شادي شامل: "بعمل بوتكس ومش عيب الراجل يهتم بنفسه وميهمنيش أي حد"

قال الفنان شادي شامل إنه يحب نفسه ويثق فيها، ويلا يهتم بالانتقادات التي توجه له، كما أشار إلى قيامه بإجراءات تجميلية للحفاظ على شكله إلى جانب حرصه على ممارسة الرياضة.
وتابع في حواره مع المذيعة أميرة بدر في برنامج "خلاصة الكلام" المعروض على قناة النهار: "بحب نفسي أكيد، لازم أحب نفسي مش حكاية معجب بنفسي، يمكن واثق من نفسي، وأنا قديم برضه خلي بالك مش غرور ولا تكبر، وبحب روحي العادية التلقائية، وبصحى أبص لنفسي في المراية وادلع نفسي".
وتابع "أنا من الشخصيات اللي تحب دائما تكلم نفسها، وساعات بكون مش طايق ابص لنفسي في المراية. وطول عمري شكلي كده، يمكن ساعة عبدالحليم حافظ كانت شخصية وعملتها، وطبيعي مع مرور السنين إني كبرت فشكلي اتغير".
وعن الإجراءات التجميلية التي قام بها، أوضح "عامل بوتكس، وفيلر مرة واحدة عملته من كام سنة، كنت في دبي لكن أنا بعمل بوتكس دلوقتي بس، وكل فنانين مصر بيعملوا بوتكس، ومش عيب الراجل يهتم بنفسه لو حاجة هتحلي من شكلك اعملها لكن لو هيكون زيادة عن اللزوم ليه نعملها، زي ما الست بتهتم بنفسها لازم الراجل يهتم بنفسه في إطار معين، ولازم أكون قدام الست شكلي كويس وإحنا فنانين".
وردًا على الانتقادات التي يتعرض لها، وهل تضايقه، أجاب "زمان كنت بتضايق دلوقتي لأ، الناس بقت بتعمل والعالم مفتوح على بعضه انا واثق من نفسي وميهمنيش أي حد خالص"، مضيفا "بهتم بجسمي والرياضة أهم حاجة وبحافظ على أكلي ومش باكل كميات كبيرة وبشرب ماية كتير طبعا".
جدير بالذكر أن شادي شامل مغني وملحن وممثل، ظهر للجمهور لأول مرة من خلال مسابقة لاختيار موهبة شابة لأداء شخصية المطرب الكبير عبدالحليم حافظ في مسلسل "العندليب – حكاية شعب" وفاز ولعب دور البطولة في العمل، الذي شارك فيه: عبلة كامل، كمال أبو رية، لقاء الخميسي، محمد الشقنقيري، هيدي كرم، أحمد فلوكس، حلمي فودة، مجدي كامل، طارق لطفي، دينا.