"مش أول مرة تحصل".. ليلى طاهر عن شائعة وفاتها: "أنا زي الفل"

علقت الفنانة القديرة ليلى طاهر، على الشائعات التي ترددت خلال الساعات الماضية حول وفاتها، قائلة: "أنا زي الفل بس الناس مش مقتنعة ومش أول مرة يحصل الموضوع دا، حصل قبل كده ثلاث أو أربع مرات "، مضيفة:" زمان كنت بضايق ولكن دلوقتي مبقتش أضايق وبقول دول هبل ومش عندهم حاجة يكتبوها فيكتب أخبار وفاة ولو صحفي أو محرر فن المفروض يدقق ويلاقي حاجة يكتبها".
وأوضح "ليلى" في مداخلة هاتفية لبرنامج "كلمة أخيرة" على فضائية "أون إي" مساء الثلاثاء: "لفت نظري النهارده حب الناس اللي متعرفنيش في الشارع وفي كل مكان وبحثهم عن رقمي عشان يطمنوا عليا"، متابعة: "لقيت الناس هجموا عليا في نادي الجزيرة وكأنهم شافوني أول مرة قعدوا يحضنوني ويبوسوني ويشتموا في اللي كاتب الخبر".
وعن عدم تقديمها لأعمال في الوقت الحالي، أردفت: "عشان حب الناس ليا واحترامهم لي مش هنزل درجة واحدة عنه وعشان تاريخي اللي الناس بتعتز بيه، وبالتالي مش عاوزة أعمل حاجة أقل درجة مما قدمته وإلى الآن لم أعثر على شيء يتسق مع ما قدمته، خاصة أن المرحلة العمرية اختلفت ونوعية الفن، لكن مش هعمل حاجة أقل من اللي قدمته ".
وأكملت، أنها قدمت باقة متميزة من الأعمال سواء دراما أو مسرحيات أو أفلام، قائلة: "أبرز الأدوار المقربة لقلبي فيلم الأيدي الناعمة وصلاح الدين، وهامليت وأشياء كثيرة قدمتها مش عارفة أقول إيه ولا إيه".