هنيدي ل"السقا: "ابعتلك رقم تامر تتكلموا بدل ما انتو فاضحينا على الفضائيات"

بطريقته الكوميدية الساخرة، علق الفنان محمد هنيدي، على منشور اعتذار الفنان أحمد السقا لصديقه المطرب تامر حسني، والذي نشره على صفحته الرسمية بموقع "فيسبوك".
وكتب هنيدي "عايز رقم تامر يا سقا تتكلموا بدل ما انتوا فاضحينا على الفضائيات والسوشيال ميديا كدة".
كان السقا كتب "رسالة إلى صديق عزيز، صديقي وأخي العزيز تامر حسني، انت عارف اللي بيني وبينك عيش وملح وحاجات كتير.. قد أكون أخطأت إني اتكلمت في الموضوع على الهوا، ولكن يعلم الله كم كنت مجروحا وكم كنت حزينا".
وتابع "مش هاطول عليك اكتر من كده ولو أنا زعلت شوية وانت شوية نبقى خالصين يا عم.. تامر حسني احنا اللي بينا كتير ماتزعلش يا عم وحقك عليا، وميعادنا الحفلة اللي جاية".
سبق رسالة السقا، قيام تامر بكتابة المنشور التالي، عبر خاصية القصص القصيرة بموقع انستجرام: "حبيبي وأخويا وصديق العمر ونجم الدنيا كلها أحمد السقا، كنت أتمنى انك تكلمني بيني وبينك، ولو كنت زعلان من أي حاجة أو فاهم أي حاجة غلط، لأن الحجات دي لا يمكن تفوتك، وأنا كنت أتمنى مكتبش الكلام دا هنا، بس عشان بعد كلامك في التلفزيون، الجمهور الكريم بقى ليه حق إنه يفهم الصح".
وأضاف "عشان أفكرك بس، أنت كلمتني وقلت لي فيه خبر في موقع، وعليه صورة افتراضية للفيلم، وكاتبين أنك بطل في الفيلم، وأنا رديت عليك ان دي اجتهادات صحفية والصورة من تصميم محبين اللي اكيد فرحوا بالخبر اننا مع بعض، حتى أنا مقولتش ان دي الشركة المنتجة، لأنها شركة كبيرة، ولا يمكن تعمل كدا، لأن الفيلم متباع للخارج والداخل باسم أخوك تامر حسني، نزل والناس كلها شافته، وأنت مش فيه ولا فيه اسمك، كل الأبطال طالعين مرسومين، ومعرفش زعلك من إيه الحقيقة، كان ممكن تزعل لو الكلام دا نزل على صفحتي أو صفحة الشركة المنتجة".
استكمل حديثه: "أنا شرحتلك دا من سنة واتكلمنا بعدها، مرة عيدت عليك في عيد ميلادك والتانية بخصوص برنامجك، ولو كنت لسه زعلان كنت هتقولي ساعتها، الفيلم بقاله سنة يا أحمد".
واختتم قائلا: "أنت حبيبي يا أحمد وصديق عمر، عشان كدا أنا اللي مش هزعل منك، معلش طولت في الكلام، لأن برضوا زعلك يعز عليا".
وحل الفنان أحمد السقا، مساء الجمعة، ضيفا على أولى حلقات برنامج "السيرة" الذي تقدمه الإعلامية وفاء الكيلاني.
وردا على سؤال مقدمة البرنامج: "امتى آخر مرة كنت فاكر إن حد أخوك وطلع مش أخوك؟"، قال السقا: "أنتِ عارفة إني بتكسف ومش هقول، لكن المرة دي هقول، أنا في حد زعلان منه وحتى الآن مقولتلوش، أنا زعلان من تامر حسني، أنا بحب تامر جدا ولو مش بحبه مش هزعل منه".
أضاف: "زعلان منه عشان هو في فيلم (الفلوس) كلمني وقالي إنه عايزني أعمل معاه مشهد، وهو الحقيقة كان جاملني في مسلسل (ولد الغلابة)، وبعد ما عملتله المشهد فوجئت إن الفيلم نزل إنه بطولة تامر وأحمد السقا وصورة معاه على الأفيش، كلمته قولتله إيه اللي بيحصل ده، مرة قالي دول فانز، ومرة قال دول الشركة المنتجة، قولتله أنا معرفش حد منهم يا تامر أنا معرفش غيرك، ودي أثرت عليّا جدا نفسيا وفي شغلي".
"وهل هذا الموقف أثر على علاقتك بتامر؟".. هكذا سُئل السقا فأجاب قائلا: "مش هتأثر.. لو قابلني حاليا وقالي كلمتين حلوين الموضوع هيخلص.. لكن أنا زعلت، لأن أنا لا يمكن أعمل فيه كده، ميصحش كده، وهو كان بإيده يمنع الكلام ده، لكن اللي حصل حصل وأنا مسامحك يا تامر لكن مشاكلك كترت".