قسمًا بالله لم أتحدث كذبًا قط.. السيسي: كنت أتمنى اللي بيحملوا راية الدين يكونوا صادقين

كتب- محمد عمارة وأحمد السعداوي:
قال الرئيس عبد الفتاح السيسي، رئيس الجمهورية، إنه قال للناس في 2011 إنها كانت إعلان وفاة الدولة المصرية؛ الشعب عايز يغير ومش شايف أمل واتحرك.. اتحرك في 2011 و2013 للتغيير.
وأضاف الرئيس السيسي: اوعوا تنسوا إن أكتر حاجة، وآسف إني بقول كده، كنت أتمنى إن اللي بيدّعوا حمل راية الدين يكونوا أمناء وشرفاء ومخلصين.. باتكلم عشان فيه تجربة، اللي الدكتور مصطفى حط صورة الكوبري، حالة التشكيك موجودة ضد البلد من 80 سنة، طب الحالة دي هتطلع إيه، هتطلع رأي عام إزاي، قدرته على الصمود عامل إزاي، كنت أتمنى يكون فيه صدق أمام الصدق، قسمًا بالله لم أتحدث كذبًا قط في أي حاجة، كنت أتمنى يكونوا صادقين في تناولهم، انت مش جربت وانت بتتولى كانت هتخرب منك، كنت هتقابل ربنا وانت بتضيع 100 مليون، هو مايعرفش، الدولة دي حكاية كبيرة أوي، عايزة من المهتمين بالموضوع قراءات كبيرة لسنوات كبيرة، وقبل ده يكون فيه قرار إلهي إن الدولة دي متروحش، وأنا أقدر أطمئن لده بوضوح بالنسبة لي.
وتابع السيسي، عبر كلمته خلال فعاليات المؤتمر الاقتصادي مصر 2022، اليوم الأحد: عايز أقول للناس، حتى في الإعلام، إن التظاهر في بلاد معينة خلَّى الدولار مش موجود، الناس فرحانة بالتصفيق، وكل أرصدة المودعين بالدولار، يا ترى في 2011 و 2013؛ مستعدين لتكلفة التغيير، اللي هي على الأقل 470 مليار دولار، وتنزلوا انتو وتطلع انت وتقولوا خلَّص، اوعى تقول لي اطلع انت خلَّصها، هاخلَّصها إزاي لوحدي؟!
واستطرد الرئيس: أنا جيت في حملة 2014 قُلت أنا لها أنا لها، اديتكم وعود جميلة؟ لأ، قلت التحدي كبير وأكبر من الدولة المصرية كقيادة وحكومة؛ لكن مش أكبر من الشعب.
وشهد الرئيس عبدالفتاح السيسي، اليوم، انطلاق فعاليات " المؤتمر الاقتصادي- مصر 2022" الذي تنظمه الحكومة على مدار 3 أيام في العاصمة الإدارية الجديدة.
وحضر فعاليات انطلاق المؤتمر الاقتصادي رئيس مجلس الوزراء الدكتور مصطفى مدبولي وعدد من الوزراء وكبار رجال الدولة، بمشاركة نخبة واسعة من كبار الاقتصاديين والمفكرين والخبراء.
ويستهدف المؤتمر التوافق على خارطة الطريق الاقتصادية للدولة خلال الفترات المقبلة، واقتراح سياسات وتدابير واضحة تُسهم في زيادة تنافسية ومرونة الاقتصاد المصري، كما سيشهد المؤتمر الإعلان عن عدد من الحوافز لقطاع الصناعة والمصدرين لتحقيق المستهدفات القومية.