اتحاد المصارعة يوقف «بغدودة» ووالده: ابني مخدش ولا جنيه من سنة

استنكر فؤاد بغدودة والد لاعب منتخب مصر للمصارعة الرومانية أحمد فؤاد بغدودة تصريحات مسؤولي اتحاد المصارعة التي أطلقوها في الأيام الماضية بشان نجله وهروبه من معسكر منتخب مصر في تونس.
وقال والد بغدودة في تصريحات تليفزيونية: «منعرفش أي حد في فرنسا عشان يسافر لهم ابني هناك، أنا راجل فقير على قدي شغال على توكتوك لا أعرف حد في فرنسا ولا في حتة تانية».
كان اللاعب أحمد فؤاد بغدودة لاعب المنتخب القومي للمصارعة الرومانية قد غادر معسكر المنتخب أثناء بطولة إفريقيا بتونس والتي حصل بها على المركز الثاني وزن 63 كجم ولم يتم العثور عليه حتى الآن وعلم المسؤولون بعد ذلك بهروبه إلى أوروبا.
وتابع والد بغدودة: «أنا كنت بحاول بحافظ على كرامة ابني في وسط اللعيبة، وابني كان بيشحت الجزمة بتاعته من زمايله عشان يلعب بيها المباريات، وده رد عشان اتحاد المصارعة اللي بيقول بيصرف وبيعمل كل حاجة للاعبين».
وأوضح: «ابني مشي من ضيقة الحال عشان يعالج نفسه ويكوّن نفسه فيتقال عليه هارب، وعضو الاتحاد اللي طالع يقول كان واخد جواز السفر بتاعه عشان كان بيغير عملة في تونس، عملة تونس إيه اللي يغيرها ده بيدوه 50 دولار مصروف جيب ما يكفوش كيسين شيبسي في تونس».
وأضاف، قائلًا: "لغاية وقتنا هذا معرفش عنه حاجة وأنا مكنتش أعرف إني طالع مسافر يلعب بطولة أفريقيا ومعرفش عنه حاجة، أحمد طول عمره بيحلم بميدالية أوليمبية، ابني بقاله 12 سنة في الاتحاد ماخدش من اتحاد المصارعة حاجة وبياخد من المشروع القومي 2220 جنيه على البريد ومعايا ايصالات بكدا"، متابعًا: "ابني اتعرض لضغوط قبل أفريقيا بشهرين، وبقاله سنة مخدش ولا جنيه من الاتحاد واتصرف له 16 ألف جنيه وخصموا منه 14 ألف جنيه بحجة ضرايب وأخد 1200 جنيه في الأخر".
وأضاف: «حسبي الله ونعم الوكيل، وأنا بعمل نداء لأحمد ابني بقوله بلدك أولى بيك احنا اتولدنا في البلد دي وهنعيش في البلد دي وهنموت فيها، بس عايز اللى يطلع يكلم يتقي الله في كلامه».
وكشف إبراهيم عادل عضو مجلس إدارة اتحاد المصارعة تفاصيل جديدة في واقعة هروب بغدودة وقال كاشفا بداية الموضوع :«البعثة كانت راجعة من مدينة الحمامات على تونس العاصمة عشان يرجعوا مصر ودوروا عليه ملقوهش وبلغوا اللواء عصام رئيس البعثة واللي كان مستني في تونس لحين انتهاء منافسات المصارعة الحرة والشاطئية».
وتابع عضو اتحاد المصارعة المصري :«طلعوا أوضته لقوا شنطة وعليها 2 تي شيرت قدام شوية كان تمويه من اللاعب عشان محدش يقول مش موجود واعتقدوا في البداية إنه بيشتري حاجة وراجع بس راحوا المطار وجه وقت الطيارة وهو مش موجود فرجعت البعثة وتم البدء في اتخاذ الإجراءات».
وحول أنه من المفترض في مثل هذه البعثات الرياضية أن يكون جواز السفر مع المسؤول عن البعثة قال إبراهيم عادل: «الجوازات بتبقى مع رئيس البعثة وفي كل تحرك بيسلم الجوازات على الكاونتر ويجمعها تاني من اللاعبين وتفضل معاه لغاية الرجوع، واللي حصل إن بغدودة طلب الجواز بداعي إنه عايز يغير عملة أو يشتري خط موبايل تقريبًا».
وأضاف عضو المصارعة حول الإجراء الذي سيتخذه الاتحاد مع اللاعب: «عرفنا من الخارجية إن اللاعب سافر إلى فرنسا وهو معاه فيزا اتحاد أوروبي عشان كان مشارك في بطولة في إسبانيا من عدة أيام وبلغنا الاتحاد الدولي يعمل إيقاف لللاعب على السيستم، وللأسف فيه في حتة التجنيس حالياً بيوافق الاتحاد الدولي إن اللاعب يلعب لدولة ثانية من خلال تصريح عمل أو إقامة أو تصريح دراسة بيها، وبعد كده بيسمح للولد يلعب في الدولة اللي هو فيها وبيدي بلده الأصلي حق رعاية مبلغ بسيط».
واختتم: «حتى الآن لم نعثر عليه وفشلت كل محاولات التواصل معه عبر كل السبل ولا يرد على الرسائل عبر الماسنجر».