محمد دياب معتذرًا لمخرج "الجبل بيننا": نجوم السينما بمصر لا يشاهدون أفلام

انتقد المخرج محمد دياب، ما حدث مع المخرج هاني أبو أسعد، مساء أمس الثلاثاء وقت عرض فيلمه في افتتاح مهرجان القاهرة السينمائي "الجبل بيننا"، إذ غادر القاعة عدد كبير من النجوم والحضور، واضبحت شبه فارغة.
ووجه دياب اعتذارًا للمخرج الفلسطيني هاني أبو أسعد، وكتب دياب عبر صفحته الشخصية بموقع التواصل الاجتماعي "فيسبوك"، قائلا: "القاعة وقت عرض فيلم الافتتاح فضيت تمامًا، رغم أنه فيلم هوليوودي وإخراج مخرج عربي.. طبعاً دي فضيحة معبرة مش عن مهرجان القاهرة لوحده بس عن صناعه السينما في مصر. الحقيقة أن نجوم السينما في مصر معظمهم مبيتفرجوش على سينما خالص بتاتًا.. يعني حتى ام بي سي تو مبيتفرجوش عليها.. اللهم الا لو في فيلم حد زقهولهم و قالهم ده هايل لو عرفت تمصره، ساعتها ألاقيه جايلي بالفيلم وعاوز يعمل زيه".
وأضاف دياب: "ممثلين مشهورين كنا بنبقي بنشتغل مع بعض ومتحمسينلي جدا كمخرج واكتشف في وسط الشغل انه مشافش حتي الأفلام اللي أنا أخرجتها!!! طب والله العظيم إني أخللي ممثل في هوليود يتفرج علي فيلمي أسهل وأسرع من إني اخللي ممثل في مصر يتفرج عليه".
وأكمل "كان فيه مهرجان مصري قريب قايم علي اختيارات صناع السينما والتليفزيون في مصر وكان معايا صديق أبهرته بقدرتي على التنبؤ بكل الجوايز، و لما سألني ازاي عرفت؟؟ قولتله بسيطة بما أن محدش من اللي بيصوتوا دول بيتفرجوا على سينما فهيقيموا الأفلام من التريلر، فاللي شكله تصويره حلو في التريلر هياخد أحسن تصوير واللي شكله ممثل كويس في التريلر هياخد أحسن ممثل وهكذا.. وتنبؤاتي كلها صدقت".
واختتم كلامه: "بالنسبة لمهرجان القاهرة، فطبعا المهرجانات هي مكان الناس اللي بتحب السينما، وطبعا تواجد النجوم مهم بس على الأقل تبقى نص القاعة ناس مهتمة بجد بالسينما، تقريبا محدش من السينما المستقلة أو الناس اللي بتشارك في مهرجانات اتعزم أصلا الريد كاربت معمولة عشان تسوق للمهرجانات، مش المهرجانات معمولة عشان تسوق للريد كاربت!!".