تناتيش

* أنا زهقان وطهقان ومتضايق علشان ملح المدام فى الأكل قليل.. أنا دماغى بتروح وتودى فى حاجات ناوى أعملها.. مثلاً هاأنصب لى خيمة قدام ماسبيرو، ويافطة أهاجم فيها الحكومة.. أو أعمل مليونية فى ميدان التحرير، أو أروح العياط أقطع خط السكة الحديد.. وأمنع القطارات اللى رايحة واللى جاية، لغاية ما المدام تزود الملح..!!
آه يا بلد..!
* واضح أن الأخ الحقيد معمر الطاسة مقضيها اليومين دول شطرنج وطاولة محبوسة وعادة وجلبهار..!
فالصورة الوحيدة اللى ظهرت له بعد فترة من الاختفاء تحت «طقاطيق الأرض» هى صورته وهو بيلاعب رئيس الاتحاد الدولى للشطرنج!..
طبعاً من غير ما نعرف النتيجة أكيد رئيس الاتحاد «اتغلب له».. لأنه لو ماعملش كده.. كان هايروح فى طوكر والقذافى هايعتبره من الجرذان وشذاذ الآفاق.. اللى لازم يطاردهم بالتوك توك من بيت لبيت.. ومن زنجة.. لزنجة..!!
* الكاتب الكبير عبده مباشر اتصل بى لتحية المجلة على التطور الذى تشهده حالياً، وعلى مذكرات السفير محمد بسيونى، التى يكتبها بقلمه الرشيق الأستاذ إبراهيم عبد الغنى، والتى أنصفت الفريق صادق، والسيد أشرف مروان..
شكراً لكاتبنا الكبير الذى نبادله تحية بتحية وحباً بحب..
* بصراحة جميل جداً أنهم عاقبوا فريق الاتحاد السكندرى وجمهوره على الشغب والفضيحة التى حدثت فى ستاد الإسكندرية فى مباراة الفريق مع فريق وادى دجلة..!
إيه الهرتلة دى.. يعنى لا نشوف كورة ولا أخلاق!
* من وحى غلاف مجلة أكتوبر هذا الأسبوع أهدى للكابتن نتن ياهو.. أغنية الفنان محمود عبد العزيز فى فيلم الكيف.. آه يا قفا.. آه يا قفا..!!
* كلمة ورد غطاها:
* شفت «الهندى» اللى أضرب عن الطعام احتجاجاً على الفساد فى بلده..؟!
** يا عم دا راجل «هندى».. طب دا احنا لو الناس فى مصر أضربت عن الطعام احتجاجاً على ماسورة الفساد اللى ضاربة فى البلد.. كان الشعب كله يموت من الجوع..!!