"جابوهم من التلاجة".. بائعة البحيرة تروي تفاصيل واقعة "حرامي البط الأنيق"

مع أول خيط لضوء الصباح استيقظت بهيجة كعادتها، لتبدأ رحلة البحث عن لقمة العيش، ذهبت إلى "عشة" الطيور وانتقت منها بطتين وخرجت لبيعهما بجوار فرش خضروات خاص بها بأحد أسواق مدينة دمنهور.
"البط ده تبعك؟".. انتبهت بهيجة لصوت مصدره سيارة حمراء براقة توقفت على الجهة المقابلة للفرش، كان رجلًا في منتصف العمر يرتدي حلة أنيقة، أشار نحو بطتين لإحضارهما إليه، فسارعت نحوه بهما، سعيدة تمني نفسها ببيعهما إليه، ولكن اصطدمت أمانيها بجشع حرامي أنيق، لم يكترث لحالها البائس.
تروي بهيجة تفاصيل ما حدث: "كان راجل باين عليه محترم لابس لبس بهوات وراكب عربية فخمة، اتفقت معاه على 200 جنيه ثمن البطتين، قاللي ماشي حطيهم في العربية، بس أنا عاوز كمان 6 كيلو بطاطس، مشكتش فيه لحظة بسبب منظره، حطيتله البط تحت الكرسي إللي جنبه، ورحت أجيب البطاطس، ببص ورايا لقيته اتحرك بعربيته".
وأضافت بهيجة: "في الأول فكرته بيلف وهييجي الناحية التانية عند الفرش لكنه كمل ومشي وأنا واقفة مش فاهمة إيه إللي بيحصل، فجأة لقيتني بجري في الشوارع ومش عارفة أعمل إيه".
وتكمل بائعة البط: "واحد من أصحاب المحلات في المنطقة قالي متخافيش الكاميرا جابت العربية ونمرها، وهديكي الفيديو روحي اعملي بيه محضر، وفعلًا بلغت عنه وضباط الشرطة كلهم تعاطفوا معايا، وخرجت قوة راحت جابت الحرامي من بيته".
واستطردت: "البطتين لقوهم مدبوحين ومتنضفين، ومجهزهم عشان يطبخهم، جابوهم من التلاجة، مش عارفة الناس بتقبل على نفسها تاكل حرام من عرق وشقا الغلابة إزاي، ربنا عالم بحالي، وكتر خيرهم أهالي المنطقة لمولي 200 جنيه وادوني تمن البطتين".
وتؤكد بهيجة: "عرفت إنه محامي له سوابق ومفصول من النقابة، لكن مش هتصالح معاه ولا هتنازل عن البلاغ حتى لو عطاني فلوس الدنيا، يا عالم أذى ناس قد إيه قبل مني وسرقهم".
وصرح مصدر بنقابة المحامين في البحيرة، أن المحامي صاحب واقعة السرقة، مفصول من النقابة العامة للمحامين منذ 3 سنوات، لاتهامه في عدد من القضايا، منها تزوير محررات رسمية، وانتحال صفة ضابط شرطة، وسبق الحكم عليه بالحبس، وليس له علاقة بالنقابة منذ فصله.
وتباشر نيابة دمنهور بمحافظة البحيرة، التحقيق مع المتهم في واقعة سرقة بطتين من بائعة بأحد الأسواق.
بدأت الواقعة ببلاغ لقسم شرطة دمنهور من إحدى السيدات تتهم فيه شخصًا يقود سيارة ملاكي بسرقة بطتين والفرار هاربًا.
بمراجعة الكاميرات جرى تحديد هويته وضبطه، وتبين أنه "محمد"، محاي مفصول من نقابة المحامين، وتحرر المحضر رقم 14917 لسنة 2020.