رامز أمير يعلن عن فيلمه "الجارح" وينشر فيديو مع كائن شرس

نشر الفنان رامز أمير فيديو من التدريبات النهائية لفيلمه الجديد "الجارح"، وظهر معه في الفيديو طائر "العقاب".
وعلق رامز على الفيديو قائلًا: "أول حاجة وحشتوني جدا وعارف إني مختفي بقالي كتير بس هتعرفوا ليه لما تتفرجوا على الفيديو، الناس اللي متابعاني عارفة اد ايه أنا بحب شغلي وإني دايما بختار لنفسي الطريق الصعب، اللي محدش مشي فيه قبل كده، وهي دي متعتي، إني اتعب لإن بالنسبالي التعب هو اللي بيدي طعم للحياة".
وأضاف "بعد الأكشن اللي عملته اتقالي كلام كبير أوي عليا حملني المسؤولية، فكان لازم اتعب اكتر واشتغل على نفسي اكتر، المرة دي انا جايلكم بفكرة مجنونة حبتين، فيلم (الجارح)، الفيلم ده اخد مني مجهود وتعب لمدة سنتين، كانت الخطوة الأولى والأهم اننا نكتب فيلم محترم مش مجرد شوية أكشن وخلاص، الخطوة التانية إني اطور نفسي في الأكشن اكتر وأدرب الطير اللي هيبقى مفاجأة في الفيلم ان شاء الله، الطير الجارح ده اسمه العقاب وده من أشرس الكائنات اللي ربنا خلقها وتدريبه صعب و خطر جدا، ابتديت معاه من الصفر عشان اعلمه يقف قدام الكاميرا ويعمل أكشن معايا كمان، يمكن فيه ناس تقول عليا مجنون بس الحقيقة إني مجرد واحد بيحب يجتهد ويتعب، ربنا هو اللي اداني النعمة دي ودي نعمة كبيرة أوي انك تستمتع بالمشوار اللي بتمشيه عشان حلمك، الحمد لله".
واختتم "دعواتكم واستنوا فيلم أكشن أول مرة يتعمل في الوطن العربي، فيلم (الجارح)".
ولم يفصح رامز عن تفاصيل الفيلم حتى الآن ومن المقرر أن يفصح عنها قريبًا.