"الاختيار 3" الحلقة 20.. خيرت الشاطر ل"مرسي": بتشغل بالك بحاجات صغيرة

شهدت الحلقة ال 20 من مسلسل "الاختيار 3" والتي تعرض على شاشة (ON E) العديد من الأحداث أبرزها:
اشتعال مظاهرات "منظمة" لإقالة شيخ الأزهر، وتعتبرها جماعة الإخوان "ورقة ضغط" على شيخ الأزهر للموافقة على قانون الصكوك.
في نفس التوقيت تحدث واقعة تسمم داخل جامعة الأزهر، بالتزامن مع رفض الأزهر لقانون الصكوك.
يجلس الرئيس محمد مرسي (صبري فواز) مع القيادي الإخواني خيرت الشاطر، ويقول الأخير: فخامة الرئيس تطلع من البيت ع المستشفى، تشوف الطلبة اللي اتسمموا وتحسسهم إنهم ولادك، اسمع مني".
وحينما يبدي "مرسي" اعتراضه على الزيارة في ظل وجود أحداث مشتعلة في الدولة، يقول الشاطر:"حضرتك بتشغل بالك بحاجات صغيرة، مشروع الصكوك ده خير لينا كلنا، ساعدني عشان نحقق اللي إحنا عايزينه".
تدخل "إسراء" (دنيا المصري) لتقديم بلاغ داخل قسم الشرطة بالعريش، مثلما طلب منها الإرهابي أبو منير.
تقابل "إسراء" الضابط مصطفى (أحمد السقا) فيخبرها أنها يجب أن تقدم المعلومات المطلوبة منها بشكل صحيح حتى لا يشعر أبو منير أنها تضللهم، ويطمئنه أنه سيظل بالقرب منها.
بعد خروجها يأخذها أبو عياش (محمد جمال) لمقابلة أبو منير، الذي يخبرها أنها استطاعت اجتياز الاختبار وأن تصبح محل ثقة لهم ويكلفها بنقل أدوات في العريش.
في مكتب المخابرات العامة يشعر (أشرف زكي) بالغضب بسبب ما أسماه بجاحة الإخوان، قائلا: "كل ما نقبض على ناس الرئاسة تقول مشوهم، لو خطة الإخوان إن تكون مصر كلها ميلشيات زي برة مش هيبقوا بالبجاحة دي".
بعد القبض على عدد من العناصر الإرهابية يتم التحقيق مع "أشرف" بعد رصده ضمن صفوف الإخوان في أحداث المقطم، ويخبره المقدم زكريا يونس (كريم عبدالعزيز) أن والده تعاون سابقا مع جهاز الأمن الوطني، ويعترف بما حدث ويكشف عن المكان الذي تلقى به التدريب.
يشعر محمد عبد العزيز (عصام السقا) بأن المظاهرات لم تعد كافية ولا تجدي في الوضع السييء الذي تمر به البلاد، ويقول لصديقه حسن شاهين: احنا لازم نشوف حل أكبر من المظاهرات.
عبد العزيز متابعا حديثه: عايزين فكرة جديدة زي استمارة لسحب الثقة من محمد مرسي، اللي انتخبوا مرسي كانوا 13 مليون، احنا محتاجين 15 مليون لسحب الثقة منه،، حاجة كده زي التوكيلات اللي جمعها سعد زغلول، وعايزين حاجة الناس تفهمها مش النخبة، نسميها "كارت احمر للرئيس".
حسن: بس الاسم ده هيبقى طويل، ليرد عزيز: خلاص نسميها تمرد.
يطور ماهر (محمد علي رزق) علاقته بماركو، ويطلب الأخير منه عدة أمور فينفذها، ويقول ماهر للضابط مصطفى: أنا حاسس إن ده غلط، ليه أقوله المعلومة الحقيقية.
مصطفى: المعلومات اللي إنت بتبعتها عادية وممكن يعرفها من أي مصدر غيرك، وبيقارن اللي إنت بتعبته باللي معاه، نفذ الخطة على أكمل وجه، قلنالك نفذ يبقى تنفذ، وماركو هيطلب منك تسافر برة مصر، كل المطلوب منك تنفذ اللي إنت اتدربت عليه بحذافيره.
يذهب زكريا لمكان التدريب الذي تتلقى فيه العناصر الإرهابية تدريبها بأحد المراكز، والمجموعات تتدرب على اقتحام المؤسسات، ويقول اللواء يسري أن أسامة ياسين يسعى لعمل حرس ثوري، خاصة أن أماكن التدريب تكون برعاية وزير الرياضة.
يلتقي وزير الدفاع الفريق عبدالفتاح السيسي (ياسر جلال) في مكتبه مع اللواء محمد العصار، ويقول: سيادة الرئيس لازم يكون عارف كل التفاصيل اللي بتشكل الوضع العام في الدولة، ولازم علاقتنا بكل الدول الشقيقة تكون متوازنة، ولا يمكن نتورط في الشؤون الداخلية للدول، واجبنا نقدمله تقديرات الموقف ونخليه على علم بكل الأمور.
وتابع: سيادة الرئيس لازم يبقى فاهم إن التحديات اللي بتواجه مصر دي محصلة سنين طويلة تزيد عن 50 سنة وكانت بتتعالج بشكل مؤقت لو عايزين نحل لازم نحل المشاكل من جذورها وده بيتطلب حشد لكل قوى الدولة.
مستكملا حديثه: سيادتك عارف تقديري ليك ولتاريخك المشرف، حضرتك أديت على مدار 17 سنة مساعد وزير الدفاع وقدمت مهام في منتهى الحساسية، المهمة دي قد تكون الأهم".
العصار: أنا مقدر أهمية الدور ده يافندم وفاكر سيادتك لما المشير طنطاوي جابك في الأمانة العامة لوزارة الدفاع، كل الناس عرفت إننا قدام عقلية متفردة ومتميزة، عقلية بتعكس موهبة وبصيرة ورؤية تجاه المشاكل والقضايا في الوقت ده، ومين ينسى مقترحك للمبادرة بدر 96.
في سيناء يتوجه مروان (أحمد عز) لمقابلة الشيخ أحمد (منذر رياحنة)، ويطلب منه التعاون معهم، فيقول أحمد: ضد مين الإرهابيين دول رئيس الجمهورية هو اللي حاميهم، وإنت عايز تخرجهم من هنا، الخناقة دي مش بتاعتنا.
مروان: أنا جاي وماددلك إيدي عشان نحمي البلد دي، فيقبل الشيخ أحمد التعاون معه.
في نهاية الحلقة يتم تسريب مقطع فيديو يجمع محمد مرسي وخيرت الشاطر يتحدث فيه الأخير عن عصام سلطان القيادي بالجماعة.
"الاختيار 3" بطولة: أحمد السقا، كريم عبدالعزيز، أحمد عز، ياسر جلال، خالد الصاوي، عبدالعزيز مخيون، صبري فواز، وعدد من ضيوف الشرف، ومن تأليف هاني سرحان، وإخراج بيتر ميمي.