شريف منير عن انسحابه من "ريش": "عندي غيره على بلدي بتحركني"

قال الفنان شريف منير، إن ما رأه في فيلم "ريش" كان زائدًا عن اللزوم في الإساءة إلى صورة مصر، ولذلك قرر الخروج من العرض ومعه عدد من الفنانين.
وأضاف منير، خلال مداخلة هاتفية مع الإعلامي عمرو أديب ببرنامج "الحكاية" المذاع على فضائية "MBC مصر"، مساء الإثنين: "الفيلم يحكي عن أسرة عايشة في عذاب بشكل غير طبيعي ومؤذي، يعيشون في قذارة رهيبة، وشكل مش حلو أبدًا، عشان كدة اتخنقت وتعبت من الفيلم".
وتابع منير: "العشوائيات اللي كانت موجودة في مصر لم تكن بالشكل الذي عرضه الفيلم، ومستغرب إنه لما اتعرض بره مصر أخد جائزة مهرجان كان!.. بلدنا فيها أشكال ومناظر حلوة، والحياة اللي كانت أيام العشوائيات مكنتش بالمنظر ده، وده رأي ودي حاجة متزعلش حد".
واستطرد منير: "الناس اللي كانت عايشة في العشوائيات، عايشة دلوقتي في أماكن نظيفة وحلوة، والصورة اللي كنا بنشوفها من أيام فيلم حين ميسرة، لازم العين تبعد عنها، لأننا بقينا في جمهورية جديدة وشكل جديد".
وأضاف: "منتج الفيلم محمد حفظي قابلني وسألني خرجت ليه؟ قلت له مانبسطش يا حفظي، ومش شايف أي إبداع فظيع غير إن المشاركين مش ممثلين.. وحفظي قال لي إن ناس كتير قالتلي الفيلم يخنق وتعبت منه".
وانتهى منير قائلًا: "أنا ضد منع الفيلم، وأتمنى أن يرى الجمهور الفيلم ويقول رأيه، بس أنا عندي حتة غيرة جوايه تجاه بلدي بتحركني، وأنا بسخن.. كمان نفسي المخرج يطلع يقولي هو عمل الفيلم ده عشان إيه".
وأشاد منير بنجاح مهرجان الجونة وما يتضمنه من تطور جيد جدًا في عرض الأفلام.
يذكر أن عددًا من الفنانين الكبار انسحبوا من العرض الخاص بفيلم "ريش" في مهرجان الجونة السينمائي، اعتراضًا على ما وصفوه بأنه يتضمن إساءة لصورة لمصر.