«ليلة الجمعة» تنفرد بالحوار مع «أم غريب»:اللي اتلسع من الشوربة ينفخ في الزبادي «ام غريب» سيدة مصرية علي باب الله تجلس علي قارعة الطريق تبيع بعض الخضروات تسألها عن أي شيء في السياسة تجيبك ببساطة.. وبدون تفكير.. ولكنها تمتلك بفطرتها فلسفة شعبية رائعة تؤكد أن فهمها لمعركة الرئاسة أشد عمقًا من تفكير عدد كبير من النخبة السياسية والثورية والثقافية.. إنها «ام غريب» المصرية الرائعة التي تحمل بداخلها عبق تاريخ مصر وفلسفتها الشعبية. ■ إزيك يا أم غريب. أهلاً بيك يا ابني. ■ إحنا من جريدة «روزاليوسف» من صفحة «ليلة الجمعة» وماله يا ابني جمعة سبت حد.. أهي كلها أيام ربنا. ■ أنت إيه رأيك في انتخابات الرئاسة يا أم غريب؟ يا ابني عايزين نخلص علشان نرتاح والشباب يشوف مصلحته.. والناس تدور علي رزقها. ■ يعني انت موافقة علي الإعادة بين الفريق شفيق والدكتور مرسي؟ موافقة.. وافرض مش موافقة يعني الانتخابات ح تقف علي.. ما هي برضة كده ح تتعمل.. وكده ح نتعمل. ■ طيب فيه ناس بتقول علشان الديمقراطية تبقي سليمة لازم نقاطع انتخابات الإعادة. وهي الديمقراطية دي صينية بسبوسة نأكل منها حته.. وبعد كده نيجي في الآخر نقول الحتة دي محروقة مش عايزينها؟! ■ انتي فاهمة كده إن الديمقراطية مش صينية بسبوسة؟ يا ابني أنا معرفش أصلاً يعني إيه ديمقراطية دي اللي بتقول عليها.. بس مادام الناس كلها وافقت علي الانتخابات من الأول يبقي لازم يكملوا للآخر، ما ينفعش نمشي علي سطر ونسيب سطر.. واللي يعجبنا نمشيه.. ولا مش علي مزاجنا نعطله.. ده اسمه وقف حال.. واحنا مش ناقصين وقف حال.. كفاية بقي. ■ طيب يعني أنت ح تنتخبي؟ طبعًا ■ علشان ما تدفعيش الغرامة.. ولا عايزة نقولي صوتك وتشاركي في الانتخابات؟! لأ.. علشان لازم أشارك وأقول كلمتي. ■ وانتي ح تنتخبي الإخوان ولا الفلول؟ فلول إيه إخوان إيه.. أنا بحبش الكلام ده اللي بيقولوه في التليفزيون طول النهار. ■ أمال بتحبي إيه؟ يا ابني كلنا مصريين.. الفلول مصريين والإخوان مصريين.. بس الاتنين طماعين عايزين ياخدوا كل حاجة. ■ يعني معني كده إنك ح تقاطعي .. ومش عايزة الاتنين لأ.. أنا مش ح أقاطع.. بس قضي أخف من قضي. ■ ومين القضي الأخف؟ يا ابني ما تخلينيش أغلط في حد أنا ست أرزقية علي باب الله. ■ اتكلمي براحتك يا أم غريب قولي اللي نفسك ولا يمهك. شوف يا ابني اللي اتلسع من الشوربة ينفخ في الزبادي.. وأنا جولي أمات دقون وادوني سكر وزيت ورز وانتخبتهم.. لكن طلعوا كدابين ومعملوش ولا حاجة.. قلت لهم عايزة كشك صغير أحط فيه البضاعة مفيش فايدة.. قالوا ممعاناش والراجل أبو مناخير كبيرة اللي اسمه البلكيمي ضحك علي الحكومة وعلي المجلس وقال الحرامية طلعوا علي وقلبوني وأخدوا 100 ألف جنيه وضربوني وكسروا مناخيري.. وكل الكلام ده طلع كذب يبقي أنا مش ح اتلسع تاني من الإخوان أمات دقون. ■ يعني ح تنتخبي الفلول؟ ما هم برضو التانيين جبارين وعملوا فينا عمايل.. ونهبوا البلد قبل كده وباعوها برخص التراب. ■ طب يعني انت ح تنتخبي ولا لأ؟ ح انتخب طبعًا. ■ ح تنتخبي مين؟ - بصراحة أنا ح أقولها لك علي المتغطي والحدق يفهم بقي. ■ اتفضلي قولي علي المتغطي ما يضرش. الدقون لو مسكوا البلد مش ح يسيبوها ولا بالطبل البلدي.. والفلول لو مسكوا مقدور عليهم. ■ مش فاهم برضه.. يعني ح تنتخبي مين بالظبط؟ بص يا ابني .. يعني لو فيه قدامك «زفت» و «طين» ومجبر تمسك حاجة منهم.. ح تمسك إيه؟ ■.. إيه.. قول انت بقي؟ ح امسك الطين طبعًا. ■ ليه؟ يا ابني افهم بقي غلبتني.. الطين بيتغسل .. ح تحط إيدك تحت الحنفية وتنزل عليه ميه خلاص.. لكن الزفت مش حيطلع من إيدك .. إلا بالبنزين والجاز.. وابقي قابلني لو طلع.. يعني من الآخر الطين بيتغسل لكن الزقت بيلزق في الإيد وما بيطلعش ولا بالطبل البلدي. رئيس بالصدفة المشهد الأول والأخير (ليل داخلي) المرشد العام يجلس مع مكتب الإرشاد العام وعن يمينه خيرت الشاطر.. وعن يساره محمد مرسي والجميع في حالة صمت تام إلي أن يتحدث في النهاية المرشد العام. المرشد: إذا كان الشاطر اترفض ترشحه يبقي لازم حد من البدلاء ينزل بداله. الشاطر: أنت عارف يا مولانا أنا ماليش مثيل ولا قرين ولا نظير. المرشد: ولكن ليك استبن. الشاطر: ولا حتي استبن. المرشد: يعني إيه؟! الشاطر: أنا معترض علي استخدام كلمة استبن. مرسي: وأنا كمان معترض علي كلمة استبن. المرشد: وأين السمع والطاعة في قانون الجماعة؟! الشاطر: معاذ الله.. السمع والطاعة متوافرة والحمد لله.. ولكن كل ما نرجوه استبدال كلمة (الاستبن) ب (البدلاء). المرشد: إذا كان الأمر كذلك فلا مانع لدينا.. فلنستخدم.. كلمة (المرشح) و(المرشح البديل). مرسي: في هذه الحالة نود أن نعرف يا مولانا من هم البدلاء؟ المرشد: أنت لست منهم يا مرسي.. نريد وجها جديدا فأنت رئيس الحزب ولا يصح أن تصبح رئيسا لمصر.. ورئيسا للحزب. مرسي: لا تبالغ ياسيدي المرشد فأنت رئيس الحزب.. ورئيس مجلس الشعب.. ورئيس مجلس الشوري.. ورئيس الجمعية التأسيسية.. ورئيس عموم نقابات مصر.. ونحن ما علينا سوي السمع والطاعة يا سيدي. المرشد: بارك الله فيك يا بني.. والآن علينا أن نختار البدلاء.. علي ألا يكون البديل عليه أحكام قضائية.. وأن تكون أمه مصرية مية في المية وأن يكون أدي الخدمة العسكرية.. وأن يكون مضي عليه في الجماعة أكثر من عشرين عاما هجرية. الشاطر: وأرجو ياسيدي أن نضيف شرطا أساسيا. المرشد: وما هو؟ الشاطر: أن يتمتع بشعبية جماهيرية واسعة ومحبوب من جميع فئات الشعب المصري. المرشد: مثل من تقصد؟ الشاطر: مثلي أنا!! المرشد: وهل تعتقد يا باشمهندس أنك تتمتع بشعبية جماهيرية.. وأنك ستنجح بشعبيتك وجماهيريتك؟ الشاطر: سأنجح بمشيئة الله ورضاكم عنا ياسيدي.. ولكن الشعبية مطلوبة. المرشد: اسمح لي أقولك إنك حسبتها غلط.. أنا لو رشحت أي واحد من الجماعة.. وطلبت من أعضاء الجماعة أن ينتخبوه ويحتشدوا وراءه سينجح بإذن الله. الشاطر: حتي لو كان ليس لديه شعبية أو جماهيرية. المرشد: حتي إن لم يكن له شعبية أو جماهيرية؟! الشاطر: مثل من يا سيدي. المرشد: مثل الأخ محمد مرسي.. فهو ليس له شعبية وغير معروف للشعب المصري ولكن بتطبيق قاعدة السمع والطاعة سيكون من الناجحين. الشاطر: هذا معناه أن في حالة نجاحه سيكون رئيسا بالصدفة. المرشد: أي نعم.. ولكي أثبت لكم أن هذه النظرية صحيحة مية في المية.. لقد قررت أن يكون أول البدلاء لك يا أخ خيرت هو الأخ محمد مرسي. مرسي: أشكر ثقتكم الغالية يامولانا شكرًا.. شكرًا.. (يقبل يد المرشد). المرشد: اذهب يا مرسي.. فأنت رئيس لمصر. الشاطر: بذلك سيكون رئيسا بالصدفة فأنا من يستحق الرئاسة وأنا لدي مشروع للنهضة. المرشد: المشروع ملك للجماعة كلها.. وبعد نجاح مرسي.. ستكون مصر كلها ملكا للجماعة.. وسيكون مرسي أول رئيس لمصر يأتي بالصدفة لخلو مقعد الرئاسة بعد انسحاب الشاطر (نهاية) مساااااااء الفل ■ إذا كان شفيق سيعيد الأمن والأمان للشارع المصري في 48 ساعة. ■ وإذا كان مرسي أعلن أن فرض الحجاب علي البنات والنساء مخالف للشريعة. ■ فمن الأفضل أن نطيل فترة الدعاية الانتخابية عدة أسابيع ربما نحصل علي تصريحات تقول: ■ إن إعادة الأمن للشارع المصري في 60 دقيقة. ■ وإن لبس المايوهات البكيني علي البلاجات جائز شرعًا للأجنبيات.. ومكروه للمصريات. ■ وإذا كان شفيق أعلن أن يده ممدودة لكل المصريين وأنه علي استعداد لأن يتعاون مع حمدين وأبوالفتوح ومرسي. ■ فإن مرسي رد عليه قائلاً أنه علي استعداد أن يعين نائبًا قبطيًا له.. ورئيس وزراء ليس من حزب الحرية والعدالة. ■ لذلك نحن نقترح علي الائتلافات الثورية أن تطرح شعارًا جديدًا للمرحلة الجديدة يقول: «أبوها راضي وأنا راضي.. وأنت مالك أنت يا قاضي». ■ وإذا كان شفيق قد أعلن أنه سيكون رئيسًا لكل المصريين. ■ ومرسي رد عليه قائلاً: وأنا كمان رئيس لكل المصريين. ■ معني كده إن الجماعة المعتصمين في التحرير يبقوا من نيروبي!! حكمة 3D
■ قال حكيم صيني: إذا كان أمامك طريقان لا ثالث لهما: طريق يؤدي إلي موت أكيد.. وطريق يفضي بك إلي موت محتمل.. فليست بطولة أن تختار الموت الأكيد0 ومن الذكاء أن تختار الموت المحتمل. ■ وقال حكيم مصري: إذا كان أمامك مرشح من الفلول يعدك بدولة مدنية.. ومرشح من دولة المرشد يعدك بدولة إخوانية. فليست بطولة أن تلقي بنفسك إلي التهلكة. ومن الذكاء أن تختار الدولة المدنية حتي.. وإن كان صاحب الدعوة لها من الفلول. ■ وقال مواطن صالح: لو انتخبت رئيسًا ينتمي للفلول فعلي أسوأ الفروض فإنه سيعيدنا للوراء عام ونصف العام أي ما قبل 25 يناير 2011. ولو انتخبت رئيسًا ينتمي لدولة المرشد فمن المؤكد أنه سيعيدنا للوراء ألف عاماً أي ما قبل التاريخ.
