واحة الإبداع.. عصافير الجنه

يسيل بجوار النيل فى بر مصر نهر آخر من الإبداع.. يشق مجراه بالكلمات عبر السنين.. تنتقل فنونه عبر الأجيال والأنجال.. فى سلسلة لم تنقطع.. وكأن كل جيل يودع سره فى الآخر.. ناشرا السحر الحلال.. والحكمة فى أجمل أثوابها.. فى هذه الصفحة نجمع شذرات من هذا السحر.. من الشعر.. سيد فنون القول.. ومن القصص القصيرة.. بعوالمها وطلاسمها.. تجرى الكلمات على ألسنة شابة موهوبة.. تتلمس طريقها بين الحارات والأزقة.. تطرق أبواب العشاق والمريدين. إن كنت تمتلك موهبة الكتابة والإبداع.. شارك مع فريق «روزاليوسف» فى تحرير هذه الصفحة بإرسال مشاركتك من قصائد أو قصص قصيرة «على ألا تتعدى 055 كلمة» على الإيميل التالى:
[email protected]
اللوحات بريشة الفنان عماد إبراهيم
عصافير الجنه
كتب: على أبوسراج
عصافير الجنّه الرجاله
إمبارح .. كسروا الحصّاله
علشان الغاليه ام الدنيا
ما تمدّش إيدها تكون عاله
تصقيفه لعصافير الجنه
والإيد الصّاحيه الشّغاله
كف العصافير.. كتّر خيره
صبّح بجنيه ومسّى بغيره
قطر اكسبريس عارف سيره
وعارفها كبيره و حمّاله
تصقيفه لعصافير الجنه
والإيد الصّاحيه الشّغاله
الفرحه يا ناس مش سايعانى
والدنيا اهى شايفه و سامعانى
وكتبت الغنوه دى بالعانى
وقلوبكم مش عايزه قواله
تصقيفه لعصافير الجنه
والإيد الصّاحيه الشّغاله
الشمس بتطرح .. مزيكا
والحزن مسحته بأستيكه
مصرنا أحسن من أمريكا
وقلوبنا لعشقها مياله
تصقيفه لعصافير الجنه
والإيد الصّاحيه الشّغاله
الشّاشه بتكدب.. غشّاشه
دا العتمه بتمشى وتتلاشى
والدنيا.. ميت فل «بغاشه»
والناس «اياهم» هوّاله
تصقيفه لعصافير الجنه
والإيد الصّاحيه الشّغاله
عصافير الجنه الرجاله
إمبارح.. كسروا الحصاله