لميس الحديدي مدافعة عن "شيكابالا": "عيب التريقة على غيرنا بأصله وشكله ولونه"

علقت الاعلامية على أزمة التعصب الكروي وما تعرض له محمود عبد الرازق "شيكابالا"، نجم الفريق الأول لكرة القدم بنادي الزمالك، قائلة: "ظاهرة التعصب الكروي لابد أن نقف امامها وهو أمر مزعج جداً ونقول ماينفعش .. وأنا بوجه كلامي لبعض جمهور الاهلي لأني عارفة أن جمهور الاهلي جمهور محترم خاصة في وقت فرحته".
وأضافت "الحديدي"، في برنامجها "كلمة أخيرة"، المذاع على فضائية "أون إي"، اليوم الأحد، قائلة: "عاوزة أكون دقيقة جداً وأنا بقول ده ..لكن من لايدرك أنه يراد أن يدفع به لدائرة العنصرية والتعصب .. مش واخدين بالكم أن دي غلوشة، حد بيحاول يخليكم تغلوشوا على فرحة النصر والكأس، وتروحوا لحتة تانية خالص، ويبقى الحديث كله مش على فرحة الأهلي على كأس إفريقيا ويبقى اهتمامنا كله شيكابالا عمل إيه وبعض جمهور الأهلي عمل اية".
وأكدت أن "شيكابالا" لاعب متميز جداً وأحرز هدف مهم، ومن العيب أن نسب غيرنا بأصله وشكله ولونه، متابعة: "احنا مانعملش كده كده كمصريين وكبني أدمين وكأهلاوية .. وبالذات لما تكون منتصر، لأن المنتصر دائماً عنده شيمة الكرم، وأنا عملت كده مع مرتضى منصور، ومارضتش أدخل في الهجوم في أوقات الضعف".
وتابعت: "في قصة شيكابالا حاسة إن فيها إفتعال وفيه جر لدائرة الشر .. وأنا دائماً ضد نظرية المؤامرة لكن بدأت أشك إن فيه مؤامرة ؟، وإنتوا عارفين المؤامرة جاية منيين؟!".
ووجهت رسالة لنجم الزمالك، قائلة: "أنت كلاعب لازم تكون منضبط بلاش استثارة الجماهير ، اللي عملتوا الجماهير غلط ولازم ياعقبوا .. فيديوهات الإساءة عيب، وليه بتخلي حد يجرك للناحية التانية لازم كجمهور تترفعوا وتقفوا خلف فريقكم لا تشتموا ولاتغلطوا وإنتوا كسبانيين أو خسارانين".