السيسي يُنصف المرأة: أرجو ما حدش يزعل منِّي.. "ست البيت" ساعدت في بناء الوطن

قال الرئيس عبد الفتاح السيسي، إن المرأة كانت سببًا كبيرًا للحالة اللي كنا فيها، وعايز أفكركم أد إيه المرأة كانت مسؤولة ومحركة للأحداث.
وأضاف السيسي، خلال حضوره احتفالية تكريم المرأة المصرية والأم المثالية، اليوم الأربعاء: لما جينا في البرنامج الاقتصادي، قُلنا محتاجين دعم المرأة، ومررنا بظروف صعبة بفضل دعمها ومساندتها.
وتابع رئيس الجمهورية: باقول الكلام ده عشان أسجّله، لولا هذا الدعم -الراجل موجود وأنا راجل برده يعني- لكن المرأة هي... افتكروا بإنصاف أي زوج يفتكر بإنصاف، زوجته بتعمل إيه.. كل ابن يفتكر والدته بتعمل إيه.
واستطرد السيسي: ظروف قاسية مرت علينا في الإصلاح الاقتصادي، وبفضل الله ولولا هذا الموقف والإجراءات، باقول لكم خلال السنتين اللي فاتوا والأزمة العالمية اللي بنعيشها، صدقوني لولا نجاح البرنامج موقفنا كان هيبقى صعب أوي في اللي بنعيشه دلوقتي، وأَدِيْكُم انتم متابعين.
وأضاف الرئيس: الناس ممكن تاخد قرارات كتير، بس توفيق ربنا هو الأساس، الناس ممكن تاخد قرارات وعارفة الصح؛ لكن لما ربنا يوفق والناس تساعد معانا.. النتيجة اللي باتكلم فيها، الناس ساعدت، باتكلم على ست البيت؛ مطلوب منها تأكّل وتشرّب، هي اللي ساعدت مع الوطن؛ لما أسجل ده وباقوله، أنا واحد من الناس، ماتعتبرونيش مسؤول كبير ولا حاجة، أنا أصلي واحد من المجتمع باسمع وباشوف، وباشوف الست بتعمل إيه زي كل بيت.. وتجد في الآخر، وأجد في الآخر الست اللي بتشيل البيت، ده نسبة غالبة مش حالة، مش استثناء، وأرجو ما حدش يزعل منِّي.
وأضاف السيسي: مش قادر أقول لكم لقائي مع السيدات الفضليات الكريمات اللي التقيت بهم واللي في كل بيت مصري، اللي بنقول لهم متشكرين ومقدرين، وبنوجه لهم التحية.
وتابع رئيس الجمهورية: حتى السيدات اللي عند ربنا دلوقتي ومش موجودين معانا، ندعو الله أن يتغمدهم برحمته؛ بحق كل سهرة سهرنها، وهدمة غسلوها، وأكلة صنعوها، وبحق كل دعوة قالوها.
واستطرد السيسي: "بنقول يا رب همّ ضيوف عندك، فتفضَّل عليهم بكرمك ولطفك ورحمتك.. يوم جميل أوي إن احنا نتذكر الفضليات العظيمات".