نشرت الفنانة مي كساب عبر صفحتها الشخصية بموقع "انستجرام"، رسالة مؤثرة تؤازر فيها زوجها "أوكا" وصديقه "أورتيجا"، بعد إلقاء القبض عليهما، بعد اتهامهما في قضية تزوير للتهرب من أداء الخدمة العسكرية. وعلقت مي عبر صفحتها قائلة "كل اللي يعرفني من قريب، يعرف كويس إني عمري ما كرهت حد، ولا عمري أذيت حد، ولا عمري عملت تصرف مخل بالشرف، ولا اتنازلت عن شرفي ولا كرامتي في يوم من الأيام، واستحملت ظلم كتير واضطهاد ومحسوبيات، وكنت طول الوقت بصبر نفسي بكلام أبويا الجميل اللي رباني على القناعة". وتابعت "أنا مريت بظروف صعبة كتير في حياتي، بس للأسف بقالي 4 سنين مش بشوف يومين حلوين على بعض، أنا بعيش أقسى أيام حياتي من يوم 1\12\2012، يوم ما اكتشفت أن أمي عندها السرطان وأنا مش مي، واحدة تايهة مش لاقية نفسها، موت أمي كسرني، ومن بعدها أحداث كتير أوي وجعتني". وأضافت مي "الصراحة ده أصعب موقف اتحطيت فيه من يوم ما اتولدت، مش عشان ده جوزي وحب عمري وإحساسي بعدم وجوده جنبي كأن روحي متاخدة من جسمي، لا عشان متأكدة أنه مظلوم، متأكدة أنه ضحية طيبته وسذاجته، وللأسف ضحية تعليمه المتواضع الضحل، ضحية ثقته الزيادة عن اللزوم في أي شخص يقرب منه ويضحك عليه ويقوله أنا هعملك ويوعده وعود كدابة، وفي الآخر يستغله ويورطه". واختتمت كلامها، مدافعة عن أوكا وأورتيجا قائلة "طبعا لما بتكلم عن محمد، كأني بتكلم عن أحمد كمان، أوكا وأورتيجا روح واحدة في جسدين، ثقتي في رب العالمين كبيرة جدا أنه هينصرهم ويفك كربهم، ثقتي في عدالة القضاء العسكري كبيرة أنه مش هيظلمهم، ثقتي في قلوبكم الرحيمة كبيرة إنكم هتقفوا جنبهم، أدعولهم وأدعموهم". يُذكر أن أوكا وأورتيجا تم إلقاء القبض عليهما يوم الخميس الماضي، بتهمة التهرب من أداء الخدمة العسكرية، وتزوير أوراق رسمية، قبل سفرهما إلى الإمارات.
