محمد محمود عبدالعزيز يبعث برسالة مؤثرة ل"الساحر" في ذكرى ميلاده

تذكر الفنان الشاب محمد محمود عبدالعزيز والده الفنان القدير محمود عبدالعزيز، حيث تمر ذكرى ميلاد "الساحر" في 4 يونيو الجاري، وهي الذكرى الأولى التي تمر بعد وفاته.
ونشر محمد عبر موقع تبادل الصور "انستجرام"، مجموعة صورله ولوالده ولأخيه كريم، معلقا: "يوم 4-6-1946 هو يوم عيد ميلاد حضرتك، و زي كل سنة لازم أكون أول واحد يقول لحضرتك كل سنة وحضرتك طيب وبخير يا حاج، كان نفسي أكون جنبك وأبوس راسك زي ما دايما بعمل، ياريته كان بإيدي".
وأضاف "أنا متأكد إن حضرتك إن شاء الله فى أحسن حال، يا رب أكون عند حسن ظن حضرتك ويا رب تكون راضي عني ويا رب تكون الهدايا بتاعتي بتوصل لحضرتك، وربنا يقدرني إنى أكون سبب يخلي حضرتك فرحان ومبسوط في مكانك الطاهر النضيف".
وتابع نجل "الساحر": "مش قادر أقول لحضرتك وحشتني علشان والله العظيم اللي أنا حاسس بيه أكبر من كده بكتير لدرجة إنى مش لاقيله وصف، حتى كلمة بحبك بقا الإحساس اللي جوايا لحضرتك أكبر منها بكتير أوي.. اللي مصبرني انى متأكد إن حضرتك في مكان أحسن بكتير من اللي احنا فيه، كل سنة وحضرتك طيب وإن شاء الله نتقابل قريب وأتمنى يوم ماجيلك يكون مكاني جنب حضرتك.. لا اله الا الله سيدنا محمد رسول الله".
وشكر محمود متابعيه وطلب منهم الدعاء لوالده :"أتمنى أن تشاركوني في إرسال هديتي لوالدي العزيز الغالي بالدعاء له و الترحم عليه، لكم منى جزيل الشكر أسألكم الفاتحة والدعاء لأبويا و لأمواتنا جميعا".
توفي محمود عبدالعزيز في يوم 12 نوفمبر 2016 عن عمر يناهز 70 عاما وكان أخر أعماله مسلسل "راس الغول"، الذي عُرض في رمضان 2016.
يُذكر أن محمد يشارك في السباق الرمضاني كمنتج عبر شركة "فنون مصر"، من خلال مسلسل "ظل الرئيس"، ويشارك بالتمثيل فيه أيضا، إلى جانب مشاركته في مسلسل "طاقة نور" مع الفنان هاني سلامة.