مروة بركات: "لولا الشهداء مكنش هيبقى فيه مصر..تحية لأرواحهم"

قالت المستشارة مروة بركات، نجلة الشهيد هشام بركات النائب العام الأسبق: "إن أرض مصر مليئة بدماء الشهداء، وأحنا عايشين بيهم أصلا مفيش بيت في مصر مش موجوع ومفيهوش شهيد، من أمين شرطة لأطفال شهداء، حتى الشهيد محمد الحوفي ضابط الأمن الوطني الذي استشهد اليوم في مداهمة الأميرية".
وأضافت "مروة" في مداخلة هاتفية لبرنامج"التاسعة" الذي يقدمه الإعلامي وائل الإبراشي، على الفضائية المصرية، اليوم الثلاثاء، أن لقب شهيد كبير أوي لأنها مش كلمة سهلة الواحد يعرف يعديها، شهيد دا شخص قرر أنه يتخلى عن كل حاجه عشان بلده، شهيد يعني أم يعني أب وام ربوا وكبروا وشافوا اابنهم راجل بيضحي بدمه".
وتابعت: "الشهيد في مصر ساب زوجه بطلة بتكمل مسيرته مع ولاده زي أمي وزي ناس كتير أوي، شهيد يعني بنته، اللي كان كل حاجة بالنسبة لها، وفي أولاد شهداء مشافوش أبوهم، واستشهد وهما لسه صغيرين، ومحتاجين السند والضهر"، مؤكدة: "أنا أبويا كان ساندني لما كان عايش، ولكن تخيل الشهيد اللي استشهد النهاردة اللي عنده بنتين لسه صغيرين ايه شعورهم".
واردفت: "كلمة شهيد تقيلة أوي وليها وزنها ولازم الناس تفهم أن اللي بيموتوا مش أرقام بس زي ما بنشوفها، دي كلمة معناها كبير، ولولا الشهداء دول مكنش هيبقى في مصر"، متابعة: "لما استشهد والدي أول حاجه قولتها أن مصر ليها كتير وأنا مكنش ليا غيره ومصر كمان اللي بعتبرها أم الشهداء ملهاش غير رجالتها".
واختتمت حديثها، قائلة: "ولاد مصر رجالة وتحية لروح كل الشهداء وبقول لكل أم أنا اتعلمت منك القوة والصبر واوعي تزعلي وكملي مسيرته لأن لو كل أم شهيد كملت مسيرته أولاد الشهداء هيفضلوا يرفعوا علم مصر عالي"، متابعة: "ربنا يصبر أمه ووالده وزوجته وربنا معاهم وحنين عليهم وهيقوي قلوبهم أكتر، وكل التحية لروح والدي البطل الشهيد ولكل شهيد مازال بيعلمنا إزاي بنحب مصر".