حتي لا تعايرنا الأجيال القادمة بفشل ثورتنا

الثورة المصرية بتحتضر . ايوه ثورتنا بتموت . لازم نعترف ان عدد الثوار بيقل يوم بعد التاني سواء على مستوى الثائر السلمي بتاع التحرير او الثائر المناضل بتاع الاتحادية. وبنظرة عميقة لما يحدث في مصر تقدر تقول ان ثوار التحرير عددهم بيقل يوم بعد التاني بسبب انتشار اليأس والاحباط والملل في نفوس الثوار والشعب. أما ثوار الاتحادية المناضلين فعددهم بيقل بسبب الاعتقالات والاغتيالات وبسبب الاصابات من جراء الهجمات الهمجية من مرتزقة مرسي سواء الشرطة او ميلشيات الاخوان اللي بيهاجموا الثوار وبرضة انتشر في نفوس هؤلاء المناضلين الملل واليأس واحساس بأنهم بيناضلوا من اجل شعب تخلى عن ثورته
طب والحل يا برنس الليالي ؟ .. ازاي نحافظ على حياة الثورة حتى تنجح وتحقق اهدافها
قبل ما ندور على الحل لازم نعرف أسباب أعراض الأمراض اللي اثرت في نفوس الشعب والثوار . ببساطة اليأس انتشر في نفوس الناس بسبب عدم تحقق اي نتائج ايجابية بعد الثورة والمصيبة ان نظام مرسي بالتعاون مع فلول مبارك عشان يكرهوا الشعب في الثورة جعلوا حياته جحيم بعد الثورة عشان يحرم يثور تاني . يعني مثلا كهربا بتتقطع بإستمرار . ويعني انعدام الامن والتغاضي عن حماية ارواح وممتلكات الناس وترك البلطجية واللصوص يعيثون في مصر فسادا لتخويف الشعب وجعل همه الاول هو حماية نفسه لا حماية ثورته واستكمالها . ويعني زيادة كبيرة في اسعار السلع والخدمات عشان الشعب يقطع النفس وهو بيجري ورا لقمة عيشه .
ولكي نعالج هذه الأمراض اللي هي اليأس والملل يبقا لازم ننزل بحملات توعية عشان نعيد الامل للشعب وعشان نجعل المصريين يتغلبوا على حالة الزهق والملل والاحباط واليأس في انتصار الثورة وتحقيق طموحات الشعب في الحياة الكريمة والعدالة الاجتماعية والكرامة .
لكن قبل ما ننزل لتوعية الناس وإعادتهم للمسار الثوري لازم نشكل كيان موحد يضم كل ثوار مصر من كل المحافظات عشان منكررش غلطة الموجة الاولى من الثورة التي كانت تفتقد لقيادات جماهيرية لقيادة الثورة وتسلم السلطة . ماهو عدم وجود قيادة للثورة هو سبب فشلها وسبب رضا الشعب بمكسب وهمي وهو تنازل مبارك عن الحكم للمجلس العسكري اللي هو في الاساس موالي لمبارك ونظراً لأن المجلس العسكري فشل في قمع الثورة فإضطر للاستعانة بالمنافقين وتجار الدين وتنازل لهم عن الحكم مقابل ان يحموا مبارك واعوانه ويتغاضوا عن جرائمهم قبل واثناء وبعد الثورة وعن الثروات اللي سرقوها خلال التلاتين سنة اللي فاتت
يبقا بإختصار عشان مطولشي عليك قول طول . باختصار يجب تشكيل كيان ثوري جماعي وليس كيان يعتمد على فرد بعينه ولازم نبتدي نتعلم ازاي نشتغل لصالح المجموع وننسى شوية الانانية المنتشرة بين الثوار . والكيان ده يكون هدفه الاول هو الدفاع عن الثورة واستكمالها حتى تتحقق احلام وآمال شعب مصر والكيان ده هيكون البديل للنظام الحالي اللي لازم نسقطه كلنا ونعيد السلطة فعليا لشعب مصر وشبابه اللي هما امل مصر ومعلوم ان بلدنا فيها كفاءات تحكم قارة بحالها مش مصر بس وبإختصار عشان برضه مطولشي عليك قول طول لازم الكيان ده يضم كفاءات وثوار من كل مكان في مصر ويقوم بتسيير قوافل ومسيرات توعية بالنقاش وبالمنشورات في المناطق الشعبية المكتظة بالسكان واللي بيمثلوا اكتر من سبعين بالمائة من شعب مصر
وبما ان التكرار يعلم الشطار يبقا الاول نتوحد في كيان ثوري وبعد كده الكيان ده يعيد الثورة لمسارها عن طريق توعية الشعب وتثويره مرة اخرى حتى يستعيد الحكم من ائتلاف المنافقين والفلول ممثل في اتباع مبارك الفلول وحلفائهم الاخوان ومن لف لفهم وسار على نهجهم بتضليل الناس واستخدام الدين كستار لإستعباد وتخدير الشعب كي لا يطالب بحقه في بلده.