن يعمل كده، وبرضه بإخلاص ودماء أبنائنا سواء اللى استشهدوا أو اللى أصيبوا، بكرر الكلام ده كتير علشان يبقى دايمًا فاكرين ومننساش انه فيه تمن اتدفع فى البلد دى علشان تستمر وعلشان تبقى آمنة وتستمر، واللى اتعمل فى رقابتنا كلنا والحفاظ عليها، والعمل أنها تطور وتطلع لقدام، ده ضريبة لازم ندفعها كلنا».
تطرق الرئيس عبدالفتاح السيسى للأزمة الاقتصادية، قائلًا: «الأزمة الكبيرة اللى احنا عشناها بقالنا أكتر من 4 سنين، كورونا والحرب الروسية ثم غزة فى شهرها الخامس، تهديد وتحدى كبير لينا كمصريين ولمنطقتنا، وبقول كده علشان الظروف اللى فاتت، والضغط اللى اتحمله المصريين خلال 4 سنين، وزاد فى السنة الأخيرة والأسعار زادت أكتر بقول الكلام ده علشان أطيب الخواطر أو كلام بقوله للناس فى مصر علشان يستحملوا أكثر أو يبذلوا جهد أكبر أو علشان يخلوا بالهم من بلدهم أكتر».
وأضاف الرئيس السيسى خلال احتفالية يوم الشهيد: «هو كل حاجة 106 ملايين وعدد كبير 9 ملايين ضيف موجودين معانا هنا، وزى ما انتوا شوفتوا فى منطقتنا حوالينا من كل حتة، وبحاول ما أقولش كلام يزعل أى دولة، تحديات ومشاكل ليها آثار وتأثير علينا واحنا دولة مقوماتها مش كتير، بس بفكركم أن 10 سنين قتال ليهم تكلفة وقبل منهم 2011 ليها تكلفة وبعد منهم 2013 ليها تكلفة، التكلفة دى ما حدش لوحده يقدر يشيلها لا أنا لوحدى ولا الحكومة لوحدها لكن نقدر كلنا، بفهمنا ما حدش يعتبر نفسه بعيد ويوجه لنا الكلام».
قال الرئيس عبدالفتاح السيسي: إن توفر الأموال التى حصلت عليها مصر مؤخرا يسهم فى تطبيق سعر مرن، مضيفًا: «لما يبقى الرقم ده عندى أعمل سعر مرن طبقا للطلب يبقى ممكن أنجح، لكن غير كده كان ممكن يكون فيه مشكلة كبيرة فى مصر، وهل عاتبت رجال أعمال وناس كتير فى مصر الدولار، وراهنوا عليه ولا ياخدوه ولا كده، هل عاتبت حد؟، هل عاتبت ناس جابت البضائع وسعرت على أن الدولار ب 70 أو 80، ولا قولت للحكومة حاولوا تنظموا الموضوع من خلال أجهزة الدولة المختلفة».
وأضاف الرئيس السيسي: «هل أخذت إجراء ضد أى أحد؟، ممكن حد يقولى ما عملتش إجراء حاد ضد حد ليه؟، ممكن حد يقولى كده، يعنى نبقى فى أزمة زى دى وكمان نعمل إجراءات ممكن تعقد الأمر أكثر من اللازم ولا نحاول نحل المسألة، ونتعب كلنا شوية، أنا بقول ما عاتبتش حد علشان أيه؟ .. أوعوا تدوا ضهركوا لبلدكم كلكوا .. الكلام اللى هقولوا غريب قوي.. ده هما يومين هنقعدهم على وش الدنيا وهنمشى.. اللى جمعته بالحلال نفعك، واللى جمعته بحاجة تانية هيبقى نار عليك، إذا كنت بتؤمن أنه فيه حساب؟، والكون ليه صاحب وجابنا وبيختبرنا، ما قولتش لناس وحتى المسئولة عن الوعى الدينى الناس ما تكملتش فى حرمانية أى سلوك من السلوك دى، ده مع الوضع فى الاعتباء إن الأمور فى الدول مش بالأخلاقيات والضمائر، ولكن بالأنظمة والقوانين، لكن حتى النقطة دى غايبة عننا مش عارفين إيه الحلال وإيه الحرام اللى بنعمله؟ مش بكلم كل الناس، رغم أن فيه كتير مننا ما يخدوش بالهم، تصوروا لو أنا هكسب نتيجة اللى أنا بعمله، والبلد دى ليها رب يحل المسألة ولا أى يوم من اللى فات وما كنش فيه شك واسألوا الحكومة».
