"لازم أراضي زمايلي".. كواليس حصول "أم سيد" على جائزة "جبر الخواطر"

بمجرد أن حصلت "الحاجة أم سيد" على الأموال المقدمة من برنامج "جبر الخواطر"، والذي يقدمه أحمد رأفت، اقترح عليها زميلها في العمل "مصطفى شطا" أن يُحضر لها تاكسي للعودة إلى المنزل، غير أن السيدة رفضت ذلك بينما صممت على العودة إلى مقر العمل "قالتلي أنا لازم ارجع الشغل عشان أراضي زمايلي اللي شغالين معايا" يحكي شطا ما دار بينه والسيدة لحظتها.
كان شطا خارجا لتوه من محل عمله، عندما لمح أم سيد في حيرة من أمرها بالشارع، فسألها ويجمعهما العمل منذ عامين ونصف العام عن السبب، لترد السيدة: "الأستاذ ده عايز يعمل معايا لقاء"، ليلتفت الشاب إلى مقدم البرنامج ويفهم المغزى "أنا عارف برنامج أحمد رأفت ففهمت علطول أنه هيساعدها بقرشين، فقولتلها متقلقيش اعملي معاه اللقاء".
وتقوم فكرة برنامج "جبر الخواطر" على توجيه مقدمه لأسئلة سهلة لمن يُعرفهم البرنامج ب"محتاجين" يلتقيهم في الشارع ليتم مكافأتهم في النهاية بمبلغ من المال.
منذ عمل شطا مع أم سيد في المطعم، وهي التي تعمل في مخبزه، لم يسمع عنها غير الكلام الطيب: "ست أصيلة، جوزها ميت وسيبلها بنتين وولد من أصحاب الهمم. شقيت بالحلال وجوزت البنات ولسه بتراعي ابنها التعبان. مثال للإنسان المؤمن بالله وقدره".
وعن اللحظة التي ظهرت فيها بالبرنامج تسأل المذيع وتستشير شطا عن مدى أحقيتها في الحصول على تلك الأموال، يقول الشاب: "مكنتش عايزة تاخد الفلوس غير لما قولتلها خوديهم دول حلال متخافيش".
ويضيف شطا: "بعد ما خدت الفلوس ومشينا، أنا كنت خايف عليها هتروح إزاي بالفلوس وهتركب مواصلات إزاي، روحت قولتلها هوقفلك تاكسي عشان يروحك، فرديت عليا رد عمري ما هنساه، قالتلي: أنا لازم ارجع الشغل عشان أراضي زمايلي اللي شغالين معايا، قولتلها ربنا يباركلك، راحت معيطة".
حاول شطا تهدئة السيدة: "قالتلي والله أنا خارجة من الشغل ومروحة ومكنش معايا غير 7جنيه يروحوني واتكسفت أطلب فلوس سلفة، فقلت يارب أنت اللي عالم بحالي، فربنا كرمني بالفلوس ديه كلها.. والله عيني دمعت في الموقف ده، علمتني درس هيفضل معايا طول عمري ".