سطر الهجرة

قصيدة: وائل فتحى
علي سبيل البساطة
ولد.. وبنت
- شبه نشيد المدرسة بكل آلاته البسيطة
والعزف البسيط-
علي طرف تل أخضر
ممكن يشاوروا ف وقت واحد.. للسما
علي نجمة واحدة..قربت تلمس، نهاية نهر خارج.. من تحت رجليهم يضحكولها.. تضحكلهم..
-لكن بحكم الطبيعة والظروف والتاريخ-
..ولد وبنت
-شبه نشيد المدرسة- برده ذ
علي طرف أخضر هزيل،
فاصل مابين أسفلت رايح وجاي،
ممكن..
يشاوروا ل فوق...
تقوله :- "ف السما"
-وكأنها ردت عليه من غير ما يسأل-
ويقول :- "ف السما" ذ من غير ماتسأل-
ولد وبنت ..علي سبيل البساطة
-"ف السما"-
كان وش أب بيبتسم و بيعتذر عن موت مفاجئ
ف تشاور سلام .. من غير ملامة..
-"ف السما"-
كان برده نفس الوش تقريبا.. وتقريبا قادر يبتسم
و بيوعده برجوع مفاجئ
ف يشاور سلام .. من غير ملامة..
الفرق بينهم مش بسيط..
الفرق بينهم مش مهم..
هما في الأخر يتامي .
...
كان شيخ حكيم قالّي...
-و دايماً ييجي (شيخ) بهيئته المعروفة ف الحواديت
أو زي ما اتعودنا نحلم: أبيض ف أبيض،شاهق من الحكمة
نُص الملامح نور و النُص طاقة شفا..
بيلخص الهاجس واللي حصل والمعرفة
و بيمنح الفرصة ل شاعر يضرب مثل -
قالي:-
"للأرض ريحة عيالها..
وللمكان نَفَس اللي عايشين جوا منه.."
قاطعته بسكوت مستفز لشيخ ف هيبته وهيئته
وسمحتله بغياب مؤقت من خيالي
علشان أقول:-
الهجرة بتوسع مساحة في البيوت
ل شروخ شبه ..قطاع طرق
وشروخ مهاجرة من بلاد الجن ذ مطاريد-
وشروخ يتامي ..لاجئين..شبه الغلابة
الهجرة منحتهم: كامل حقوق الإقامة، وأمنتهم جوع.
حَكِم الشروخ.. زي البشر.. ياكلوا ف ريحة الأرض
ويبخوا ف جناب المكان.. ريحة نفسهم
أو .. طبع الشروخ.. بيطردوا ذكري المكان
م المكان..
....
كان للمكان والزمن
ريحة حمام زاجل..
عدت مواسم طيارات ع الحي..
لمت عيون الحي، و بعترت جوابات..
بكت الحريم من فوق..
ندبت بحرقة شوق.. علي بختها المايل..
يمكن بحكم الزمن ..
مابيخبزوش في الفجر عيش، أو حتي دعوة للعيال
مابيجرحوش في الليل خيالهم بالحواديت و الحكاوي..
لكن بحكم المثل..
بيأمنوا للميه اللي في الغربال
و بيحلفوا.. علي ضل حيط..واقع:-
"كل اللي غاب راجع، والرزق حجة غيابه"
"راجع" .. بكامل هيئته زي الصور
علي حيطة باشت.. من كام شتا
"راجع" بأمارة الوعد اللي يشبه خطوته
يشبه ملامحه/خبطته ..ع الباب،
يشبه ولد من صلبه..كان يجري ف شوارع ميتة
و يحدّف البلح اللي طارح في الهوا
النخل.. سابه في الهوا
سابه أمانة للحنين..قبل ما يهاجر زمان..
علشان ماينساش الطريق..و ماينساهوش المكان..
...
كل اللي هاجروا ف شمس واحدة
عرفوا بأن الزمن..عمره ما كان واحد،
عرفوا بأن الشمس مش واحدة..
لون جلدهم..بيفرّق التوقيت محلياً..و بيفرّق عليهم :
طبعهم/حجم الأغاني العاطفية/ وزن الأغاني السريعة/
وحصة المواويل..
حسب اختلاف الذاكرة.. والذكريات،
بيفرّق الإنسان..محلياً
وبيدي فرصة لكل واحد منّهم
يمشي..علي راسه شمس..بتشبه -وحده-
ف يوم كأنه الحشر
-حيث الفراق واجب لكل واحد منّهم-
حيث مال منّهم ،
علي صد أمه،أبوه/
علي كتف من خرجت من الضلع الشمال
أو علي اكتاف العيال..
وقال:- راحل بأمر الله..وأرض الله هناك واسعة
ردوا ف نفس واحد:-
ربك هنا واحد..
ربك هناك واحد..
الأرض مش واحدة...