آخر كلام !!

* إذا كانت الحكومة لا تعرف حتى الآن من هو «القرش» الذى هاجم سياح شرم الشيخ.. فهى على الأقل عارفة «الحيتان الخمسة» اللى ولّعوا الأسعار فى السكر.. ومنهم بالمناسبة شهبندر تجار مصر، أى والله شهبندر تجار مصر.. والحيتان اللى ولّعوا أسعار الحديد والأسمنت.. والخضار واللحمة.. فياريت تتم جميلها وتصطادهم وتكسب ثواب فى الشعب الغلبان..!
* بالمناسبة الناس بتسأل وبراءة الأطفال فى عينيها: إزاى بتوع البيئة عرفوا إن «القرش» اللى اصطادوه هو اللى هاجم السياح فى شرم الشيخ..؟!
وطبعاً الإجابة من غير فكاكة هى إن بتوع البيئة.. ناس بيئة بقى وعارفين كل حاجة فشر المفتش كرومبو.. ومشيوا حسب نظرية «على وشك يبان يا مضاغ اللبان».. لقوا القرش مرتبك ومتلخبط وبيتلعثم فى الكلام.. خدوه من قفاه على «الكراكون».. وحطوا السيخ المحمى فى صرصور ودنه.. وبعد قلمين تلاتة.. و«كلم حضرة مفتش البيئة عدل يا ولة يا فسل».. اعترف القرش بالجريمة.. واعترف فوق البيعة إنه هو اللى سرق لوحة زهرة الخشخاش، وإنه هو اللى حرق قطر الصعيد.. وهو اللى سرق الونش.. وهو برضه سبب السحابة السودا والحمرا والصفرا.. وكل الألوان..!
وبعد ما القرش فَيَّص.. طلع برىء.. لذلك بتوع البيئة بيدوروا دلوقت على قرش تانى علشان يقرّروه ويعترف بجريمته ويشيل القضية..!!
وتبقوا قابلونى فى الحلقة الجاية.. على طريقة المفتش كرومبو..!!
* طبيعى جداً إنهم يرفضوا طلب جامعة الأزهر علاج رئيسها الأسبق العالم الجليل د. أحمد عمر هاشم فى الخارج على نفقة الدولة..!
إيه يعنى أن د. هاشم رئيس اللجنة الدينية بمجلس الشعب..؟! وإيه يعنى إنه كان رئيس جامعة الأزهر..؟! وإيه يعنى إنه واحد من أبرز علماء المسلمين فى العصر الحالى وله حوالى 100 كتاب..؟!
بصراحة ربنا د. هاشم هو اللى غلطان ماطلعش ليه لعيب كورة أو ممثل أو كان حتى يشتغل ... وألا بلاش أحسن يزعلوا منى..!!
* إيه الحكاية..؟! تانى سيدة فى مدة شهرين يضبطوها جمعت بين 4 أزواج وبعقود زواج رسمية..!
منك لله يا «حاجة زهرة».. آدى آخرة افتكاساتك مع أزواجك الخمسة..!!
* كلمة ورد غطاها:
* شفت المواطن المحترم اللى قلع هدومه ووقف «سلبوتة» أمام مبنى محافظة الغربية احتجاجاً على احتجاز الموتوسيكل بتاعه..؟!!
** دا راجل غريب بصحيح ماهو لو كل واحد قلع هدومه احتجاجاً على اللى بيحصل له.. الناس كلها هاتمشى ملط فى الشارع..!!