مستقبلك عادة ولا مخصوص يا معلم !

كتير أوى شغلنا موضوع: "ندخل جامعة خاصة ولا حكومية".
الموضوع ده شغل اللي في الكلية واللي في الثانوية العامة، لكن طبعاً بياخد حيز أكبر بين اللي في الثانوية العامة، وعشان كده حبيت أعرف كل واحد فيهم بيفكر إزاي لمستقبله، فسألتهم إذا كانوا يحبون الالتحاق بجامعة خاصة ولا حكومية؟؟ فكان ردهم:
والله على حسب المجموع
بس لو اخترت أختار جامعة حكومية ،عشان فرصة الشغل لطلاب الحكومة أكتر، لكن في حالة طلاب الخاصة الشغل بيكون محتاج وسايط عالية وكتيرة.
مزيدة محمد/16سنة
أكيد جامعة خاصة..
عشان التعليم فيها أحسن ومستقبلها أحسن والأجهزة والإمكانيات كلها أحسن من الحكومية.
مصطفى جلال 17 سنة
جامعة حكومية طبعاً
الجامعة الخاصة غالية جداً، وبعدين أنا متعبش وأخد دروس وأدفع فيها فلوس كتير..وأجي في الآخر أدخل جامعة خاصة، وأدفع فيها فلوس أكتر وكمان تساويني باللي أقل مني، وبعدين أهو يبقى اسمى متخرجة من جامعة القاهرة ولا عين شمس.
أميرة كامل /16 سنة
لأ طبعاً حكومية..
أولاً أي شغل بيعترف بطلاب الحكومة عن الخاص، أو طلاب الحكومة بيكونوا في المرتبة الأولى، وبعد كده طلاب الخاصة، وبعدين أنا ممكن أستفيد بكم الفلوس اللي هدفعها كل سنة في الجامعة الخاصة وأشيلها في البنك ولا حاجة ولما أخلص أعمل مشروع بيها يفيدني.
سارة مصطفى /16 سنة
هستخسر الجموع !
هي حكومية أساسي يعني وده عشان ماتساويش بيني وبين اللي أقل مني، يعني مبقاش جايبة حاجة وتسعين وأتساوى مع اللي جايب حاجة وسبعين وأبقى أنا تعبت وطلعت عيني في المذاكرة وهو مريح، وفي الآخر أدخل أنا وهو نفس الكلية، وكأنك يا أبو زيد ما غزيت، لكن لو على التعليم والإمكانيات تبقى الجامعة الخاصة بدون منازع.
نانسي سمير/ 15 سنة
ممكن وممكن..ممكن حكومية وممكن خاصة، يعني لو خاصة من الجامعات اللي بتاخد مجموع عالي عني وأي حد يدخلها، يبقى أكيد خاصة وخصوصاً إذا كان التعليم والإمكانيات فيها هتكون أحسن من الحكومية.
محمد عاصم /17 سنة
خاصة طبعاً..
أولاً: فرصة التعليم و التعليم نفسه أحسن وأسهل وأبسط وتصحيح الامتحانات بيكون فيه عدل .
ثانياً: العدد فيها بيكون قليل، فالمعلومة بتوصل بسرعة لكن الجامعة الحكومية المدرج بيبقى فيه 500 واحد قعدين فوق بعض يعني المعلومة مش هتوصل أساساً.
رامى/ 16 سنة
حكومية طبعاً عشان أنا تعبت
لكن لو بنقارن فالجامعة الخاصة لها نصيب الأسد، المميزات كتير يعني التعليم أحسن والتصحيح أحسن والإمكانيات أفضل، بس عيبها الوحيد أنها بتساوى الناجح مع اللي أقل منه، لكن جامعة الحكومة ميزتها الوحيدة أن الشغل بتاعها مضمون أو مش عايز واسطة جامدة زي الخاصة، لكن على الناحية التانية مفيش رقابة عليها خالص وسلبيات كتير وكفتة أكتر.لكن لجل الشغل ندخل جامعة حكومية.
عزة سالم/ 16 سنة
أما أنا..
فأنا طلعت نفسي من الموضوع وسبته لربنا، لأن مش اسم الجامعةهو اللي هيخليني أشتغل ولا اسم الجامعة هو اللي هيظلمني ويساويني باللي أقل مني.
أنا لو مثلاً خريجة جامعة حكومية أو خاصة ومعنديش القدرة على أني أرسم مستقبلي وأمشيه زي ما أنا عايزة يبقى أنا فاشلة سواء من فشلة جامعة الحكومة أو من فشلة جامعة خاصة وغيري ناجح.
أو أمشيها زي ما المثل بيقول: اللي يكسب هو اللي يضحك في الآخر.
ويضحك إزاي بحاجة بسيطة إنه يثبت نفسه ويفرضها على المجتمع ويؤثر في الناس و المجتمع وميكونش سلبي ويستنى الشغل اللي يخبط على بابه لكن يسعى للعمل.
وياريت كلنا نضحك في الآخر سواء أكنا في جامعة حكومية أوجامعة خاصة.