طه الغريب.. أول روايات محمد صادق

محمد صادق كاتب شاب من أبناء كلمتنا، بدأ الكتابة منذ كان في الحادية عشرة، ومع الوقت صقل موهبته، حتى أخرج لنا أول أبنائه.. رواية "طه الغريب"، التي تحثك على ألا تعيش بلا حلم، وتتمسك بأن يكون لك هدف تسعى لتحقيقه.
عرفنا بيك.
محمد صادق...طالب بهندسة العاشر...23 سنة...أعزب وأعول :)
بتكتب من امتى؟
من وأنا عندي 11 سنة.
كم استغرقت لكتابة روايتك؟
سنتين.
الجو الرومانسي اللي رسمته في روايتك، ممكن يتواجد على أرض الواقع؟
كل إنسان جواه طاقة حب وعطاء، والمشاعر في الرواية كلها حقيقية، بس هو الواقع اللي بيخلينا مانحسهاش علشان فيه أولويات.
ما سلبيات بطل روايتك من وجهة نظرك؟
أنا بقدم شخصية طه الغريب بكل تناقضاتها، لكن القارئ هو اللي هيقول، وكل واحد هيشوف طه زي ما حس بيه، ناس هتعشقه وناس هتكرهه.
هل فكرت وإنت بتكتب الرواية إنها تتحول لفيلم؟
أقصى نجاح ليا إن الرواية تأثر في الناس، لأني بتكلم عن حاجة جوا كل واحد فيهم...وما فكرتش إنها تتحول لفيلم، بس طبعا أتمنى ده.
هل شخصيات الرواية موجودة في الواقع؟
أنا مقتنع إن مفيش شخصية خيالية تماما....أكيد شخصيات الرواية من الناس اللي قابلتهم في حياتي، وسابوا تأثير معين...ممكن بكلمة قالوها أو صفة معينة فيهم.
هل من المبالغة إن حياة الشخص تتوقف عند قصة حب عابرة من أيام المراهقة؟
أنا مش مقتنع إن حب المراهقة عابر، لأني قابلت كتير لسه فاكرين الحب الأول، وكل إنسان بتقابليه بيسيب جواكي أثر، فما بالك بأول إنسان دخلتيه قلبك؟....أنا مش شايف إن فيها مبالغة.
إنت بتلحن.. فإلى أي مدى أثرت الموسيقى في كتاباتك؟
الموسيقى من أهم الأشياء اللي في حياتي...وكل رواية ببدأ فيها، بيبقى ليها لحن خاص بيها...كل ما أسمعه يدخّلني في جو القصة...والقصة اللي مابتطلعش من جوايا لحن...بعرف إني مش هكملها.
ليه خليت الأورج الآلة الرئيسية اللي بتلعب على مشاعر القصة؟
أنا بحب الأورج جدا، وشايف إنه يستحق التكريم :)....وكيد ده أثر على إن طه يكون عازف أورج....مش عشان أنا بعزفه...بس عشان أنا بحبه بعيدا عن عزفي ليه.
جملة "لكم كثير احتقاراتي" اللي أثارت الجدل .. بتوجهها لمين؟
الجملة دي ليها معاني كتير...ومفيش أي حد إلا وعايز يقولها لأي شيء سلبي في حياته.
ماذا تعني كلمات مثل: حلم .. واقع .. بالنسبة لك؟
الحلم بالنسبة لي هو شخصية الإنسان، ومن غيره نبقى مش عايشين، وكل واحد بيحلم على حسب شخصيته، والواقع هو الشيء اللي بيخلي الحلم أصعب ما يمكن، عشان يشوف إذا كنت قده ولا لأ.
حققت كام في المائة من أحلامك الكتابية؟ وما هو جديدك؟
لو "طه الغريب" نجحت، يبقى حققت 50 في المائة من أحلامي، وجديدي بإذن الله رواية بعنوان (بضع ساعات في يوم ما).... وإن شاء الله سيناريو فيلم، وهو حلم آخر.
تحب تقول إيه لكلمتنا.. ولشبابها.؟
كلمتنا بيتي التاني، وممكن أقعد فيها ليل نهار، وبتعلم من كل واحد فيها، وبشكرها جدا على التغيير الكبير اللي حصل لي من ساعة ما دخلتها، المكان ده أعظم مشروع في الدنيا، لأنه بيغيّر في الناس وبيديهم أمل، أما الشباب بقى فأنا بحبهم كلهم أكتر من إخواتي، ونهال طبعا ليها الشكر فوق كل الناس، لأنها أتاحت ليا الفرصة إني أوقع روايتي هنا معاكم.
كلمتنا.. نوفمبر 2010