وتابع الرئيس السيسى خلال احتفالية يوم الشهيد: كان لازم أقول الكلمتين مش علشان أقوم حجة وبعضهم تصوروا أن لما ننجح كلنا نطلع بصدرنا ولما يحصل مشكلة ندّارى ..لا .. أنا إن شاء الله ما بدّراش أبدا لا لا.. أنا بعمل أقصى ما فيه عندى أن وفقت فبفضل الله، وأن ما وفقتش العيب عندى وأتحمل المسئولية أمام الله».
وأكد الرئيس عبدالفتاح السيسي، أن الدولة تحركت فى مسار الإصلاح والبناء والتنمية، متابعًا: «كان ممكن ما نمشيش فى المسار ده.. ويبقى هو اللى موجود أو نبقى نتحرك بفعالية وقوة ويمكن نعاني.
وأضاف الرئيس السيسي، كنت قاعد مرة مع الزملاء.. قولت أنا عملتها خلاص ونتعب كلنا.. خليت بلد قادرة على أنها تبقى بلد.. من 8 - 10 شهور لما اتكلمت عن التعويم.. قولت أقف قدام هذا الأمر يمس الأمن القومي.. ما نقدرشى نعمل كده من غير رقم معتبر من الأول نقدر ننظم بها السوق ده لما نسيبه كده.. كنا ممكن نتكلم عن أرقام ضخمة جدا.. 80 و90 كسعر للدولار أمام الجنيه.. ودلوقتى بنتلكم عن رقم تقريبى 45 – 50 مليار دولار داخل الدولة بين الرقم بتاع المشروع الخاص رأس الحكمة والاتفاق مع الصندوق.. والاتحاد الأوروبى وأى أمور أخرى».
وواصل الرئيس السيسي: « انتوا مش مصدقين اللى حصل فى مصر ده ميحلصشي.. نسيتوا مع الوقت اللى حصل.. كل واحد مشغول بحياته.. القائمون على الأمر كانوا شايفين كل طوبة وهى بتتبنى وكل مصنع».
وتابع: «تفتكروا إن حل الأزمة وبلد تاخد مكانها وسط الأمم فى 10 سنين.. طب أقول ايه للمفكرين والمثقفين ورجال الإعلام إن الدول بتاخد 75 سنة علشان تبقى دول ذات شأن.. الكلام ده موجود فى الدنيا ومش أسرار».
وأضاف الرئيس: لما بقول كده مش معنى كده أن أتمنى ذلك.. ولكن فيه دول عاشت سنين مقدرشى أذكرها.. عاشت فى مجاعات من 52 ل 68.. 45 مليون مش قاموا هدوا البلاد اللى ماتوا من الجوع.. بس النهاردة بقوا فى حتة تانية خالص.. يا ترى الكلام ده بقولوا ليه.. عمرى ما وعدتكم أن الموضوع هيخلص فى سنة ولا 2 ولا 10.. طب انت زعلان من حاجة أو زعلانين.. لازم الكلام يتقال لما الأمور تتحسن علشان ناخد الدرس.. علشان نتعلم وتبقى ذخيرة للقادم.
وقال الرئيس: كنت طالبت من المؤسسات تعمل تكلفة الإعمار فى غزة.. 90 مليار دولار تكلفة الإعمار فى غزة. علشان ترجع البنية الأساسية لغزة وتبقى ممكن الناس تعيش فيها.. كان ممكن حد يقولى كنت خدت ال 2 مليون عندك فى مصر فى سيناء ما الأرض كبيرة والأمور هتتحل يعني.. بقى اللى انتوا شايفين دمهم دول.. ممكن نخونهم ولا إيه.. لا يمكن أن نفرط فى حقهم وأرضهم.
واستطرد الرئيس عبدالفتاح السيسى حديثه قائلًا: شعب مصر العظيم، أتحدث إليكم اليوم فى ذكرى يوم الشهيد يوم الأبطال، الذين خرجوا من نبت هذه الأرض الطيبة، فحملوا الأمانة برأس شامخة، وقابلوا ربهم بنفس راضية، وتركوا لنا مع آلام الفراق فخرًا ومجدًا، سيظل محفورًا وخالدًا فى ذاكرة أمتنا.
