رشوان توفيق: لي 3 تجارب مع التقاء الأرواح.. والسادات جالي وقال "لا إله إلا الله"

قال الفنان القدير رشوان توفيق، إن له 3 تجارب مع التقاء الأرواح، الأولى كانت مع العندليب عبد الحليم حافظ، والثانية كانت مع الرئيس الراحل أنور السادات، والثالثة كانت مع الفنان الكبير الراحل محمود ياسين.
أضاف توفيق، في حوار له ببرنامج "الستات" عبر قناة "النهار": "عبد الحليم قالي لما غفلت في البلكونة (لأ يا أستاذ توفيق لأ)، وشوفت بنت السادات اللي توفت، تتحدث في التليفزيون وبتقول (أنا عايشة بمعاش بابا)، وبعدين لقيت واحد بيرجع 5 مليار، فالحقيقة يعني أنا وقفت كده في الشقة بصوت عالي وقريت الفاتحة للرئيس السادات".
تابع: "بعدها كنت بصلي بالليل قبل الفجر وغفلت لقيت إيد اتحطيت على كتفي الشمال رفعت عيني لقيت الرئيس السادات لابس بدلة التشريفة الفاتحة اللبني مش التي قُتل بها، وراح صارخ وقال (لا إله إلا الله) وكررها تاني، فقولتله (محمد رسول الله)، وراحت الإيد مسحوبة من على إيدي، وبعدها كلمت المهندس حسب الله الكفراوي رحمه الله وحكيلته وقالي إنه شهيد، وبعدها حكيتها برضو للمدام الراحلة جيهان السادات".
استكمل: "المرة الثالثة، محمود ياسين رحمة الله عليه، كنت في العزاء بتاعه، وبعدين شوفت رؤية بالليل أنه لابس جاكت أبيض وفي عز شبابه ووسامته وشعره ثقيل جدا، وأخدنا بعض بالحضن، وكلمت عمرو ابنه قولتله قول لماما إني شوفته، ومكنتش عمري شوفته بالجاكيت ده، وبعدها سبحان الله بقلب في التليفزيون لقيته بنفس اللبس".
يذكر أن الفنان رشوان توفيق شارك في موسم مسلسلات رمضان الماضي، بمسلسلي "انحراف" مع روجينا، و"بابلو" مع حسن الرداد.