بطلة SNL باكية: "اتحرمت من ماما في صغري ودخلت مجال الإعلانات عشان تشوفني"

استضافت الإعلامية منى الشاذلي، مقدمه برنامج "معكم" المذاع عبر فضائية "سي بي سي"، اليوم الخميس، مجموعة من أعضاء فريق "SNL بالعربي"، حيث يكشف نجوم البرنامج الشهير: إسلام إبراهيم، نانسي صلاح، محمود الليثي، توني ماهر، يارا فهمي، أحمد سلطان، جوانب مجهولة في حياتهم، ويروون حكايات لأول مرة تُذاع على الهواء، وقصص الكفاح التي مروا بها قبل أيام الشهرة.
قالت الفنانة الشابة نانسي صلاح، إنها مرت بأزمة كبيرة في حياتها عقب انفصال والدتها عن أبيها وهي في عمر 3 سنوات، ولم تتمكن من رؤية والدتها نحو 27 سنة، حتى أصبحت فنانة وتظهر على التليفزيون.
وأضافت صلاح: "بابا وماما انفصلا عن بعض وأنا دخلت مجال الإعلانات عشان ألاقي ماما، لأن بابا أخدني من ماما وخبّاني منها، ومنعها تشوفني، لدرجة إني في مرة اتخانقت مع بابا، وقُلت له: أنا لما أكبر هشتغل في الإعلانات وماما هتشوفني وهتعرف مكاني".
وتابعت الفنانة حديثها باكية: "أنا ما كُنتش أعرف شكل ماما إيه، لأن ما كانش عندي صورة لها، وفي فترة من الفترات قررت أسيب بابا وماقعدش معاه، لغاية ما وصلت بيَّا الحال إني أتأقلم على الوضع، ووصلت بيَّا الحال إني كنت باروح الشغل وأرجع البيت أنام على الكنبة، وخسيت وتعبت وبقى وزني 48 كجم، بابا كان رافض يجيب ماما، لكن عمتي جابتها من دولة عربية، ودخلت قدامي أنا ما عرفتهاش، وشقيقتي كانت بتحب برنامج SNL، وماما كانت تتابعه مع شقيقتي، وتقول لها: أنا عارفة البنت دي، هاتولي البنت دي عايزة أشوفها".
وتابعت صلاح: "ماما لمَّا عرفت أن اللي في التليفزيون بنتها أغمى عليها، وأنا لما شوفتها اتصدمت، وسلمنا على بعض وحضنا بعض، والحمد لله أنه لولا ربنا إنه قدَّرني أعدِّي في الاختبار والابتلاء ده، ما كنتش هاقدر أوصل للمكانة دي عند الناس".