أضاف الرئيس السيسي: إن صفحات تاريخ هذا الوطن زاخرة بأيام تشهد على قصة كفاح الشعب المصرى المليئة بالتضحيات والبطولات، التى أضاءت مشاعل النور، وألهبت مشاعر الوطنية، وحطمت صخور اليأس، ومهدت دروب الأمل، وخلدت أسماءها فى سجلات الشرف إنهم شهداء مصر وبريق ضيائها.
وواصل الرئيس: وسيبقى هؤلاء الشهداء فى وجدان أمتنا، محل تقدير واحترام الضمير الوطني، ودليلًا قاطعًا على أن حب الأوطان ليس شعارات ترفع أو عبارات تنطق، وإنما تضحيات حقيقية، عرق وجهد ودماء، ثمنًا لصون مصر وأمنها واستقرارها وتقدمها.
كما قدم الرئيس التحية إلى القوات المسلحة، قائلًا: تحية تقدير واحترام من شعب مصر العظيم، إلى رجال القوات المسلحة البواسل، الذين يحملون على عاتقهم بكل عزيمة وإصرار وشجاعة، حماية مقدرات ومكتسبات الوطن جنبًا إلى جنب مع رجال الشرطة الأشداء، المخلصين فى حفظ أمن مصر والمتسلحين جميعًا بالولاء لهذا الوطن العظيم.
وأكمل: شعب مصر الأبى الكريم، سيحكى التاريخ يومًا، كيف كان العبور بمصر وشعبها من حافة الخطر والفوضى والضياع، إلى بر السلامة والأمان والاستقرار صعبًا وقاسيًا، كم كان الثمن المدفوع من دماء أبنائنا غاليًا وعزيزًا، وكم كان حجم العمل والصبر والجلد وإنكار الذات، كبيرًا فوق التصور.
واستطرد الرئيس: «التاريخ سيتوقف طويلًا أمام معجزة كبرى حققها المصريون، خلال السنوات الماضية، حيث أنقذوا وطنهم العريق من السقوط فى براثن الإرهاب وجماعات الشر والتطرف، وصمدوا فى وجه إعصار التمزق والانهيار والفوضى الذى ضرب جميع أرجاء الإقليم الذى نحيا فيه، وفى ذات الوقت شيدوا وعمروا بلادهم ووضعوا أساسًا لاقتصاد وطني، قادرًا على التصدى للأزمات، ولن يمضى وقت طويل بإذن الله حتى ينعم المصريون بحصاد جهدهم واستثمارهم فى مستقبل هذا الوطن.
أكد الرئيس أن العالم يشهد منذ شهور مأساة كبرى بجوارنا فى فلسطين العزيزة، حيث يسقط آلاف الشهداء فى قطاع غزة، ويتعرض الأحياء منهم لمعاناة إنسانية غير مسبوقة، نبذل أقصى ما نستطيع من جهد وطاقة لحمايتهم وإغاثتهم، عن طريق وقف إطلاق النار وإنفاذ المساعدات لهم، ونتوجه اليوم إلى الشعب الفلسطينى كله، المرابط على أرضه، والصامد فوق ترابها، بتحية تقدير وإجلال ونقول لهم: «إن مصابكم مصابنا، وألمكم ألمنا، وإن مصر لن تتوانى عن مواصلة العمل لوقف إطلاق النار وإدخال المساعدات وإغاثة المنكوبين من هذه الكارثة الهائلة، ولن تتوقف مصر عن العمل مهما كان الثمن، من أجل حصول الشعب الفلسطينى الشقيق على حقوقه المشروعة فى دولته المستقلة».
وفى نهاية كلمته وجه الرئيس تحية خاصة إلى أسر الشهداء، وإلى الأب المحتسب، والأم المكلومة، والزوجة الصابرة، والابن والابنة الصامدين، لكم جميعًا تحيات وتقدير شعب مصر على تضحياتكم العظيمة، متعهدين لكم بأن تظلوا أمانة فى أعناقنا، فمصر كلها، أهلكم وشهداؤكم، أبناؤنا جميعًا هم رمز فخرنا، ومبعث عزتنا.
2
3